ەلوردادا قوعامدىق كولىك جۇرگىزۋشىلەرى كۇن سايىن ءوز اۋىسىمىنان كەيىن اۆتوبۋسىنا دەزينفەكتسيا جاسايدى. تۇتقا مەن ورىندىق, ەسىك, ۆاليداتور جانە جولاۋشىلار ۇستايتىن جەردىڭ ءبارى سۇرتىلەدى. اۆتوبۋس سالونى جەلدەتىلەدى, دەپ جازادى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
«اۆتوپاركىمىزدىڭ قالا بويىنشا ءتورت ورنى بار. قاراماعىمىزداعى 778 اۆتوبۋس جۇرتشىلىققا قىزمەت ەتەدى. ءدال قازىر ءبىز تۇرعان نەگىزگى كەڭسەدە اۆتوبۋس جۋاتىن ەكى ورىن بار. مۇندا كۇنىنە 300-گە جۋىق قوعامدىق كولىك جۋىلادى. جۋىلعاننان كەيىن مىندەتتى ءتۇرلى دەزينفەكتسيالىق وڭدەۋدەن وتەدى. ياعني ءار اۆتوبۋس كۇنىنە ءبىر رەت جۋىلىپ, ءبىر رەت وڭدەلەدى. وسىعان دەيىن اۆتوبۋستار جەكسەنبى كۇندەرى عانا توقتاتىلىپ, دەزينفەكتسيالاناتىن. ەندى وسى اپتادان باستاپ, ەلوردانىڭ باس مەملەكەتتىك سانيتارلىق دارىگەرىنىڭ قاۋلىسىنا سايكەس, وڭدەۋ جۇمىسى سەنبى, جەكسەنبى كۇندەرى جۇرگىزىلەتىن بولادى», دەيدى «№1 اۆتوپارك» اق باسقارما توراعاسى باۋىرجان تىلەۋبەرگەن.
باسقارما توراعاسىنىڭ ايتۋىنشا, دەزينفەكتسيا جۇمىسىن ارنايى وقۋدان وتكەن ماماندارى جۇرگىزەدى.
«دەزينفەكتسيا جۇمىسىن اۆتوپاركتىڭ سەرتيفيكاتتالعان ماماندارى جۇرگىزەدى. ولاردى ارنايى وقىتىپ, سىناقتان وتكىزدىك. ال وڭدەۋ جۇمىسىنا ادام دەنساۋلىعىنا زيانى جوق, مەكتەپكە دەيىنگى ۇيىمداردا, مەكتەپتەردە, اۋرۋحانالاردا قولدانىلاتىن ەرىتىندى پايدالانىلادى. دەزينفەكتسيا قورى جەتكىلىكتى», دەيدى اۆتوپارك باسشىسى.