قورعانىس ءمينيسترىنىڭ ورىنباسارى دارىن تۇياقوۆ ەلىمىزدىڭ باتىس وڭىرىنە جۇمىس ساپارىمەن باردى. اقتوبە جانە ماڭعىستاۋ وبلىستارىندا ەل اسكەرىنىڭ تسيفرلاندىرۋ ماسەلەلەرى تالقىلاندى, دەپ حابارلايدى Egemen.kz.
اقتوبەدە ءمينيستردىڭ ورىنباسارى وبلىس اكىمى وڭداسىن ورازالينمەن كەزدەسۋ بارىسىندا اسكەرگە شاقىرۋ ناۋقانى, ازاماتتاردى مەرزىمدى اسكەري قىزمەتكە شاقىرۋداعى تسيفرلىق جۇيەلەردى قولدانۋ ماسەلەلەرى قارالدى. ءمينيستردىڭ ورىنباسارى وبلىستىق اكىمشىلىكتىڭ احۋالدىق ورتالىعىنا باردى.
جەرگىلىكتى اسكەري باسقارۋ ورگاندارى مەن قۇقىق قورعاۋ ورگاندارىنىڭ وكىلدەرىنە اقپاراتتىق جۇيەلەردى قولدانۋداعى شەتەلدىك تاجىريبەسى ۇسىنىلدى.
دارىن تۇياقوۆ اسكەرگە شاقىرۋ ناۋقانىن وتكىزۋ كەزىندە تسيفرلىق تەحنولوگيالاردى كەڭىنەن قولدانۋ جۇرگىزىلىپ جاتقان جۇمىستىڭ ساپاسىمەن قاتار, اشىقتىعىن دا قامتاماسىز ەتەتىنىن اتاپ ءوتتى. بىرىڭعاي اقپاراتتىق بازاعا اسكەرگە شاقىرىلۋعا جاتاتىن تۇلعالاردىڭ الەۋمەتتىك, دەنساۋلىق جاعدايى, ءبىلىمى تۋرالى اقپاراتتى ەنگىزۋ قاجەت. ءبىلىم بەرۋ, دەنساۋلىق ساقتاۋ ۇيىمدارىمەن جانە قۇقىق قورعاۋ ورگاندارىمەن تىعىز ءوزارا بايلانىس ورناتۋ ارقىلى عانا اسكەرگە شاقىرۋدىڭ ەلەكتروندىق جۇيەلەۋ ساپاسىن ارتتىرۋعا بولادى.
ماڭعىستاۋ وبلىسىندا حالىققا مەملەكەتتىك قىزمەت كورسەتۋ جۇمىستارىنا باستى نازار اۋدارىلدى. ءمينيستردىڭ ورىنباسارى حالىققا قىزمەت كورسەتۋ ورتالىقتارىندا بولىپ, اۋىلدىق ەلدى مەكەندەردى ينتەرنەتكە كەڭ جولاقتى قولجەتىمدىلىكپەن قامتاماسىز ەتۋ ءۇشىن ەنگىزىلگەن توبج (تالشىقتى-وپتيكالىق بايلانىس جەلىلەرى) قازاقستاننىڭ تەلەكوممۋنيكاتسيا سالاسىنىڭ جوباسىمەن تانىستى.
بۇگىنگى تاڭدا قورعانىس ۆەدومستۆوسى حالىققا ۇسىناتىن بارلىق مەملەكەتتىك قىزمەتتەر تسيفرلاندىرىلعانى جانە بارلىق ازاماتتار ولاردى ەلەكتروندىق فورماتتا الۋ مۇمكىندىگىنە يە ەكەنى اتاپ ءوتىلدى.
دارىن تۇياقوۆ اقتاۋ گارنيزونىنىڭ اسكەري بولىمدەرىندە اقپاراتتىق-كوممۋنيكاتسيالىق ينفراقۇرىلىمنىڭ جاي-كۇيىمەن تانىسىپ, اۆتوماتتاندىرىلعان باسقارۋ جۇيەسىن پايدالانۋعا ەنگىزۋ ماسەلەلەرى بويىنشا كەڭەس وتكىزدى.