قر پرەمەر-ءمينيسترى اسقار مامين قازاقستان رەسپۋبليكاسى پرەزيدەنتىنىڭ جانىنداعى «جاسىل ەكونوميكاعا» كوشۋ جونىندەگى كەڭەس وتىرىسىن وتكىزدى, دەپ جازادى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
وتىرىستا مەملەكەت باسشىسى قاسىم-جومارت توقاەۆتىڭ بيىلعى 10 شىلدەدە ۇكىمەتتىڭ كەڭەيتىلگەن وتىرىسىندا بەرىلگەن ستيحيالىق قوقىس ورىندارىن جويۋ جانە جاڭالارىنىڭ پايدا بولۋىنا جول بەرمەۋ تۋرالى تاپسىرماسىن ىسكە اسىرۋ بارىسى قارالدى.
قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ بيىلعى 19 شىلدەدەگى جاعداي بويىنشا عارىشتىق مونيتورينگ ارقىلى 4763 رۇقسات ەتىلمەگەن قالدىق تاستاۋ ورنى انىقتالعانىن باياندادى.
2021 جىلدىڭ ءى جارتىجىلدىعىنىڭ قورىتىندىسى بويىنشا ەلىمىزدە 2932 قاتتى تۇرمىستىق قالدىقتار پوليگونى (قتق) بار, ولاردىڭ 509-ى نەمەسە 17,36%-ى ەكولوگيالىق جانە سانيتارلىق نورمالارعا سايكەس كەلەدى.
ەل اۋماعىندا 191 قوقىس شىعاراتىن ۇيىم جۇمىس ىستەيدى, ولاردىڭ تەڭگەرىمىندە 2 مىڭنان استام مامانداندىرىلعان اۆتوكولىك بار.
بيىلعى 1 شىلدەدە كۇشىنە ەنگەن جاڭا ەكولوگيالىق كودەكستە بىرقاتار جۇيەلى شارا كوزدەلگەن, اتاپ ايتقاندا, قوقىس شىعاراتىن ۇيىمداردىڭ قىزمەتىن رەتكە كەلتىرۋ جانە باقىلاۋ ماقساتىندا حابارلاما جاساۋ ءتارتىبىن ەنگىزۋ, سونداي-اق قوقىس شىعاراتىن كولىكتى سپۋتنيكتىك ناۆيگاتسيالىق جۇيەلەرمەن (GPS) جاراقتاندىرۋ.
ۇكىمەت باسشىسى جەرگىلىكتى اتقارۋشى ورگاندارعا ەكولوگيالىق جانە سانيتارلىق نورمالارعا سايكەس كەلمەيتىن قتق پوليگوندارىن رەكۋلتيۆاتسيالاۋدى نەمەسە ولاردى بەلگىلەنگەن تالاپتارعا سايكەس كەلتىرۋدى, سونداي-اق قۇرىلىس قالدىقتارىن قايتا وڭدەۋ جانە كومۋ ينفراقۇرىلىمىن قۇرۋدى تاپسىردى. جەرگىلىكتى اتقارۋشى ورگاندارعا عارىشتىق مونيتورينگپەن انىقتالعان بارلىق رۇقسات ەتىلمەگەن قوقىس ورىندارىن جويۋ, ءىىم, ەگترم, اقدم جانە جۇرتشىلىقپەن بىرلەسىپ, ءتارتىپ بۇزۋشىلاردى جاۋاپكەرشىلىككە تارتا وتىرىپ, ستيحيالىق قوقىس تاستايتىن جەرلەردى انىقتاۋ بويىنشا رەيدتەر جۇرگىزۋ تاپسىرىلدى.
پرەمەر-مينيستر جوسىقسىز قوقىس ۇيىندىلەرىن تاستايتىن جەرلەردى انىقتاۋ جانە جويۋ بويىنشا iKomek (نۇر-سۇلتان ق.) مىسالىندا وڭىرلەردە كولل-ورتالىقتار اشۋ قاجەتتىگىن اتاپ ءوتتى.
ا.مامين نىساندار قۇرىلىسىنا رۇقسات بەرۋ كەزىندە قۇرىلىس قالدىقتارىن كادەگە جاراتۋدى قاراستىرۋدى, قۇرىلىس قالدىقتارىن قتق پوليگوندارىن تىعىزداۋ مەن رەكۋلتيۆاتسيالاۋدا, سونداي-اق نەگىزگى پايدالى قازبالاردى ءوندىرۋدىڭ تاريحي ورىندارىن رەكۋلتيۆاتسيالاۋدا قولدانۋدى قاراۋدى تاپسىردى. ۇكىمەت باسشىسى قۇرىلىس قالدىقتارىن جيناۋ جانە قايتا وڭدەۋ بويىنشا مەملەكەتتىك-جەكەشەلىك ارىپتەستىك شەڭبەرىندە ينفراقۇرىلىم قۇرۋدىڭ ماڭىزدىلىعىن اتاپ ءوتتى, بۇل اسا ءىرى جانە قۇرىلىس قوقىستارىن شىعارۋ ءۇشىن جاعداي جاسايدى.