بالىق شارۋاشىلىعىن دامىتۋدىڭ باعدارلاماسى بەكىتىلدى

باعدارلامادا قولدا بار الەۋەتتى ەسكەرە وتىرىپ, وسىرىلگەن بالىق كولەمىن 30 ەسەگە, 2030 جىلعا قاراي جىلىنا 270 مىڭ تونناعا دەيىن ۇلعايتۋ كوزدەلگەن. بۇل بالىق وسىرۋگە جارامدى سۋ ايدىندارىن پايدالانۋ, سونداي-اق جاڭا ينۆەستيتسيالىق يندۋستريالىق بالىق ءوسىرۋ جوبالارىن ىسكە اسىرۋ جانە جۇمىس ىستەپ تۇرعان شارۋاشىلىقتاردى جوبالىق قۋاتىنا دەيىن جەتكىزۋ ەسەبىنەن جۇزەگە اسىرىلماق. بۇل تۋرالى ورتالىق كوممۋنيكاتسيالار قىزمەتى الاڭىندا وتكەن بريفينگتە ەكولوگيا, گەولوگيا جانە تابيعي رەسۋرستار مينيسترلىگى بالىق شارۋاشىلىعى كوميتەتىنىڭ توراعاسى ناريمان ءجۇنىسوۆ مالىمدەدى.

«2030 جىلعا دەيىن 1283 جاڭا بالىق ءوسىرۋ شارۋاشىلىعى قۇرىلادى جانە جۇمىس ىستەپ تۇرعان 288 شارۋاشىلىقتى ءوسىرۋ كولەمى ۇلعايتىلادى. جوبالار ءار ءوڭىردىڭ ەرەكشەلىكتەرىنە قاراي ءبولىندى جانە جەرگىلىكتى اتقارۋشى ورگاندار بەكىتكەن بالىق شارۋاشىلىعىن دامىتۋدىڭ وڭىرلىك باعدارلامالارىندا كورسەتىلدى. قويىلعان ماقساتتارعا قول جەتكىزۋ ءۇشىن 10 جىل ىشىندە 340 ملرد تەڭگە جەكە ينۆەستيتسيالار تارتۋ جانە مەملەكەتتىك بيۋدجەتتەن شامامەن 200 ملرد تەڭگە ءبولۋ جوسپارلانىپ وتىر», دەدى سپيكەر. 

ونىڭ ايۋىنشا, 2021 جىلى جۇمىس ىستەپ تۇرعان بالىق ءوسىرۋ شارۋاشىلىقتارى ەسەبىنەن 12,8 مىڭ توننا بالىق ءوسىرۋ كۇتىلۋدە. جىل باسىنان بەرى 7,6 مىڭ توننا تاۋارلى بالىق ءوسىرىلدى.