رەسەيدىڭ سانكت-پەتەربۋرگ قالاسىندا ۆولەيبولدان ارداگەرلەر اراسىندا وتكەن حالىقارالىق تۋرنير ءوز مارەسىنە جەتتى. بۇل جارىستا ەلىمىزدىڭ «الماتى» كلۋبى دا باق سىنادى.
وسىدان ەكى اپتا بۇرىن عانا قازاق ۇلتتىق اگرارلىق ۋنيۆەرسيتەتى (قازۇاۋ) نەگىزىندە قۇرىلعان اتالعان كوماندا ماسكەۋدىڭ ءدال ىرگەسىندە ورنالاسقان زەلەنوگراد قالاسىندا كسرو-نىڭ ەڭبەك سىڭىرگەن جاتتىقتىرۋشىسى الەكساندر كيلچەۆسكيدى ەسكە تۇسىرۋگە ارنالعان تۋرنيردە توپ جارعانى جايىندا جازعان ەدىك. مىنە, ەندى ولار تاعى دا اتوي سالدى. نەۆا جاعالاۋىندا وتكەن جارىستا «الماتىنىڭ» ساپىندا يگور چەكرۋسكوۆ, باقىتجان بايتورە, ۆلاديمير باننيكوۆ, رۋستام ءماسىموۆ, شوحرات ارزيەۆ, الەكساندر تاراسوۆ, ۆياچەسلاۆ كوزۋب, امرا شالبارباەۆ جانە ەلدار گازيزۋلين سىندى ويىنشىلار ونەر كورسەتتى. باستاپقى باسەكەلەردىڭ بارلىعىن ءوز پايداسىنا شەشكەن جەرلەستەرىمىز اقتىق سىندا كوستروما وبلىسىنىڭ وكىلدەرىمەن كەزدەستى. ال بۇل كوماندا كەزىندە ارداگەرلەر وليمپياداسىندا توپ جارىپ, الەم چەمپيونى اتانعان. وسىنداي ازۋلى قارسىلاستارىنان ەش قايمىقپاعان قازاقستاندىق ۆولەيبولشىلار 2:0 ەسەبىمەن باسىم ءتۇسىپ, باس جۇلدەنى ولجالادى.