بۇگىن جامبىل وبلىسىنىڭ بايزاق اۋدانىندا «قىمىز fest, شۇبات fest» تاقىرىبىندا ۇلتتىق سۋسىنداردىڭ ەتنوفەستيۆالى ءوتتى, دەپ حابارلايدى Egemen.kz.
اتالعان شاراعا اۋدانداعى سۋحانباەۆ, بۋرىل, قوستوبە, تۇيمەكەنت باستاعان بارلىعى 7 اۋىلدىڭ قىز-كەلىنشەكتەرى قاتىسىپ, وزدەرى اشىتقان قىمىز ونىمدەرىن كوپشىلىككە ۇسىندى. فەستيۆالگە كەلگەن اۋىل تۇرعىندارى ارنايى تىگىلگەن كيىز ۇيدەن ۇلتتىق سۋسىن مەن تاعامنان ءدام تاتتى. تەمىربەك اۋىلىندا تۇراتىن تۇيەشى رايا چيتانوۆا باپتاعان شۇباتقا جۇرتشىلىق العىس ءبىلدىردى.
ال, قوستوبە اۋىلدىق وكرۋگىنەن كەلگەن قولونەر شەبەرلەرى بيبىگۇل شۋاقباي مەن بازاركۇل ىسقاقوۆالار تىككەن جاستىق, كورپەشە, سومكەلەر, قۇراق كورپە جانە قورجىن تۇرلەرى مەن قىز بالالارعا ارنالعان ۇلتتىق كيىمدەرىنە قىزىعۋشىلاردىڭ قاتارى قالىڭ بولدى.
ۇلتتىق قۇندىلىقتاردى ناسيحاتتاۋ ماقساتىندا وتكەن شارا بارىسىندا قىمىز ىشۋدەن جارىس بولىپ, ارقان تارتۋ, اسىق اتۋ, لاڭگى تەبۋ سياقتى ۇلتتىق ويىندار دا ۇيىمداستىرىلدى. قازىلار القاسىنىڭ توراعاسى, اقىن قاسقىرباي نارباتىر فەستيۆالدىڭ ماڭىزدىلىعىنا توقتالىپ, جەڭىمپازدارعا العىس حات پەن سىيلىقتار تابىستادى.