قازاقستاندىق سپورتشىلار توكيودا وتەتىن جازعى وليمپيادا ويىندارىنا سپورتتىڭ 27 تۇرىنەن 96 جولداما جەڭىپ الدى. قازاقستان ۇلتتىق وليمپيادالىق كوميتەتى توكيو وليمپياداسىنىڭ ىرىكتەۋ جانە رەيتينگتىك جارىستارى اياقتالعاننان كەيىن قورىتىندى شىعاردى. ناتيجەسىندە ءبىزدىڭ وليمپيادالىق قۇرامعا 95 سپورتشى كىرەدى, دەپ حابارلايدى Egemen.kz.
توكيو وليمپياداسى 23 شىلدە كۇنى باستالادى جانە تورتجىلدىقتىڭ باستى دوداسىندا بارلىعى 339 مەدال جيىنتىعى ساراپقا سالىنادى.
«ۇلتتىق وليمپيادالىق كوميتەت سپورتشىلار مەن جاتتىقتىرۋشىلارعا وليمپياداعا دەگەن ارماندارىنا ادالدىق تانىتىپ, تىنىمسىز جۇمىس ىستەپ, تالماي ەڭبەكتەنگەنى ءۇشىن العىس بىلدىرەدى. وسى ورايدا ۇلتتىق سپورت فەدەراتسيالارىنىڭ, كەشەندى عىلىمي توپ ماماندارىنىڭ, سپورت مەنەدجەرلەرىنىڭ قاجىرلى جۇمىسىن اتاپ وتكەن ءجون. ولار ءوز سپورت تۇرلەرى بويىنشا جولدامانى جەڭىپ الۋعا جانە وليمپيادا ويىندارىنا ۇزدىك سپورتشىلاردىڭ اتتانۋىنا بارىنشا كومەكتەستى. وليمپيادالىق وتباسى ءۇشىن توكيو وليمپياداسىنا دەيىنگى سوڭعى ەكى جىل وڭاي بولعان جوق. سوعان قاراماستان قازاقستاندىق سپورتشىلار وزدەرىنە, كومانداعا دەگەن سەنىمدەرىن جوعالتپادى جانە وزدەرىنىڭ كورسەتكىشتەرىن جاقسارتۋمەن جاتتىعۋلارىن جالعاستىردى. ءتىپتى وسىنداي جاعدايعا قاراماستان ءبىز بارىنشا مۇمكىندىكتى كەڭەيتىپ, توكيوعا ەل نامىسىن ابىرويمەن قورعايتىن سپورتشىلاردى جاساقتادىق. بارلىق وليمپيادالىق وتباسىنىڭ اتىنان مەملەكەت باسشىسىنا جانە ەل ۇكىمەتىنە قازاقستاندىق سپورتشىلاردى قولداپ, بارلىق قاجەتتى جاعدايدى جاساعانى ءۇشىن العىس ايتقىم كەلەدى», دەدى قازاقستان ۇوك پرەزيدەنتى تيمۋر ق ۇلىباەۆ.
قازاقستان ءبىرىنشى رەت وليمپيادا باعدارلاماسىنا جاڭادان ەنگەن سپورت تۇرلەرى, اتاپ ايتقاندا, سپورتتىق قۇزعا ورمەلەۋ جانە كاراتە بويىنشا قاتىسادى. كاراتە بويىنشا بىردەن بەس سپورتشى, ەرلەردەن دارحان ءاسادىلوۆ, نۇرقانات اجىقانوۆ, دانيار يۋلداشەۆ پەن ايەلدەردەن ءمولدىر جاڭبىرباي مەن سوفيا بەرۋلتسەۆا, ال قۇزعا ورمەلەۋدەن ريشات حايبۋللين باق سىنايدى.
تانىمال قازاقستاندىق جەڭىل اتلەت ولگا رىپاكوۆا وتاندىق وليمپيادالىق قۇرامنىڭ كوشباسشىسى بولاتىنى ءسوزسىز. بۇل دودا ولگانىڭ سپورت مانسابىنداعى ءتورتىنشى وليمپياداسى بولماق. بۇگىندە ونىڭ قورجىنىندا وليمپيادا مەدالدارىنىڭ تولىق جيىنتىعى بار. وسىعان دەيىنگى قاتىسقان بارلىق وليمپيادا ويىندارىندا ول جۇلدەمەن ورالعان ەدى.
سۋ دوبىنان ەرلەر قۇراماسى كوماندالىق ويىن تۇرلەرىنەن جارىسقا قاتساتىن قازاقستاندىق جالعىز قۇراما بولىپ وتىر. ولار وليمپيادا ويىندارىنا سەگىز جىلدان كەيىنگى ۇزىلىستەن سوڭ ورالدى.
ءداستۇر بويىنشا قامشىبەك قوڭقاباەۆ باستاعان بوكستان ەرلەر كومانداسى تولىق قۇراممەن, سەگىز سالماق بويىنشا قاتىسادى. ەل قورجىنىنداعى توعىز جولداما بوكسشىلارعا تيەسىلى.
گيمناست ميلاد كاريمي جالعىز ءوزى جەتى جولدامانى ەنشىلەپ, ىرىكتەۋ كەزەڭىن ءساتتى اياقتادى.
جۇزۋدەن ءبىز ءۇش جولدامانى يەلەندىك. ونىڭ ەكەۋى وليمپيادا چەمپيونى دميتري بالاندينگە تيەسىلى.
