ءيا, الاش دەسە كەۋدەنى ماقتانىش كەرنەي مە, قاناتىن قومداعان بۇركىتتەي ارقالانا قالامىز. ويتپەگەندە شە, الاش مەملەكەتىن قۇرامىز دەپ باستارىن بايگەگە تىگىپ, تاۋەلسىزدىك جولىندا قۇربان بولعان بابالاردىڭ باتىرلىعى ۇمىتىلمايدى. كەشە وبلىستىق ونەر مۋزەيى «الاش ارىستارى» اتتى كورمە ۇيىمداستىردى.
حالىقارالىق مۋزەي ءتۇنى اياسىندا ۇيىمداستىرىلعان شاراعا ءوڭىردىڭ سۋرەتشىلەرى ءبىر اي بۇرىن بىلەك سىبانا كىرىسكەن. بايقاۋ بولعاندىقتان, باسەكە بار. ءبىر-بىرىنەن اسىپ تۇسۋگە تىرىستى. قايراتكەرلەردى ءار قىرىنان بەينەلەدى. تالاپ گرافيكا جانرىندا بولعان سوڭ شەبەرلەر تۋش, گۋاش, اكۆارەل سىندى تاسىلدەردى قولداندى.
– تاۋەلسىزدىگىمىزدى اسقاقتاتۋ ءۇشىن ونىڭ تاريحىن تەرەڭىرەك ءبىلۋىمىز كەرەك. ءبىلىپ قانا قويماي, ءار قىرىنان ناسيحاتتاعانىمىز دۇرىس. بيىل ءبىزدىڭ مۋزەي قازاق زيالىلارىنىڭ بەينەسىن جاس ۇرپاققا تانىتۋدى كوزدەپ, سۋرەت بايقاۋىن ۇيىمداستىردى. تاماشا-تاماشا تۋىندىلار كەلىپ ءتۇستى. مۋزەي كورەرمەندەرىنە الاش ارىستارىن ءار قىرىنان كورۋگە مۇمكىندىك تۋىپ وتىر, – دەيدى مۋزەي قىزمەتكەرى ەسەنبول ناقتىباي ۇلى.
تاۋەلسىزدىكتىڭ وتىز جىلدىعىمەن قاتار كەلگەن ءاليحان بوكەيحاننىڭ 155 جىلدىعىن, الاش ارىستارىن مۋزەي قىزمەتكەرلەرى نازاردان تىس قالدىرماعانى قۋانتتى.
بايقاۋعا وبلىستىڭ ءار وڭىرىنەن 17 قاتىسۋشى ءوز تۋىندىلارىن ۇسىنعان. جالپى سانى 30 جۇمىس مۋزەي تورىنەن ورىن الدى. بايقاۋ بولعان سوڭ وتىزدىڭ ىشىنەن جۇلدەگە ىلىنگەن شەبەرلەر اقشالاي سىيلىققا يە بولدى. ونەر مۋزەيى ۇيىمداستىرعان شاراعا دەمەۋشىلىك جاساعان ەكم سومPANY جشس ديرەكتورى ونەر ءورىسىنىڭ كەڭەيە ءتۇسۋى ءۇشىن ايانىپ قالمايتىنىن ايتتى.
– ونەرگە قولداۋ كورسەتۋ – ءار ازاماتتىڭ پارىزى. ءبىز بەرگەن بايگە ونەردىڭ ولشەمى بولا قويماس. بايقاۋعا قاتىسقان ۇمىتكەرلەردىڭ تۋىندىلارىن كورىپ تالانتتى جاستاردىڭ ءوسىپ كەلە جاتقانىنا كوز جەتكىزدىك. ءبىز بۇل مۋزەيمەن ءبىراز ۋاقىتتان بەرى سەرىكتەسە جۇمىس ىستەپ كەلەمىز. ءالى دە ونەر جولىنداعى ءىس-شارالارعا قولداۋ كورسەتەتىن بولامىز, – دەدى ەكم سومPANY جشس ديرەكتورى ماقسات اسان ۇلى.
شىعىس قازاقستان وبلىسى