«تۇرىك ۇلانى! تۇركيا رەسپۋبليكاسىن قۇرعان – تۇرىك حالقى» دەگەن اتاتۇرىك سوزىنە ۇيىعان تۇرىك باۋىرلار قازاق ەلى تاۋەلسىزدىگىن جاريالاعاندا تۇڭعىش تانىپ قانا قويماي, شىنايى باۋىرلاستىق تانىتقان بولاتىن. سونىڭ ءبىر دايەگى – ەلباسىمىز نۇرسۇلتان نازارباەۆ پەن سول تۇستاعى تۇركيا پرەزيدەنتى تۇرعىت ءوزال قازاق-تۇرىك ليتسەيلەرىن اشۋعا ۇيىتقى بولعان ەدى.
«تۇرىك ۇلانى! تۇركيا رەسپۋبليكاسىن قۇرعان – تۇرىك حالقى» دەگەن اتاتۇرىك سوزىنە ۇيىعان تۇرىك باۋىرلار قازاق ەلى تاۋەلسىزدىگىن جاريالاعاندا تۇڭعىش تانىپ قانا قويماي, شىنايى باۋىرلاستىق تانىتقان بولاتىن. سونىڭ ءبىر دايەگى – ەلباسىمىز نۇرسۇلتان نازارباەۆ پەن سول تۇستاعى تۇركيا پرەزيدەنتى تۇرعىت ءوزال قازاق-تۇرىك ليتسەيلەرىن اشۋعا ۇيىتقى بولعان ەدى.
سودان بەرگى كەزەڭ ىشىندە قازاق-تۇرىك ليتسەيلەر سانى 30-عا جەتىپ وتىر. جالپى ءبىلىم ورىندارىنىڭ جۇمىسىن «KATEV» حالىقارالىق قورى ۇيلەستىرەدى. ەكى مەملەكەت اراسىنداعى وسىنداي يگىلىكتى شارانىڭ ءوز شەشىمىن تاۋىپ, مىڭداعان ۇل-قىزدىڭ ءبىلىم الىپ, تاربيە ۇيرەنۋىنە جول اشقان ۋاقىتتان بەرى دە 20 جىل وتە شىعىپتى. اتاۋلى كۇنگە وراي «KATEV» حالىقارالىق قورىنىڭ باسشىسى مەحمەت مەسۋت اتا باستاعان ازاماتتار كەشە باسىلىم رەداكتسياسىندا بولىپ, «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆپەن پىكىر ءبولىسىپ, قول جەتكەن جەتىستىكتەر مەن الدا تۇرعان مىندەتتەر تۋرالى اڭگىمەلەستى.
قازاق-تۇرىك ليتسەيلەرىندە قازىر سەگىز مىڭنان اسا بالا وقيدى ەكەن. ولارعا ءبىر كەزدە 530 مۇعالىم ساباق بەرسە, قازىر 950-گە جەتىپتى. ءبىر اتاپ وتەرلىگى, بۇل ۇستازداردىڭ 820-دان استامى قازاق ەلىنىڭ ازاماتتارى كورىنەدى. بۇعان قوسا العاشقى تۇلەكتەر ليتسەي تىزگىنىن قولدارىنا الا باستاپتى. 30 مەكتەپتىڭ 22-ءسىنىڭ ديرەكتور قىزمەتى ءبىزدىڭ ەل ازاماتتارىنىڭ ەنشىسىنە ءتيىپتى.
قور باسشىسى مەحمەت مەسۋت اتا: «انا جۇرتتا وتىرعان قازاقستانمەن بۇرىن ءۇزىلىپ قالعان بايلانىسىمىز وسى ءبىلىم سالالارى ارقىلى دا جالعاسىپ وتىر. قازاق-تۇرىك ليتسەيلەرىنىڭ 20 جىل ىشىندەگى قول جەتكىزگەن تابىستارى از ەمەس. تەك قانا ليتسەيلەرمەن شەكتەلىپ قالماي, قازاق-تۇرىك كوللەدجدەرى مەن سۇلەيمەن دەميرەل اتىنداعى ۋنيۆەرسيتەتىندەگى كەلەلى ىستەرىمىز دە مولىنان. ءبىزدىڭ تۇلەكتەردىڭ ءبىر عانا جەتىستىكتەرىن العا تارتار بولسام, 20 جىل ىشىندە 2 مىڭنان اسا التىن, 3 مىڭعا تاياۋ كۇمىس, 3 مىڭنىڭ ۇستىندە قولا, بارلىعى – 8300 مەدال يەلەنىپپىز. سوڭعى جىلدارداعى حالىقارالىق وليمپيادالار مەن عىلىمي جوبالاردا وقۋشىلارىمىز 1200-دەن اسا مەدالدى قانجىعاسىنا بايلادى. وتكەن جىلعى تۇلەكتەرىمىزدىڭ 99 پايىزى جوعارى وقۋ ورىندارىنا ءتۇستى. ەڭ باستىسى, ءبىز پرەزيدەنت نۇرسۇلتان نازارباەۆتىڭ ءۇش تۇعىرلى ءتىل تۋرالى ايتقانىن جۇزەگە اسىرىپ كەلە جاتىرمىز», دەدى. ال باسشىمەن بىرگە كەلگەن «قازاقستان زامان» حالىقارالىق قوعامدىق-ساياسي گازەتىنىڭ جانە «ءمولدىر بۇلاق» جۋرنالىنىڭ باس ديرەكتورى احمەت اليازبەك, تۇركيالىق «جيھان» اقپاراتتىق اگەنتتىگىنىڭ قازاقستانداعى وكىلى دوعان يىلدىز دا بەرەكەلى جۇمىستىڭ جاي-جاپسارىنا توقتالىپ, قازاق باۋىرلارىمەن بەرىك قارىم-قاتىناستا قىزمەت ىستەيتىندىكتەرىن جەتكىزدى.
باسىلىم باسشىسى ساۋىتبەك ابدراحمانوۆ ەكى مەملەكەت اراسىنا التىن ارقاۋ بولىپ كەلە جاتقان «KATEV» حالىقارالىق قورىنىڭ يگىلىكتى ىستەرىنە وڭ باعا بەرە كەلىپ, سونىڭ ءبىر دايەگى رەتىندە «نازارباەۆ ۋنيۆەرسيتەتىنە» تۇسكەندەردىڭ 60 پايىزى قازاق-تۇرىك ليتسەيلەرىنىڭ تۇلەكتەرى ەكەنىن اتاپ ءوتتى, وسىنداي ءبىلىم مەن بىلىكتى تەڭ ۇستاپ وتىرعان قازاق-تۇرىك ليتسەيلەرىنە اركەز اقپاراتتىق دەمەۋ كورسەتىپ وتىرعانىمىزدى نازارعا سالىپ, بۇل يگى ءداستۇر, دوستىق نيەت جالعاسا بەرەتىنىن العا تارتتى.
سۇلەيمەن مامەت,
«ەگەمەن قازاقستان».