مادەني بايلانىستىڭ ماڭىزى زور

 ەكى ەلدىڭ مادەنيەت سالاسىنا جاۋاپتى مينيسترلەرىنىڭ جۇز­دەسۋىنە قازاق­ستاننىڭ بەلارۋس رەسپۋبلي­كاسىن­داعى توتەنشە جانە وكىلەتتى ەلشىسى, تمد جارعىلىق ورگاندارى جانىنداعى تۇراقتى وكىل قىزمەتىن قوسا اتقارۋشى اسقار بەيسەنباەۆ پەن «قازاقكونتسەرت» مەملەكەتتىك كونتسەرت ۇيىمىنىڭ ديرەكتورى جەڭىس سەيدۋللا ۇلى دا قاتىستى.

 الدىمەن اقتوتى رايىمقۇلوۆا بۇگىندە ەكى ەل اراسىنداعى تاتۋ كورشى­لىك قارىم-قاتىناس تۇراقتى دامىپ, ما­دەني-گۋمانيتارلىق بايلانىس ەكى حالىق اراسىن بايلانىستىرۋشى كوپىر­گە اينالىپ كەلە جاتقانىن اتاپ ءوتتى.

«ىنتىماقتاستىق اياسىندا بىرقاتار اۋقىمدى مادەني جوبا جۇزەگە اسىپ جاتىر. ماسەلەن, ەلىمىزدىڭ وكىلدەرى «بەلارۋس كىتاپتارى» حالىقارالىق جارمەڭكەسىنە, ۆيتەبسكىدەگى «سلاۆيان بازارى» حالىقارالىق ونەر فەس­تيۆا­لىنە, ء«لىستاپاد» حالىق­ارا­لىق كينوفەستيۆالى سىندى مامان­دان­دىرىلعان مادەني ءىس-شارالارعا تۇراق­تى تۇردە قاتىسادى. بەلارۋس حالقىنىڭ مادەني مۇراسىن ەلىمىزدە تانىتۋ شەڭبەرىندە بەلارۋس پەن قازاقستاننىڭ مەملەكەتتىك مۇرا­عاتتارى مەن مۇراجايلارى اراسىندا ارىپتەستىك ورناتىلدى. سونىمەن قاتار ادەبيەت پەن ونەر, كينەماتوگرافيا قاي­راتكەرلەرى اراسىندا سەرىكتەستىك جاندانىپ كەلەدى», دەدى ۆەدومستۆو باسشىسى.

ايتا كەتەيىك, بيىل بەلارۋس رەس­پۋب­ليكاسىندا رەجيسسەر بەكبولات شەكەروۆتىڭ «1941 جىلدىڭ جازى» اتتى كوركەم ءفيلمىنىڭ ءتۇسىرىلىمى وتكەن بولاتىن. بۇل ۇلى جەڭىستىڭ 75 جىلدىعىنا جانە ەكىنشى دۇنيەجۇزىلىك سوعىسقا قاتىسۋشى, عالىم, جازۋشى جانە قوعام قايراتكەرى ءادي ءشا­رىپوۆتىڭ جاۋىنگەرلىك جولى جايلى تاريحي تۋىندى.

وعان قوسا جىل سايىن ءداستۇرلى تۇردە ۆيتەبسكىدە وتەتىن «سلاۆيان بازارى» حالىقارالىق ونەر فەستيۆالى تمد كولەمىندە عانا ەمەس, قۇرلىق ارالىق دەڭگەيدە تانىلعان جوباعا اينالىپ ۇلگەردى. ءبىزدىڭ ونەرپازدار ۇزاق جىلدان بەرى «سلاۆيان بازارىنا» تۇراقتى قاتىسىپ, جۇلدەگەرلەر قاتارىنان كورىنىپ ءجۇر. جالپى, وندا قازاقتىڭ قانجىعاسى بوس قايتقان ەمەس. كەزىندە ءدۇلدۇل ءانشى ديماش قۇدايبەرگەن وسى فەستيۆالگە قاتىسىپ, باعى جانعان ەدى. ونى دا ايتا كەتكەنىمىز ءجون شىعار. بۇگىندە سول دودادا قازىلار قاتارىندا وتىر.

