استانا حالىقارالىق بيرجاسى قازاقستانمەن بايلانىستى كومپانيالار اكتسيالارىنىڭ كورسەتكىشتەرىن ولشەيتىن AIX Qazaq Index ىسكە قوسىلاتىنى تۋرالى جاريالادى, دەپ حابارلايدى Egemen.kz.
ىسكە قوسىلاتىن يندەكس سەگىز قازاقستاندىق كومپانيانىڭ AIX-تە, قازاقستان قور بيرجاسىندا جانە لوندون قور بيرجاسىندا ساۋدالاناتىن اكتسيالار مەن جاھاندىق دەپوزيتتىك قولحاتتاردان تۇرادى. بۇل كومپانيالاردىڭ قاتارىنا قازاقستاندا تىركەلگەن كومپانيالار مەن قىزمەتتەن تۇسكەن كىرىسى ءىشىنارا نەمەسە تولىق قازاقستاندا گەنەريرلەنەتىن جانە وپەراتسيالىق قىزمەتىنىڭ ەلەۋلى بولىگى قازاقستاندا جۇزەگە اسىرىلاتىن كاسىپورىندار كىرەدى. AIXQI 1000 بالل باستاپقى مانىمەن 1 شىلدەدە ىسكە قوسىلدى. ول ءوز ادىستەمەسى بويىنشا ەسەپتەلىنىپ, كوپشىلىككە تە قول جەتىمدى. ال ارنايى قۇرىلعان يندەكس كوميتەتى ونىڭ باسقارىلۋىن باقىلاۋدى جۇزەگە اسىرادى. يندەكستى «Halyk Finance» اق AIX تاپسىرىسى بويىنشا ازىرلەدى.
«AIXQI يندەكسى اناعۇرلىم ءوتىمدى اكتسيالار نارىعىنداعى اۋىتقۋلاردى ءدال قاداعالاۋ ءۇشىن جانە ونى جەرگىلىكتى جانە سىرتقى نارىقتاردا ينۆەستيتسيالىق قارجىلىق ونىمدەر قۇرۋ كەزىندە بەنچمارك رەتىندە پايدالانۋ ءۇشىن ازىرلەندى. بۇل شەتەلدىك ينۆەستورلارعا دا, سونىمەن قاتار قازاقستاندىق ينۆەستورلارعا دا نارىقتىڭ جالپى جاعدايىن كورسەتەتىن سەنىمدى «بارومەتر» رەتىندە قىزمەت ەتىپ جانە جاڭا ينۆەستيتسيالىق شەشىمدەر جاساۋعا ارنالعان الاڭ بولادى دەپ سەنەمىز», دەپ AIX باسقارماسىنىڭ توراعاسى رەنات بەكتۋروۆ مالىمدەدى.
يندەكس ءۇشىن نەگىزگى ۆاليۋتا رەتىندە تەڭگە پايدالانىلادى. يندەكستىڭ كورسەتكىشتەرى, ونىڭ قۇرامداستارى مەن سالماقتىق كوەففيتسيەنتتەرى تۋرالى مالىمەتتەر كۇنىنە ءبىر رەت AIX ۆەب-سايتىنداعى ارنايى بولىمدە جاريالاناتىن بولادى.
«Halyk Finance 2018 جىلدان باستاپ AIX-پەن ءتۇرلى باعىتتاردا ىنتىماقتاسادى. جاڭا يندەكستى قۇرۋ - ءبىزدىڭ ىنتىماقتاستىقتىڭ تاعى ءبىر ناتيجەسى, ول قازاقستاندىق باعالى قاعازدار نارىعىنىڭ اشىقتىعى مەن تيىمدىلىگىن ارتتىرۋعا قىزمەت ەتەدى. ءبىز ينۆەستيتسيالىق مەنەدجەر رەتىندە, وسى يندەكستى ىسكە قوسۋ, ءبىزدىڭ نارىقتا جاڭا ينۆەستيتسيالىق جوبالارىن دامىتۋعا قوسىمشا جاعدايلار تۋعىزاتىندىعىنا جانە قازاقستاندىق كومپانيالاردىڭ باعالى قاعازدارىنا كاپيتال اعىنىن ارتتىراتىنىنا سەنىمدىمىز», دەپ اتاپ ءوتتى «Halyk Finance» باسقارماسىنىڭ توراعاسى فارحاد وحونوۆ.