ناتو-نىڭ باس حاتشىسى يەنس ستولتەنبەرگ اليانستىڭ بريۋسسەلدەگى شتاب-پاتەرىندە ءيزرايلدىڭ جاڭا سىرتقى ىستەر ءمينيسترى ياير لاپيدامەن كەزدەستى, دەپ حابارلايدى Egemen.kz ناتو-نىڭ ءباسپاسوز قىزمەتىنە سىلتەمە جاساپ.
ستولتەنبەرگ ءيزرايلدى «اليانستىڭ بەلسەندى سەرىكتەستەرىنىڭ ءبىرى» دەپ اتادى.
«يزرايل 20 جىلدان استام ۋاقىت بويى ناتو-نىڭ ماڭىزدى سەرىكتەسى جانە جەرورتا تەڭىزى ديالوگىنىڭ بەلسەندى قاتىسۋشىسى بولدى. ناتو مەن يزرايل عىلىم مەن تەحنولوگيا, ازاماتتىق توتەنشە جاعدايلارعا دايىندىق جانە باسقارۋ, تەرروريزممەن كۇرەس, جاپپاي قىرىپ-جوياتىن قارۋدى تاراتپاۋ, بەيبىتشىلىك پەن قاۋىپسىزدىك سياقتى ءتۇرلى ماسەلەلەر بويىنشا ءوزارا بايلانىستا», دەدى باس حاتشى.
كەزدەسۋدە اسكەري تەحنولوگيالار مەن يننوۆاتسيالاردى قوسا العاندا, ءوزارا قىزىعۋشىلىق تۋدىراتىن سالالارداعى ىنتىماقتاستىقتىڭ بولاشاعى تالقىلاندى.