1 شىلدە كۇنى قازاقستاننىڭ يزرايلدەگى ەلشىلىگى تەل-اۆيۆ مەرياسىنىڭ جانە «كازتسينك» كورپوراتسياسىنىڭ قولداۋىمەن قالانىڭ ەڭ تانىمال تۋريستىك ايماقتارىنىڭ ءبىرى – تەڭىز پورتىنىڭ جاعالاۋىندا ورنالاسقان ساياباقتا قازاق كيىز ءۇيىن تىگىپ, كورمە اشتى, دەپ حابارلايدى Egemen.kz.
ەكسپوزيتسيانىڭ اشىلۋى قازاقستان رەسپۋبليكاسى تاۋەلسىزدىگىنىڭ 30 جىلدىعىنا جانە ۇلتتىق دومبىرا كۇنىنە ورايلاستىرىلدى.
سالتاناتتى شاراعا تەل اۆيۆ – ياففو قالالىق كەڭەسىنىڭ مۇشەلەرى, يەرۋساليم پاتريارحى III تەوفيل, سىرتقى ىستەر مينيسترلىگىنىڭ, ديپلوماتيالىق كورپۋس, ءيزرايلدىڭ قوعامدىق جانە ىسكەر توپتارىنىڭ, بۇقارالىق اقپارات قۇرالدارىنىڭ وكىلدەرى مەن قازاقستاندىق دياسپورا قاتىستى.
ءوز سوزىندە قازاقستان ەلشىسى ساتىبالدى بۇرشاقوۆ 2014 جىلى كيىز ءۇي مەن دومبىرا يۋنەسكو-نىڭ ادامزاتتىڭ ماتەريالدىق ەمەس مادەني مۇراسىنىڭ كورنەكى تىزىمىنە ەنگىزىلگەنىن, سونداي-اق حالقىمىز ءۇشىن كيەلى كيىز ءۇيدىڭ قاسيەتى مەن قاستەرلى ءمانى تۋرالى ەگجەي-تەگجەيلى ايتىپ بەردى. ديپلومات حالقىمىزدىڭ مادەني مۇراسىن تانىستىرۋ قازاقستان مەن يزرايل اراسىنداعى مادەني-گۋمانيتارلىق بايلانىستاردى ودان ءارى نىعايتۋعا ىقپال ەتەتىندىگىن اتاپ ءوتتى.
تەل-اۆيۆ مەرىنىڭ ورىنباسارى گال شارابي 1999 جىلى تەل-اۆيۆ پەن الماتى اراسىندا باۋىرلاستىق بايلانىس ورناتىلعانىنا توقتالىپ, قالىڭ بۇقاراعا ون كۇن بويى ەسىگى اشىق تۇراتىن كيىز ءۇي ەكسپوزيتسياسى تەل-اۆيۆ تۇرعىندارى مەن قوناقتارىنا قازاق حالقىنىڭ ءداستۇرى مەن مادەنيەتىن تانىپ-بىلۋگە مۇمكىندىك بەرەتىنىن ايتتى.
سونىمەن قاتار شارا اياسىندا قازاقتىڭ ۇلى اقىنى اباي قۇنانباي ۇلىنىڭ 175 جىلدىعىنا وراي شىعارىلعان ەۆرەي تىلىندەگى «قارا سوزدەرى» كىتابىنىڭ تۇساۋكەسەرى ءوتتى. س.بۇرشاقوۆ كىتاپتىڭ اۋدارماشىسى پولينا برۋكمان مەن «بەيت نەللي مەديا» باسپا ءۇيىنىڭ ديرەكتورى اللا سەرەبرينسكاياعا قازاقستان مادەنيەت جانە سپورت ءمينيسترىنىڭ العىس حاتتارىن تابىستادى.
مەرەكە بارىسىندا قازاقستاننان شىققان ەۆرەي قاۋىمداستىعىنىڭ وكىلدەرى ىستىق ىقىلاسپەن جانە زور ريزاشىلىقپەن ەلىمىز تۋرالى جىلى ەستەلىكتەرىمەن ءبولىستى.
شاعىن كونتسەرتتىك باعدارلاما قويىلىپ, وندا بار يلان ۋنيۆەرسيتەتىنىڭ ستۋدەنتى ءامىرلان ناجميتدينوۆ مەن بەكجان قوڭىرباەۆ تانىمال قازاق كومپوزيتورلارىنىڭ شىعارمالارىن دومبىرادا ورىنداپ بەردى. ابايدىڭ «كوزىمنىڭ قاراسى» ءانىن قازاق تىلىندە شىرقاعان يزرايل ازاماتى يرەنا ارزيۋتوۆا ەرەكشە قۇرمەتكە بولەندى.
كيىز ءۇي الماتى وبلىسىندا تىگىلىپ, «كازتسينك» كورپوراتسياسىنىڭ دەمەۋشىلىگىمەن يزرايلگە جەتكىزىلدى. كيىز ءۇي 2 - 10 شىلدە ارالىعىندا تەل-اۆيۆ پورتىنىڭ ساياباعىندا بارشاعا اشىق بولادى.