وبلىستىڭ بىرنەشە ەلدى مەكەنىندە جۇزدەگەن ءىرى قارا بۇعان دەيىن كەزىكپەگەن مال اۋرۋىمەن جاپپاي اۋىرۋدا. باستى بەلگىسى – جەمشوپ جەمەي, ءتىلىن تىستەپ تۇرۋى. مال دارىگەرلەرى سەبەبىن تاپ باسىپ ايتا المايدى. اياقاستىنان پايدا بولعان ىندەت كورىنىستەرى ستەپنوگور قالاسىنىڭ توڭىرەگىندەگى ەلدى مەكەندەر مەن اقكول اۋدانىنىڭ اۋىلدارىندا ورىن العان.
بەيمالىم ىندەت اۋەلى اقكول اۋدانىنا قاراستى ازات اۋىلىندا تىركەلىپتى. ءبىرلى-جارىم ەمەس, 400-دەن اسا ءىرى قارا تۇگەل ىندەتكە شالدىققان. ون شاقتىسى ءولىپ تە قالعان. اۋىل تۇرعىندارىنىڭ ايتۋىنا قاراعاندا, ىندەتكە شالدىققان مالدىڭ اۋزى ۋىلىپ, ءتىلى ساباقتاپ, دەمىگىپ قالادى ەكەن. مال دارىگەرلەرى ءارتۇرلى ەم قولدانعانىمەن, قايىر بولماي تۇر.
«سيىرىمنىڭ اۋزىنان كوبىك ارالاس سۋ اقتى. اياعىنا جارا شىعىپ, باسا الماي قالدى», دەيدى ازات اۋىلىنىڭ تۇرعىنى تۇرسىنحان ءامىرحان ۇلى.
ال ىرگەدەگى قارابۇلاق اۋىلىندا 130-عا جۋىق ءىرى قارا مال ءدال وسىنداي ىندەتكە شالدىعىپ وتىر. مال سۇمەسىمەن كۇن كورىپ وتىرعان اۋىل ادامدارى ءۇشىن بۇل – ۇلكەن سوققى. وسى ەلدى مەكەن تۇرعىندارىنىڭ ايتۋىنا قاراعاندا, مال دارىگەرلەرى ارقايسىسى 2,5 مىڭ تەڭگە تۇراتىن ەكپە ەككەن. ناتيجەسى كوڭىل كونشىتپەيدى. قان العانىمەن, انىقتاۋى ۇزاققا سوزىلىپ كەتتى.
مال ىندەتكە شالدىققان سوڭ ونىڭ ءسۇتىن پايدالانۋدان ەل قاۋىپتەنىپ وتىر. بۇرىن-سوڭدى مالساق قاۋىمنىڭ نازارىنا ىلىكپەگەن, توتەننەن كەلگەن ىندەتتىڭ جۇقپالى ەمەس ەكەنىنە كىم كەپىل؟
ء«بىزدىڭ قولدان كەلەر قايران جوق. ىندەت بەلگىسى پايدا بولعالى ابدىراپ قالدىق. ءدارى-دارمەگى دە تابىلماي تۇر», دەيدى مال دارىگەرى ولجاتاي فازىلوۆ.
زەرتحاناعا جىبەرىلگەن سىنامالاردان ناقتى ناتيجە شىعارىلماعان. ماماننىڭ ءۋاجى وسىنداي. ال مالساق قاۋىم بەس بىردەي اۋىلدىڭ مالى بەلگىسىز ىندەتكە شالدىققان سوڭ الاڭداۋلى.
اقمولا وبلىسى