يزرايل ماۋسىم ايىنان باستاپ ەلدەگى پاندەمياعا بايلانىستى بۇرىن قويىلعان بارلىق شەكتەۋلەردى الىپ تاستماق. بۇل تۋرالى ەلدىڭ دەنساۋلىق ساقتاۋ مينيسترلىگى مالىمدەدى, دەپ حابارلايدى Egemen.kz.
«پاندەميا باستالعاننان بەرى ءبىرىنشى رەت يزرايل اۋماعىنداعى بارلىق شەكتەۋلەر 1 ماۋسىمدا جويىلادى», دەپ حابارلادى مينيسترلىك.
الايدا, ەلگە كەلەتىن تۋريستەرگە كارانتيندىك رەجيم ساقتالادى, ءتىپتى شەكتەۋلەر كۇشەيتىلۋى مۇمكىن. يزرايلدە بەس ميلليوننان استام ادام (حالىقتىڭ 55 پايىزى) كوروناۆيرۋسقا قارسى ەكى رەت ەكپە العان.
مەيرامحانالارعا, بارلارعا جانە سپورت زالدارعا تەك تولىق ۆاكتسيناتسيالانعان ازاماتتار ەركىن كىرە الادى.
يزرايل ۆاكتسيناتسيا بويىنشا الەمدەگى كوشباسشى ەلدەردىڭ بىرىنە اينالدى. ءساۋىر ايىنىڭ باسىندا مۇندا ەرەسەك تۇرعىنداردىڭ 80 پايىزعا جۋىعى ۆاكتسيناتسيادان ءوتتى.
ناۋرىز ايىنىڭ باسىندا پرەمەر-مينيستر بينيامين نەتانياحۋ يزرايل COVID-19-دى جەڭگەن العاشقى ەل ەكەنىن ايتتى. يزرايلدە حالىقتى جاپپاي ۆاكتسيناتسيالاۋ 2021 جىلدىڭ قاڭتارىندا باستالعان.
مەملەكەت وسى قاجەتتىلىكتەر ءۇشىن امەريكاندىق Pfizer ۆاكتسيناسىن ساتىپ الدى. ەكپە ءبىرىنشى كەزەكتە سوزىلمالى اۋرۋمەن اۋىراتىن ادامدارعا جاسالدى.