COVID-19 پاندەمياسى كەزىندە ادام ساۋداگەرلەرى اۋىر جاعدايدى پايدالانىپ, قىلمىستىق ارەكەتتەرىن كۇشەيتتى. بۇل تۋرالى بىرىككەن ۇلتتار ۇيىمىنىڭ ەسىرتكى جانە قىلمىسقا قارسى كۇرەس باسقارماسىنىڭ (بۇۇ بجك) جاڭا ەسەبىندە ايتىلعان, دەپ جازادى Egemen.kz.
ەسەپتە داعدارىس كەزىندە بالالاردى قاناۋ كۇشەيگەنى جازىلعان. ادام ساۋداسى بارلىق ەلدە كەزدەسەدى. الەمدە ءجۇز مىڭداعان ادام وسىنداي قىلمىستىڭ قۇربانى بولىپ وتىر. ولاردى جىنىستىق نەمەسە ەڭبەك كۇشى رەتىندە پايدالانۋ, قارۋلى كۇشتەر قاتارىنا قوسۋ, قىلمىستىق ىستەرگە يتەرمەلەۋ, قايىر سۇراتۋ نەمەسە ءتىپتى ومىرلىك ماڭىزدى مۇشەلەرىن ساتۋ ماقساتىندا قولدانادى.
پاندەميا بۇل ماسەلەنى ودان ءارى كۇشەيتتى.
ء«بىر جاعىنان, پاندەميا ادامداردىڭ وسالدىعىن جوعارىلاتىپ, سونىمەن بىرگە قىلمىستىڭ اشىلۋىن قيىنداتاتىن جاعدايعا الىپ كەلدى. بۇل قۇرباندارعا كومەك ىزدەۋدى جانە ولاردىڭ سوت تورەلىگىنە قول جەتىمدىلىگىن قيىنداتتى», دەدى بۇۇ ەسىرتكى جانە قىلمىس جونىندەگى باسقارماسىنىڭ اتقارۋشى ديرەكتورى گادا ۆالي.
ونىڭ ايتۋىنشا, جاڭا زەرتتەۋ ساياسات جاساۋشىلار مەن قىلمىستىق ادىلەت ورگاندارىنىڭ قىزمەتكەرلەرى ءۇشىن ماڭىزدى رەسۋرس بولىپ تابىلادى, ويتكەنى داعدارىس كەزىندە ادام ساۋداسى جاعدايلارىن تەرگەۋ مەن سوت ءىسىن جۇرگىزۋدىڭ تابىستى ستراتەگيالارىن تالدايدى. سونداي-اق ەسەپتە زارداپ شەككەندەرگە كومەك كورسەتۋ بويىنشا ۇسىنىستار بەرىلگەن.
«ادام ساۋداگەرلەرى پروبلەمالاردىڭ پارازيتتەرى بولىپ تابىلادى جانە ءوز قۇرباندارىن جالداۋ تۋرالى جالعان ۋادەلەرمەن ءجيى ازعىرادى», دەدى بۇۇ بجك ادام ساۋداسىمەن كۇرەس ءبولىمىنىڭ باستىعى يلياس حاتزيس.
ول پاندەميا كوپتەگەن سالالاردا جۇمىس ورىندارىنىڭ جوعالۋىنا, جابىلۋىنا بايلانىستى قىلمىستىق جەلىلەردىڭ مۇشەلەرى ءۇمىتسىز ادامداردى اۋلاي باستاعانىن دا تىلگە تيەك ەتىپ ءوتىپتى. ساراپشى ناقتىلاپ وتكەندەي, داعدارىس كەزىندە بالالار وتە وسال جاعدايعا تاپ بولدى. قىلمىسكەرلەر ولاردى تارتۋ ءۇشىن الەۋمەتتىك جەلىلەردى جانە باسقا دا ونلاين-پلاتفورمالاردى بەلسەندى تۇردە پايدالاندى.
ء«بىزدىڭ زەرتتەۋگە قاتىسقان ساراپشىلار بالا ساۋداسىنىڭ كوبەيۋىنە الاڭداۋشىلىق ءبىلدىردى. بالالار جىنىستىق قاناۋ, ءماجبۇرلى نەكەگە تۇرۋ, قايىر سۇراۋ جانە قىلمىستىق ارەكەتتەر ءۇشىن ساتىلادى», دەدى يلياس حاتتسيس.
قىلمىستىق توپتىڭ قاقپانىنان قۇتقارىلعان ادامداردىڭ كەيبىرى ۇيلەرىنە ورالا الماي شەت ەلدەردەگى ۋاقىتشا باس ساۋعالايتىن ورىنداردا وتكىزىپ, كونترابانديستەردىڭ الداۋىنا تۇسكەن. سەبەبى ءبىراز ەلدە جابىرلەنۋشىلەردى قولداۋ جانە قورعاۋ قىزمەتتەرى جابىلدى نەمەسە شەكتەۋلى جاعدايلاردا جۇمىس ىستەدى.
«قۇتقارىلعان قۇرباندار ەسىن جيعان كەزدە ولارعا وڭالتۋ مەن رەينتەگراتسيا قاجەت. اڭگىمە مەديتسينالىق جانە زاڭگەرلىك كومەك, كەڭەس بەرۋ نەمەسە ءبىلىم الۋعا, جۇمىسقا ورنالاسۋعا مۇمكىندىك بەرۋ تۋرالى بولىپ وتىر», دەدى يلياس حاتتسيس.
كەيبىر ەلدە ادام ساۋداسىنا قارسى مامانداندىرىلعان بولىمشەلەردىڭ پوليتسيا قىزمەتكەرلەرى COVID-19 تارالۋىن توقتاتۋ ءۇشىن ۇلتتىق كۇشتەردى بىرىكتىرۋگە ءماجبۇر بولدى. بۇل ساۋداگەرلەرگە تولىق جازاسىزدىق جاعدايىندا جۇمىس ىستەۋگە مۇمكىندىك بەردى.
بايانداما اۆتورلارى پاندەميا ادام ساۋداسىنا قارسى ءىس-قيمىلدىڭ ۇلتتىق جانە حالىقارالىق دەڭگەيدە, ءتىپتى داعدارىس كەزىندە دە كۇش-جىگەرىن جالعاستىرۋعا مۇمكىندىك بەرەتىن ستراتەگيالاردىڭ قاجەتتىلىگىن كورسەتتى دەپ اتاپ ءوتتى.