وتانداسىمىز رۋسلان قۇربانوۆ حالىقارالىق سەمسەرلەسۋ فەدەراتسياسىنىڭ جەكە رەيتينگى بويىنشا قۇرلىقتىق كۆوتانى جەڭىپ العان التى سپورتىشىنىڭ قاتارىنا ەندى. افينىداعى وليمپيادا ويىندارىنان كەيىن (2004) العاش رەت قازاقستاننىڭ ءۇش ۆەلوشاباندوزى توپتىق جارىستا باق سىنايدى. مۇنداي ناتيجەگە قول جەتكىزۋگە كوماندا كوشباسشىسى الەكسەي لۋتسەنكو ۇلكەن ۇلەس قوستى. ول قازاقستانعا جالپى العاندا ازيا قۇرلىعىنىڭ بىردە-ءبىر مەملەكەتى ەنشىلەمەگەن ۇپايدى اكەلدى. ترەكتەگى ۆەلوسپورت (سپرينت, ومنيۋم جانە كەيرين) بويىنشا ءۇش ليتسەنزيا جەڭىپ الدى. ايتا كەتەرلىگى, سپورتتىڭ بۇل ءتۇرى بويىنشا جولداما قازاقستان ءۇشىن تاريحي بولىپ ەسەپتەلەدى. سەبەبى, وسى ۋاقىتقا دەيىن قازاقستاندىق سپورتشىلار اتالعان ديستسيپلينا بويىنشا وليمپيادا ويىندارىنا قاتىسپاعان.
ساداق اتۋدان 20 جىلدان كەيىن العاش رەت قازاقستاننان ءۇش ساداقشى وليمپيادا ويىندارىندا كوماندالىق جارىسقا قاتىسادى.
بۇگىندە ون ءبىر جولداما بالۋاندارعا تيەسىلى بولسا, جەڭىل اتلەتتەر دە وسى مولشەردە ليتسەنزيا جەڭىپ الدى. تەننيسشىلەر جەتى, ال بايداركا مەن كانوەدە ەسۋدەن التى جولداما قورجىندا. رەيتينگتىك جارىستار ناتيجەسى بويىنشا دزيۋدوشىلار التى جولدامانى يەلەندى. توكيو تورىندە بەلدەسەتىن تاتامي شەبەرلەرىنىڭ اراسىندا تاجىريبەلى ەلدوس سمەتوۆ بار.
ۇستەل تەننيسىنەن قازاقستان قۇراماسىنىڭ ەنشىسىندە قوس جولداما, سونداي-اق, تاەكۆوندو مەن سلالومدى ەسۋ بويىنشا سپورتشىلار ەكى ليتسەنزيا الدى.
قازىرگى تاڭدا ۇوك كەيبىر سپورت تۇرلەرىنەن حالىقارالىق فەدەراتسيالاردىڭ ليتسەنزيالاردى قايتا ءبولۋ, ۇلەستىرۋ ناتيجەلەرىن كۇتۋدە.
وليمپيادا ويىنارىنا قاتىساتىن سپورتشىلاردىڭ سوڭعى ءارى ناقتى ءتىزىمى 5 شىلدەدەن كەيىن بەلگىلى بولادى.
قازاقستاندىق دەلەگاتسيانىڭ باسىم بولىگى ەكى اپتالىق كارانتيننەن كەيىن قازاقستاننان توكيوعا اتتانادى. ءبىرىنشى ورىنداعى مىندەتىمىز سپورتشىلاردىڭ قاۋىپسىزدىگى, دەپ اتاپ ءوتتى ۇلتتىق وليمپيادا كوميتەتى.
ەندى ماڭىزدى مىندەتتەردىڭ ءبىرى وليمپيادا ويىندارى باستالار الدىنداعى سوڭعى كۇندەردى ۇيىمداستىرۋ جانە ماتەريالدىق-تەحنيكالىق جاعىنان قامتاماسىز ەتۋ بولىپ قالا بەرەدى. توكيو وليمپياداسىنىڭ ۇيىمداستىرۋ كوميتەتى مەن حالىقارالىق وليمپيادا كوميتەتى وليمپياداعا قاتىسۋشىلاردىڭ دەنساۋلىعىنا قاۋىپ توندىرمەۋ جانە الدىن ءالۋ ۇشىن بۇرىن-سوڭدى بولماعان شارالاردى جۇزەگە اسىردى. اتاپ ايتقاندا, قاتىسۋشىلارعا ارنايى ەرەجەلەر جيىنتىعىن «پلەيبۋكتى» شىعاردى. مۇنداي شاراعا سپورتشىلاردىڭ جانە دەلەگاتسيالاردىڭ باسقا مۇشەلەرىنىڭ قوزعالىسىن شەكتەۋ, ۇوك-تان جانە حالىقارالىق فەدەراتسيالاردان دەلەگاتسيالاردىڭ سانىن قىسقارتۋ, كۇندەلىكتى پتر-تەستىلەرى جانە وليمپيادا ويىندارىنا قاتىسۋشىلاردىڭ ورنالاسقان جەرىن ارنايى ءموبيلدى قوسىمشالار ارقىلى ۇنەمى قاداعالاۋ كىرەدى. كوماندا جاپونياعا 16 شىلدەدە «Air Astana» كومپانياسىنىڭ قولداۋىمەن ۇيىمداستىرىلعان چارتەرلىك رەيسپەن ۇشادى.
وليمپيادا ويىندارىنىڭ اشىلۋ سالتاناتى 23 ماۋسىمدا توكيو وليمپيادا ستاديونىندا وتەدى.