ەلوردا پوليتسەيلەرى ويىنشىق تاپانشامەن لومبارد توناعان كۇدىكتىنى ۇستادى, دەپ حابارلايدى Egemen.kz قالالىق پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
وقيعا كەشە بولعان. «102» پۋلتىنە استانا لومباردتارىنىڭ بىرىنەن كاسسير حابارلاسىپ, بەلگىسىز ەر ادام تاپانشا كەزەنىپ, 200 مىڭ تەڭگەنى توناپ كەتكەنى تۋرالى ايتقان.
كاسسيردىڭ بەرگەن مالىمەتى بويىنشا, كۇندىزگى ساعات 12.00-دە مەديتسينالىق ماسكا كيگەن ەر ادام تەرەزەدەن تاپانشا كەزەنىپ, تسەللوفان دورباعا كاسساداعى اقشانىڭ ءبارىن سالۋدى سىبىرلاپ بۇيىرعان. بۇيرىق ورىندالماسا, تاپانشامەن اتىپ تاستايتىنىن ايتىپ, قورقىتقان. كاسسير ايتقانىن ورىنداپ, كاسساداعى بار اقشانى توناۋشى ۇسىنعان دورباعا سالىپ بەرگەن.
«وقيعا ورنىنا جەدەل پوليتسيا جاساعى كەلىپ, كۇدىكتىنىڭ بەلگىلەرىن انىقتادى. جەدەل باسقارۋ ورتالىعىنىڭ وپەراتورلارى بەينەكامەرالاردى سۇزگىدەن وتكىزىپ, كۇدىكتىگە ۇقساس ەر ادامنىڭ ىزىنە ءتۇستى. كادردان ونىڭ اسىعىس ءجۇرىپ بارا جاتىپ, بەلگىسىز زاتتى بايقاتپاي لاقتىرعانى ايقىن كورىنەدى. ول تاستاعان بەلگىسىز زات – ويىنشىق تاپانشانى باسقا ءبىر جۇرگىنشى تاۋىپ العان. كۇدىكتى ساۋدا ءۇيىنىڭ تۇراعىندا ۇستالدى. ول قالا ماڭىنداعى كەنتتىڭ 28 جاستاعى تۇرعىنى بولىپ شىقتى», دەپ حابارلايدى پوليتسيا دەپارتامەنتىنىڭ ءباسپاسوز قىزمەتى.
كۇدىكتى ءوز كىناسىن مويىندادى. قازىر ۋاقىتشا ۇستاۋ يزولياتورىنا قاماۋدا وتىر. اتالعان وقيعا ىزىمەن «قاراقشىلىق» بابى بويىنشا قىلمىستىق ءىس قوزعالدى.