الماتى وبلىسىندا 9-سىنىپتى ۇزدىك تامامداعان وقۋشى اسىلىپ قالدى. تۋىستارى ونىڭ ولىمىنە ينتەرنەتتەگى كۇدىكتى قاۋىمداستىقتار يتەرمەلەگەنىنە سەنىمدى, دەپ حابارلايدى Egemen.kz كتك تەلەارناسىنا سىلتەمە جاساپ.
مارقۇم بولعان 15 جاستاعى ديانا حامۋتەتسكايانىڭ جاقىندارى قۇزىرلى ورىنداردان ونىڭ ۇيالى تەلەفونىن جانە وزگە جەكە زاتتارىن تەكسەرۋدى تالاپ ەتىپ وتىر.
«قويىن داپتەرى ادام شوشىرلىق ساتانيستتىك سيپاتتاعى نەبىر سۋرەتكە تولى», دەيدى تۋىسى.
الماتى وبلىسىنداعى جاپەك باتىر اۋىلىندا ءبۇتىن ءبىر وتباسى قارا جامىلدى. وسىدان ءتورت كۇن بۇرىن ورىمدەي 15 جاسار قىزىنىڭ قورادا توسەك جايماسىنا اسىلعان ءولى دەنەسىن اناسىنىڭ ءوزى الىپ شىققان. قايعىدان قان جۇتقان باقىتتى ايتمۇراتوۆا ديانانىڭ مۇنداي ارەكەتكە بارۋىنا ەش سەبەپ بولماعانىن ايتادى. ويتكەنى 9-سىنىپتى ۇزدىك ءبىتىرىپ, اتتەستات الاتىنىنا قۋانىپ ءجۇرىپتى.
«ساعات 3-تە «دۇكەندە ءسىزدىڭ ورنىڭىزعا تۇرامىن, ءسىز دەمالىڭىز» دەدى. بىراق ايتىلعان ۋاقىتتا كەلمەدى. تەلەفونى ءوشىرۋلى بولدى. كورشىمە حابارلاسىپ, ءۇيدى تەكسەرۋىن سۇرادىم. ەش جەردە جوق دەگەن سوڭ, ءوزىم كەلىپ قارادىم. تاپپاي, قۇربىسىمەن مەكتەپپەن قوشتاسۋ كەشىنە دايىندالىپ جۇرگەن بولار دەدىم. اجەتحاناعا جاقىنداي بەرگەنىمدە قارسى بەتتەگى قورادان اپپاق جايمانىڭ ءىلۋلى تۇرعانىن كوردىم. ءارى قاراي ەسىمدە ەشتەڭە جوق», دەيدى مارقۇمنىڭ اناسى.
مارقۇمنىڭ تۋىستارى ديانانى ەكى كۇن بۇرىن جەر قوينىنا تاپسىرعان. ومىرگە قۇشتار قىزدارىنىڭ بۇل ارەكەتكە قالاي بارعانىن تۇسىنبەي دال. سەبەبىن ىزدەۋگە تىرىسقان ولار كۇندەلىگىنەن قورقىنىشتى سۋرەتتەردى كورىپ, جاعاسىن ۇستاپ وتىر. بۇلاردى اناسى العاشىندا تەك شيماي داپتەرى دەپ ويلاعان. ويتكەنى باستاپقى بەتىنە تەك ارماندارىن تۇسىرگەن. الايدا سۋرەتتى دە جاقسى سالاتىن ديانا ىشكى جاعىنا ولىمگە يتەرمەلەيتىن ءتۇرلى ۇرەيلى بەينەلەر مەن جازۋ جازىپتى. بىرىندە: «مەن ولىمنەن قورىقپايمىن. ەڭ قىمبات ادامدارىمنان ايىرىلىپ قالۋدان قورقامىن» دەسە, ەندى بىرىندە ءتىپتى قانمەن سۋرەت سالعان. وسىلايشا جاقىندارى بۇل سۋيتسيد جاساۋعا يتەرمەلەيتىن «سيني كيت» ويىنى ەكەنىنە سەنىمدى.
«تۇنگى 2-دەن كەلىپ تاڭعى 6-عا دەيىن وتىردىم. ءبارىن اقتاردىم. وزىنەن ءوزى ويناپ-ك ۇلىپ جۇرگەن بالانىڭ سويتە سالۋى مۇمكىن ەمەس دەپ, ءوزىم تەرگەۋ جاسادىم, داپتەرىن اقتاردىم. ءبىر سەكتا سياقتى», دەيدى تۋىسقان اعاسى مۇراتبەك ايتمۇراتوۆ.
سونداي-اق №4 ورتا مەكتەپ ديرەكتورىنىڭ تاربيە ءىسى جونىندەگى ورىنباسارى قۇرالاي كوشەگەنوۆا ونىڭ جالپى ساباقتان سەبەپسىز قالمايتىنىن جانە مىنەزى اشىق بولعانىن ايتادى.
«سىنىپتاستارىمەن, ۇستازدارىمەن بەلسەندى قارىم-قاتىناستا جۇرەتىن ۇلگىلى وقۋشى بولاتىن. ۇزدىك اتتەستاتتىڭ ۇمىتكەرى. وسى قىزدان ءدال وسىنداي شىعادى دەپ ويلاعان جوقپىز. نە يتەرمەلەگەنىن, ءتىپتى ءوزىمىز دە تۇسىنبەي وتىرمىز», دەيدى مۇعالىم.
ءدال وسىنداي قايعىلى وقيعالار كورشى اۋىلدارداردا دا بولىپتى. بۇلاردىڭ بارلىعىنا ينتەرنەت ارقىلى تاراعان ساتانيستتىك سيپاتتاعى قاۋىپتى ويىندار سەبەپ بولۋى مۇمكىن. الايدا قۇزىرلى ورىندار تەرگەۋدى تەرەڭنەن باستاۋدىڭ ورنىنا, ءىستى ءجاي عانا سۋيتسيد دەپ جىلى جاۋىپ قويىپ جاتىر دەپ قاپالى. ال پوليتسيا دەپارتامەنتى تەرگەۋ توقتاماعانىن ايتادى.
الماتى وبلىسى پد رەسمي وكىلى اقبوتا قۋانىشبەكقىزى اتالعان ءىس بويىنشا قر قك-ءتىڭ 105-باپ, 3-بولىگى, ياعني وزىنە قول جۇمساۋ فاكتىسىمەن سوتقا دەيىنگى تەرگەۋ جۇرگىزىلىپ جاتقانىن مالىمدەدى. وسى ورايدا سوت مەديتسينالىق-ساراپتاما تاعايىندالعان.
«باستاپقى قورىتىندىسى كورسەتىپ وتىرعانداي, ءجاسوسپىرىمنىڭ ولىمىنە تىنىس الۋ جولدارىنىڭ مەحانيكالىق اسفەكتسياسى سەبەپ بولعان. سوتقا دەيىنگى تەرگەپ-تەكسەرۋ جالعاستىرىلىپ جاتىر», دەيدى پد رەسمي وكىلى.