تەننيستەن لوندونداعى «ۋيمبلدون» ءتۋرنيرى ءوز مارەسىنە جەتتى. ەرلەر اراسىنداعى جارىستىڭ فينالىندا سەربيالىق نوۆاك دجوكوۆيچ پەن يتاليالىق ماتتەو بەررەتتيني كۇش سىناستى, دەپ حابارلايدى Egemen.kz.
34 جاستاعى دجوكوۆيچتىڭ وسى مەجەگە جەتكەنىنە ەشكىم تاڭدانا قويماعانى راس. سەبەبى, ول بۇگىنگى تاڭداعى الەمنىڭ ءبىرىنشى راكەتكاسى. ونىڭ ۇستىنە, سەربيالىق ساڭلاق بۇعان دەيىن ءدال وسى تۋرنيردە بەس رەت باس جۇلدەنى ولجالاعان. سونداي-اق, «ۇلكەن دۋلىعا» ساناتىنداعى باسقا دا جارىستاردا سان مارتە تەڭدەسسىز دەپ تانىلدى.
ال بەررەتتينيدىڭ ونداي تولاعاي تابىستارىمەن ماقتانا الماسى انىق. دەسەك تە, سوڭعى كەزدەرى ول دا ورەلى ويىن ورنەگىنمەن كوزگە ءتۇسىپ ءجۇر. الەمدىك رەيتينگتە 8-ورىندا تۇرعان 25 جاستاعى اپپەننين تۇبەگىنىڭ تۇلەگى وسى تۋرنيردە ارگەنتينالىق گيدو پەليا, نيدەرلاندتىق بوتيك ۆان دە زاندسحۋلل, سلوۆەنيالىق الياج بەدەنە, بەلارۋسسيالىق يليا يۆاشكو, كانادالىق فەليكاس وجە-الياسيم جانە پولشالىق حۋبەرت حۋركاچتى قاپى قالدىردى. شىنىن ايتۋ كەرەك, ولاردىڭ ەشقايسى دا ۇزدىكتەر ساناتىندا ەمەس. بىراق فينالدا ماتتەو بەررەتتينيدىڭ داڭقتى نوۆاك دجوكوۆيچكە ءالى جەتپەدى. اقتىق سايىس 6:7, 6:4, 6:4, 6:3 ەسەبىمەن تورتكۇل دۇنيەنىڭ تەڭدەسسىز تەننيسشىسىنىڭ پايداسىنا شەشىلدى.
ەسكە سالا كەتسەك, «ۋيمبلدوننىڭ» ەرلەر سايىسىندا قازاقستاننىڭ ەكى ويىنشىسى عانا ونەر كورسەتتى. ولار – الەكساندر بۋبليك پەن ميحايل كۋكۋشكين. العاشقى اينالىمدا قوس جەرلەسىمىز ءوزارا كۇش سىناسىپ, العاشقىسى جەڭىسكە جەتتى. ودان كەيىن بولگاريالىق گريگور ديميتروۆتى ۇتقان بۋبليك ءۇشىنشى كەزەڭدە پولشالىق حۋبەرت حۋركاچقا ەسە جىبەردى.