قازاقستاننىڭ تانىمال كاسىپقوي بوكسشىسى فيرۋزا شاريپوۆا دۇنيەجۇزىلىك بوكس قاۋىمداستىعىنىڭ (WBA) جاڭارتىلعان رەيتينگىندە ءبىرىنشى ورىنعا كوتەرىلدى.
شاريپوۆانىڭ بۇل تابىسىنا ەش تاڭدانۋعا بولمايدى. 26 جاستاعى بوكسشى 2016 جىلدان بەرى كاسىپقوي رينگتە كۇش سىناسىپ ءجۇر. سول كەزدەن بەرى 13 جەكپە-جەك وتكىزىپ, 12 رەت جەڭىسكە جەتتى. التى قارسىلاسىن ەسىنەن تاندىردى. ءار جىلدارى ءتۇرلى نۇسقا بويىنشا التىن بەلبەۋلەردى يەلەندى. ءوز باسەكەلەرىنىڭ دەنىن ول رەسەي مەن قازاقستاندا وتكىزدى. ءبىر مارتە يسپانياعا بارىپ تا جۇدىرىقتاستى.
بۇگىنگى تاڭدا ايەلدەر اراسىنداعى جەڭىل سالماقتا ءابسوليۋتتى الەم چەمپيونى اتاعىن يرلانديالىق كەتي تەيلوردىڭ يەلەنىپ وتىرعانى بەلگىلى. ەكىنشى ساتىدان ءبىرىنشى ورىنعا كوتەرىلگەن شاريپوۆا ەندى WBA تۇجىرىمى بويىنشا تەيلورمەن جەكپە-جەكتىڭ مىندەتتى ۇمىتكەرى اتاندى.