«سارىارقا» جانە «ماڭعىستاۋ» زىمىران-ارتيللەريالىق كورابلدەرى باستاعان اسكەري-تەڭىز كۇشتەرىنىڭ كورابلدەر توبى كاسپي تەڭىزىنىڭ قازاقستاندىق سەكتورىنا جورىققا شىقتى, دەپ حابارلايدى Egemen.kz.
كورابلدەر ەكيپاجدارى وزدەرىنە جۇكتەلگەن مىندەتتەردى تولىق كولەمدە ورىندادى. بىرقاتار كورابلدىك-جاۋىنگەرلىك وقۋ-جاتتىعۋلار وتكىزىلىپ, ءجۇزۋ اۋدانى زەرتتەلدى. اسكەري تەڭىزشىلەر كەمەنىڭ قالقىمالى ماكەتىنە جانە قالقىمالى ميناعا ارتيللەريادان وق اتۋدى ورىندادى.
جورىقتى اسكەري-تەڭىز بازاسى كومانديرىنىڭ ورىنباسارى 2-دارەجەلى كاپيتان باۋىرجان مۇرات ۇلى باسقاردى. ونىڭ ايتۋىنشا, مۇنداي ءىس-شارالار اسكەري-تەڭىز كۇشتەرىندەگى جاۋىنگەرلىك دايارلىقتىڭ نەگىزى بولىپ تابىلادى. جورىقتار كەزىندە كەمە كومانديرلەرى مول تاجىريبە جينايدى. جەكە قۇرام ءىس جۇزىندە داعدىلارعا يە بولا وتىرىپ, جاۋىنگەرلىك دايارلىق دەڭگەيىن ارتتىرادى.