ال بيىل قازاقستان اتىنان ەسترادا ورىنداۋشىلارى بايقاۋىندا قازاق ۇلتتىق ونەر ۋنيۆەرسيتەتىنىڭ 3-كۋرس ستۋدەنتى رۋحيا بايدۇكەنوۆا باق سىناپ, مەرەيىمىزدى ءوسىردى. ەندى ءحىح حالىقارالىق بالالار مۋزىكالىق باي­قاۋىنا «بوزتور­عاي-2019» حالىق­ارالىق بالالار شىعار­ماشى­لىعى بايقاۋىنىڭ جەڭىم­پازى 10 جاستاعى امينا اس­گاتوۆا قاتىسادى. ونىڭ دا جەتىس­تىك­كە جەتەرىنە سەنىم سول.

كەزدەسۋ بارىسىندا قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا ەكى مەملەكەتتىڭ مادەنيەت كۇندەرىن وتكىزۋ مادەني-گۋمانيتارلىق سالاداعى ىنتىماقتاستىقتى نىعايتۋدا ماڭىزدى قادام ەكەنىن جەتكىزدى.

«2018 جىلى بەلارۋس رەسپۋبليكا­سىندا قازاقستاننىڭ مادەنيەت كۇن­دەرى ۇيىمداستىرىلدى. بيىل 30 قىر­كۇيەكتەن باستاپ 3 قازانعا دەيىن ەلى­مىزدە بەلارۋس رەسپۋبليكاسىنىڭ مادەنيەت كۇندەرىن وتكىزۋدى جوسپارلاپ وتىرمىز. مادەنيەت كۇندەرى اياسىندا بەلارۋس رەسپۋبليكاسىنىڭ ۇزدىك شىعارماشىلىق ۇجىمدارى ونەر كورسەتەدى. وسى مادەنيەت كۇن­دەرى اياسىندا بەلارۋس كينوسىنىڭ كۇن­دەرىن وتكىزۋ جوسپاردا بار. ءبىزدىڭ «قازاقكونتسەرت» مەملەكەتتىك كونتسەرت ۇيىمى بەلارۋس مەملەكەتتىك فيلارمونياسىمەن مەموراندۋمعا قول قويۋ ماسەلەسىن تالقىلاۋعا دايىن», دەدى ا.رايىمقۇلوۆا.

سونداي-اق بەلارۋس رەسپۋبلي­كاسى­نىڭ جەكە ورىنداۋشىلارى مەن شىعار­­ماشىلىق ۇجىمدارىن 2022 جىلى وتەتىن «وپەراليا» حا­لىق­ارالىق فەس­تي­ۆالىنە, بيبىگۇل تولە­گەنوۆانىڭ حا­لىق­ارالىق ۆوكاليستەر باي­قاۋى­نا, مۋزىكا اسپاپتارىندا ورىنداۋشىلاردىڭ حالىقارالىق تەلەۆيزيالىق بالالار بايقاۋى سىندى ءىس-شارالارعا قاتىسۋعا شاقىردى. ەكى تاراپتىڭ وسى ءىس-شارا­لارعا قاتىسۋى ءوزارا ءىس-قيمىلعا جاڭا سەرپىن بەرەتىنىنە, مادەنيەت پەن ونەر سالاسىندا بايلانىس ورناتۋعا جانە تاجىريبە الماسۋعا ىقپال ەتەتىنىنە سەنىمدى ەكەنىن جەتكىزدى.

ءوز كەزەگىندە اناتولي ماركەۆيچ ەكى مەملەكەت اراسىنداعى مادەني-گۋمانيتارلىق بايلانىستى بەلارۋس تارابى جانداندىرۋعا نيەتتى ەكەنىن تىلگە تيەك ەتتى.

 «ەكى ەلدىڭ ونەر, ادەبيەت, سپورت جانە وزگە سالاداعى قايراتكەرلەرىنىڭ بايلانىسى ۇزاق جىلدان بەرى جالعاسىپ كەلەدى. سىزدەردىڭ وسى كەزدەسۋ بارىسىندا ايتقان ۇسىنىستارىڭىزدى قاراستىرىپ, پاندەمياعا قاراماس­تان ارىپتەستىكتىڭ ءورىسىن كەڭەيتۋگە دايىن ەكەنىمىزدى جەتكىزەمىن», دەدى ا.ماركەۆيچ.