رەانيماتسيا بولىمىنە كۆي-عا قارسى ۆاكتسينا الماعان پاتسيەنتتەر ءتۇسىپ جاتىر. ستاتسيونارعا جەتكىزىلگەننەن كەيىن ولاردىڭ دەنساۋلىعى ەكى-ءۇش كۇندە وتە اۋىر كۇيگە دەيىن ناشارلايدى. بۇل تۋرالى قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ايتتى.
«بىزدەگى رەانيماتسيالىق توسەكتەر 84%-عا تولدى. كوروناۆيرۋس ينفەكتسياسىنا قارسى ەكپە الماعان, اۋىر كۇيدە جاتقان 248 پاتسيەنت بار. ونىڭ ىشىندە 77 ادام وتە اۋىر حالدە جاتىر. ناۋقاستاردىڭ باسى-قاسىندا جۇرگەندىكتەن بۇل كورسەتكىش قاتتى الاڭداتىپ وتىر. ءبىز وتكەن جىلعى ەڭ اۋىر كۇيگە جەتەيىن دەپ قالدىق», - دەيدى باسقارما باسشىسى.
تيمۋر مۇراتوۆتىڭ ايتۋىنشا اۋىر كۇيدە جاتقاندار اراسىندا قارت كىسىلەر عانا ەمەس 35 جاستاعى ناۋقاستار دا بار.
«ۆيرۋس جاڭا شتاممدارعا مۋتاتسيالانىپ وتىرادى, ال ارقايسىسىندا ناۋقاستار جاستار اراسىندا جيىلەيدى. قازىر جاستار دا, ءتىپتى بالالار دا اۋرۋدىڭ اۋىر كۇيىنە ۇشىراي باستادى. ەكى-ءۇش كۇن ىشىندە پاتسيەنتتەردىڭ دەنساۋلىعى ناشارلاعانى سونشالىق جاساندى تىنىس الۋ اپپاراتىنسىز ءومىر سۇرە المايتىن كۇيگە جەتەدى. رەانيماتسياداعى بارلىق پاتسيەنتتىڭ مۇنداي جاعدايعا ءتۇسۋىنىڭ سەبەبى – ۆاكتسيناتسيالانباعان. بىراق ولار مۇنى كەش ءتۇسىندى», دەپ اتاپ ءوتتى ت. مۇراتوۆ.
تيمۋر مۇراتوۆ قالا تۇرعىندارىن ۋاقىتىندا ۆاكتسيناتسيادان وتۋگە, وسى ارقىلى وزدەرىن ينفەكتسيا جۇقتىرۋدان قورعاۋعا شاقىردى.
«قۇرمەتتى ازاماتتار! ويلانىپ جانە كۇتىپ وتىراتىن ۋاقىت جوق! قازىر ۆاكتسيناتسيا الۋ وتە ماڭىزدى, ايتپەسە كەش بولۋى مۇمكىن. بىزگە, ياعني دارىگەرلەرگە, كۆي-گە بايلانىستى قايتىس بولعاندار ستاتيستيكاسىن جاريالاۋ, تۋىستارىنا جاقىنى كەلمەسكە كەتكەنىن ايتۋ وڭاي ەمەس. وتكەن جىلى ءبىز پاندەميانى جەڭۋدىڭ بارلىق جولىن ىزدەگەن ەدىك, ال قازىر قولىمىزدا بار, ول – ۆاكتسيناتسيا. وسى ارقىلى عانا ءبىز اۋرۋدىڭ قيىن كەزەڭىنەن شىعا الامىز», دەپ قورىتىندىلادى قالالىق دەنساۋلىق ساقتاۋ باسقارماسىنىڭ باسشىسى.