قابانباي باتىر اۋىلىنىڭ تۇرعىندارى قۋانىشقا كەنەلدى. جەرگىلىكتى اتىمتاي جومارتتاردىڭ ەلگە دەگەن اق نيەتتەرى مەن پەيىلدەرى قولتىقتارىنان دەمەپ, بولاشاققا دەگەن سەنىمدەرىن نىعايتا ءتۇستى.
«تاۋەلسىزدىككە تاعزىم» دەپ اتالاتىن ەل تاۋەلسىزدىگىنىڭ تاريحى ەكشەلىپ, جارقىن جىلناماسى ادىپتەپ ورىلگەن كەزدەسۋ بارىسىندا كاسىپكەرلەر مەديتسينا قىزمەتكەرلەرى مەن ۋچاسكەلىك پوليتسيا ينسپەكتورلارىنا تولىمدى سىي-سياپات جاسادى. الدىمەن جەرگىلىكتى امبۋلاتورياعا ارنايى كولىكتىڭ كىلتى تابىس ەتىلدى. اۋىل ءۇشىن وتە كەرەك كولىك ەدى. جامان تۇماۋ جان القىمنان الىپ تۇرعان كەزدە مۇنداي كومەكتىڭ ءمانى وتە زور. «ايىرتاس» جاۋاپكەرشىلىگى شەكتەۋلى سەرىكتەستىگىنىڭ باسشىسى باقىتجان نۇراقىشەۆا كولىكپەن بىرگە اۋىل مەكتەبىنە مۋلتيمەديالىق جانە روبوتتەحنيكا جابدىقتارىن سىيعا تارتتى. شوق جۇلدىزداي شاعىن اۋىلدىڭ وقۋشىلارىنىڭ ساپالى ءبىلىم الۋىنا جول اشىلدى.
– جاناشىر جانداردىڭ ارقاسىندا اۋداندا الپىستان استام ەلگە قاجەتتى جوبا جۇزەگە اسىرىلدى. جاقسىلىق ءىس قاشاندا جان جادىراتادى. ىسكەر ادامدار وزدەرىنىڭ اق پەيىلدەرى ارقىلى جاس ۇرپاقتىڭ بويىنا جاقسى قاسيەت ءسىڭىرىپ جاتىر – دەدى اۋدان اكىمى باقىتبەك وسپانبەكوۆ.
بيىل اۋدانداعى اۋىل شارۋاشىلىعى قۇرىلىمدارىنىڭ باسشىلارى يۆان ساۋەر, مارس يتپاەۆ, تيمۋر پىشەنوۆ, ماكسيم بوجكو, ايتقوجا بايجانوۆ, قانات تەمىروۆ بەس بىردەي جەدەل جاردەم كولىگىن ساتىپ الىپ بەرسە, وسى كاسىپكەرلەردىڭ ارقاسىندا ۋچاسكەلىك پوليتسيا ينسپەكتورلارى دا ەكى كولىككە يە بولدى. كوپ-كورىم كومەك ەمەس پە؟! كەزدەسۋ سوڭىندا ەل دەسە ەت جۇرەگى ەلجىرەپ تۇراتىن مەتسەناتتارعا العىس حاتتار مەن «جومارت جۇرەك» جانە «تۋعان جەر» اتالىمدارى بويىنشا سىي-سياپات جاسالدى.