بارىمىزگە ايان, 6 ماۋسىم ورىستىڭ الىپ اقىنىنىڭ تۋعان كۇنى. ءيا, ءيا, الەكساندر پۋشكيندى ايتىپ وتىرمىز. ۇلى شايىردىڭ وتانى سوعان بايلانىستىرىپ حالىقارالىق ورىس ءتىلى كۇنىن اتاپ ءوتۋدى داستۇرگە اينالدىرعان. ول ەندى تاڭسىق دۇنيە ەمەس. ەڭ قىزىعى مىنادا: الەمدىك Storytel اۋديوكىتاپ قىزمەتى پۋشكيننىڭ تانىمالدىلىعىن تەكسەرىپ كورگىسى كەلىپتى. ناتيجەسىندە, تۇرىكتەر تاڭداي قاقتىرعان.
نەسى تاڭ ەكەن, جاڭا عاسىر ۇرپاعى جاڭاشا پىكىردە. بۇرىنعىداي قولىنا پورتفەلىن كوتەرىپ, قويىنىنا توم-توم كىتاپ قىستىرىپ جۇرمەيدى. جەڭىلى سول, سۇيىكتى اۆتورىنىڭ شىعارماسىن قۇلاققاپ ارقىلى كەز كەلگەن ۋاقىتتا, كەز كەلگەن جەردە تىڭداپ, كوڭىلگە ءتۇيۋ. بۇل پروتسەسس سوڭعى 10 جىلدا بەلسەندى تۇردە جۇيەگە ەندى. الەمدىك ءۇردىس دەپ اۋسەلەسىن كوتەرۋگە بولادى. ءجا, ايتپاعىمىز ول ەمەس, اڭگىمە ۇلى اقىن مەن ونىڭ ۇلتىندا بولىپ وتىر عوي. ورىستاردان گورى, پۋشكيندى قاتتىراق جاقسى كورەتىن مەملەكەتتەر جەتەرلىك ەكەن. ءبىزدىڭ قولىمىزعا تيگەن مالىمەتتەر بىلاي سويلەيدى.
«پۋشكين بارىنەن بۇرىن تۇركيادا, مەكسيكادا, شۆەتسيادا, نورۆەگيادا جانە ءۇندىستاندا كوپ تىڭدالادى. الايدا ونىڭ باسقا ەلدەردەگى تانىمالدىلىعى ءوز ۇلتىنىڭ ۇلى اقىنعا دەگەن سۇيىسپەنشىلىگىمەن سالىستىرۋعا كەلمەيدى. ول بۇرىننان ورىس اقىنى بولعان جانە سولاي بولىپ قالادى», دەيدى Storytel اۋديوكىتاپ قىزمەتى ءوز مالىمدەمەسىندە.
ارينە, پۋشكين ورىس اقىنى بولىپ قالاتىنى بەلگىلى. بۇل – بۇزىلمايتىن ەرەجە. بىراق ونىڭ مۇراسى دۇنيەگە ورتاق بايلىق, رۋحاني قازىنا. ءبىز تەك ء«وز ەلى ءوز ەرلەرىن ەسكەرمەسە, ەل تەگى قايدان الار كەمەڭگەردى» دەگەن ءسوزدى قوسقىمىز كەلەدى. دوستىق راۋىشتە ايتىلعان لەبىز ەسەبىندە بىزگە دە ۇلگى بولار پايىم دەپ ويلايمىز.
ەندى قاراڭىزشى, وسىمەن بىرنەشە جىل قاتارىنان رەسەيدە پۋشكيننىڭ ەڭ تانىمال شىعارماسى «ەۆگەني ونەگين» رومانى ەكەنى ايتىلىپ كەلەدى. الايدا داڭقتى تۋىندى الەمدىك شىعارمالار اراسىندا جالپى پوەتيكالىق رەيتينگتە ەكىنشى ورىندا. قايتالاپ ايتامىز, ەكىنشى ورىندا. سەبەبى ورىس وقىرماندارى دانتە اليگەريدىڭ «قۇدىرەتتى كومەدياسىن» ءسۇيىپ وقيدى ەكەن. ءارى وقىلىمدى ءھام تىڭدارمانى وتە كوپ شىعارما ەسەبىندە ءبىرىنشى ورىننان تومەن سىرعىعان ەمەس. بۇگىنگە دەيىن. ءارى قاراي ءوزىڭىز اڭگىمەمىزدىڭ استارىن توپشىلاي بەرىڭىز.
بۇگىندە پۋشكيننىڭ اۋديو فورماتتاعى الەمدەگى ەڭ تانىمال تۋىندىسى «كىشكەنتاي تراگەديالار» دەپ اتالادى. ولار: «اشكوز رىتسار», «تاس قوناق», «موتسارت جانە سالەري». بۇلاردىڭ ءبارى تۇرىك وقىرماندارىنا ەتەنە تانىس تۋىندىلار. ال «كاپيتان قىزى» مەن «سپاد پاتشايىمى» بولسا مەكسيكالىق جانە يسپاندىق اۋديتورياعا ءوتىمدى ەكەن. اعىلشىن تىلىندە ەڭ تانىمال شىعارما «ەۆگەني ونەگين» بولىپ تابىلادى, ونى شۆەتسيا, نورۆەگيا, فينليانديا, بولگاريا جانە پولشا ءسۇيىپ تىڭدايدى.
وسى ورايدا ايتا كەتەيىك, ارىستان شال لەۆ تولستويدىڭ «اننا كارەنينا» مەن «سوعىس جانە بەيبىتشىلىك», فەدور دوستوەۆسكيدىڭ «قىلمىس پەن جازا» جانە ميحايل بۋلگاكوۆتىڭ «ماستەر مەن مارگاريتا» شىعارمالارى شەتەلدىكتەرگە ەرەكشە اسەر ەتەدى. جىل سايىن باسىلىپ شىعاتىن كىتاپتار تىزىمىنەن تۇسكەن ەمەس.
ال ءبىزدىڭ دانىشپان ابايدى شە؟ كىم كوپ وقيدى ەكەن. ءوزىمىز بە؟ وزگەلەر مە؟ ىشتەگى ساۋالعا ۋاقىت جاۋاپ بەرمەيدى, ءبىز جاۋاپ بەرەمىز. ويلانايىق, ويلى وقىرمان!