نۇر-سۇلتان قالاسى الماتى اۋدانىنىڭ №2 اۋداندىق سوتى م.گوركي اتىنداعى ورىس دراما تەاترىنىڭ باسشىلارىنا قاتىستى سوت ۇكىمىن جاريالادى, دەپ حابارلايدى Egemen.kz ەلوردا سوتىنىڭ ءباسپاسوز قىزمەتىنە سىلتەمە جاساپ.
تەاتر ديرەكتورى, ونىڭ ورىنباسارى, مەردىگەر ۇيىمدار مەن تەحنيكالىق قاداعالاۋ وكىلدەرى تەاتردى جوندەۋگە بولىنگەن قارجىنى جىمقىردى دەپ ايىپتالدى.
تەاتر ديرەكتورى قاسەنوۆكە ءوزىنىڭ ورىنباسارى ساتتىباەۆپەن 4 ەپيزود بويىنشا الدىن الا ءسوز بايلاسۋ ارقىلى اقشا جىمقىردى جانە جىمقىرۋعا وقتالدى دەگەن ايىپ تاعىلدى.
سونداي-اق سوتتالۋشىلاردىڭ قاتارىندا «ادس ساپا» جشس تەحنيكالىق قاداعالاۋ ساراپشىسى ەرباتىروۆ, «ست-ينجەنەرينگ» جشس ديرەكتورى (قالپىنا كەلتىرۋ بويىنشا تەحنيكالىق قاداعالاۋ) كەنجەتاەۆ بولدى, بۇل قىلمىستى «ادي-جان» جشس ديرەكتورى داستانوۆ پەن «استانا-كوكشە» جشس ديرەكتورى بايسالبەكوۆ ۇيىمداستىرعان.
سوت قاسەنوۆ, داستانوۆ, ەرباتىروۆتىڭ تەاتردى كۇردەلى جوندەۋگە بولىنگەن 370,5 ميلليون تەڭگە كولەمىندەگى اقشانى جىمقىرعانىن انىقتادى.
سونداي-اق قاسەنوۆ پەن بايسالبەكوۆ جوندەۋ-قالپىنا كەلتىرۋ جۇمىستارىنا بولىنگەن 32,5 ميلليون تەڭگە كولەمىندەگى اقشانى ۇرلاعان.
«ماماندار مەن ساراپتامالاردىڭ قورىتىندىسى نەگىزىندە تولەم جاسالعان اكتىلەردىڭ جالعان ەكەنى انىقتادى. اكتىلەرگە ءىس جۇزىندە ورىندالماعان جۇمىستار مەن قىزمەتتەر ەنگىزىلگەن», دەلىنگەن سوت حابارلاماسىندا.
سوت ساتتىباەۆ, داستانوۆ, بايسالبەكوۆ پەن كەنجەتاەۆتىڭ جاس بالالارىنىڭ بولۋىن جەڭىلدەتەتىن ءمان-جاي رەتىندە قاراستىردى.
ءاربىر سوتتالۋشىنىڭ قىلمىسقا قاتىسۋ ءرولى مەن دارەجەسىن, كەلتىرىلگەن شىعىننىڭ ءبىر بولىگىن (370,5 ميلليون تەڭگەنىڭ 9 ميلليونىن) وتەگەنىن ەسكەرە وتىرىپ, سوت مىناداي جازا كەستى:
قاسەنوۆ 9 جىلعا باس بوستاندىعىنان ايىرىلدى, داستانوۆ, بايسالبەكوۆ 8 جىلعا باس بوستاندىعىنان ايىرىلدى, ەرباتىروۆ 7 جىل 6 ايعا باس بوستاندىعىنان ايىرىلدى, ساتتىباەۆتىڭ 2 جىلعا باس بوستاندىعى شەكتەلدى. كەنجەتاەۆ 3 جىل مەرزىمگە شارتتى تۇردە باس بوستاندىعىنان ايىرىلدى.قاسەنوۆ ءومىر بويىنا, ال ساتتىباەۆ 3 جىل مەرزىمگە مەملەكەتتىك قىزمەتتە جۇمىس ىستەي المايدى.