ءار بالاعا وتباسىنان ارتىق قورعان جوق. اتا-انا ءۇشىن ءۇيىنىڭ بەرەكەسىن كىرگىزىپ, ىنتىماعىن ساقتاۋ, مەيىر-شاپاعاتىن توگىپ, جىلىلىقتى قامتاماسىز ەتۋ – تاربيەنىڭ باسى.
جاقىندا حالىقارالىق بالالاردى قورعاۋ كۇنى قارساڭىندا پرەزيدەنت جانىنداعى قازاقستاننىڭ ستراتەگيالىق زەرتتەۋلەر ينستيتۋتى وتباسى جانە بالالار ماسەلەسىنە قاتىستى جۇرگىزگەن الەۋمەتتىك ساۋالداماسىنىڭ قورىتىسىندىسىن جاريا ەتتى. رەسپۋبليكا كولەمىندە جۇرگىزىلگەن بۇل زەرتتەۋگە 18 جانە ودان جوعارى جاستاعى 6 800 قازاقستاندىق قاتىسقان. ولاردىڭ 82,3%-ى – وتباسىلى ادام, ياعني جۇبايىمەن بىرگە تۇرادى نەمەسە بۇرىن تۇرعاندار. ال ۇيلەنبەگەن, بويداق رەسپوندەنتتەردىڭ ۇلەسى 17,7%-دى قۇرادى.
ساۋالداماعا قاتىسقانداردىڭ 76,6%-ى اتا-انالار ەكەن. بۇل رەتتە ولاردىڭ 58,7%-ىندا كامەلەتكە تولماعان بالالارى بار, ال 17,9%-ىنىڭ بالالارى كامەلەتكە تولعان. رەسپوندەنتتەردىڭ 12,8%-ىنىڭ ءتورت جانە ودان دا كوپ بالاسى بار, ياعني كوپبالالى وتباسىلار.
ساۋالداما بارىسىندا ازاماتتارعا ء«سىز ومىردە باقىتتى وتباسىن قۇرىپ, جاقسى بالالاردى تاربيەلەي الدىڭىز با؟» دەگەن سۇراق قويىلعان. رەسپوندەنتتەردىڭ باسىم كوپشىلىگى بۇل سۇراققا وڭ جاۋاپ بەرىپتى. سونىمەن قاتار قاتىسۋشىلاردىڭ 67,7%-ى باقىتتى وتباسىن قۇرىپ ۇلگەرگەن جانە رەسپوندەنتتەردىڭ 24,1%-ى باقىتتى وتباسى قۇرا الاتىنىنا سەنىمدى.
ال بالانىڭ تاربيەسىنە قاتىستى كوزقاراسقا كەلسەك, رەسپوندەنتتەردىڭ 61%-ى بالالارىن جاقسى تاربيەلەپ وتىرمىز دەگەن پىكىر بىلدىرگەن. تاعى 31,7%-ى ءوز بالالارىن جاقسى تاربيەلەي الاتىنىنا سەنىمدى.
جالپى, بالا تاربيەلەۋدە اقىل ايتقانمەن قاتار, ىسىڭمەن دە ۇلگى كورسەتۋ ماڭىزدى. وسى ورايدا بالاسىنىڭ ۇلگەرىمىنە كەلگەندە مۇعالىمىنە ۇنەمى ءمىن تاعاتىن اتا-انالاردىڭ دا ءجيى كەزدەسەتىنى بەلگىلى. الايدا سول اتا-انالاردىڭ كوبى ۇيىندە كىتاپ وقي بەرمەيدى. اتالعان ينستيتۋت وسى ماسەلەگە قاتىستى دا الەۋمەتتىك ساۋالداما جۇرگىزىپ, نەكەدە تۇرعان ءاربىر ەكىنشى ازاماتتىڭ كىتاپ وقىمايتىنىن كورسەتىپتى. ۇيلەنگەن رەسپوندەنتتەردىڭ تەك 5%-ى عانا كۇن سايىن كىتاپ وقيدى ەكەن.
سونداي-اق كىشكەنتاي جانە ەرەسەك بالالارى بار, ەشقاشان كىتاپ وقىمايتىن رەسپوندەنتتەردىڭ ۇلەسى وتە جوعارى ەكەن. اتاپ ايتقاندا, وتباسىلارىندا ءتورت جانە ودان كوپ بالاسى بارلاردىڭ – 43,7%-ى, ءبىر بالاسى بارلاردىڭ 53,7%-ى, ال كامەلەتكە تولعان بالالارى بار رەسپوندەنتتەردىڭ 56,3%-ى كىتاپ وقىمايدى.