فۋتبولدان قازاقستان چەمپيوناتىنىڭ 12 تۋر ويىندارى ءوز مارەسىنە جەتتى. سوڭعى كەزدەسۋلەر تاراز, اتىراۋ, قوستاناي جانە اتىراۋ قالالارىندا ءوتتى, دەپ حابارلايدى Egemen.kz.
«تاراز» كوش سوڭىنداعى «جەتىسۋدان» ويدا-جوقتا جەڭىلىپ قالدى. 2-مينۋتتا پەدرو ەۋجەنيو گول سوققانىمەن, ارادا تۋرا جارتى ساعات وتكەننەن سوڭ ارتەم دميتريەۆ تارازى باسىن تەڭسەلتتى. كوماندالار ۇزىلىستەن شىققان بەتتە بەرىك شايحوۆ دوپتى ءوز قاقپاسىنا ەنگىزدى. 70-مينۋتتا باۋىرجان بايتانا ەسەپتى تەڭەستىردى. بىراق جەرگىلىكتى جانكۇيەرلەردىڭ قۋانىشى ۇزاققا سوزىلمادى. 72-مينۋتتا ايبار جاسىلىقوۆ سوققان گول «جەتىسۋعا» جەڭىس سىيلادى – 2:3.
«كاسپي» مەن «شاحتەر» اراسىنداعى باسەكەنىڭ تاعدىرى العاشقى تايمدا شەشىلدى. الاڭ يەلەرى ساپىنداعى داۆيد كاراەۆ ەكى مارتە (2 جانە 31-مينۋتتار) جانە سالي ءبىر رەت (9-مينۋت) دوپتى توردا تۋلاتتى. قوناقتار بىردە-ءبىر ناتيجەلى شابۋىل ۇيىمداستىرا المادى – 3:0.
قوستانايدا «توبىل» «قىزىلجاردى» 2:0 ەسەبىمەن ۇتتى. بۇل گولداردىڭ اۆتورلارى – نەمانيا نيكوليچ (64 مينۋت) پەن سەرىكجان مۇجىقوۆ (77 مينۋت). ال «اتىراۋ» مەن «ورداباسى» اراسىنداعى ماتچتا ەسەپ اشىلعان جوق – 0:0.
جارىس كەستەسىندە «استانا» ءالى دە ەشكىمدى جەتكىزبەي كەلەدى. ەلوردالىق كلۋبتىڭ ەنشىسىندە 32 ۇپاي بار. ەكىنشى ورىندا – «توبىل». قوستانايلىقتار 25 ۇپايدى ولجالاۋدا. «اقجايىق» ءۇشىنشى ساتىعا جايعاستى. ورالدىقتاردىڭ 21 ۇپايى بار.