كۆي بويىنشا ءوز ستاتۋسىڭىزدى «Ashyq» قوسىمشاسىن جۇكتەپ, ۇيدەن شىقپاي-اق بىلۋگە بولادى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
الدىمەن «Ashyq» قوسىمشاسىن ۇيالى تەلەفونعا نەمەسە پلانشەتكە جۇكتەپ الۋىڭىز كەرەك. ارى قاراي تەكسەرۋ ءۇشىن ينتەرنەتكە كىرە الاتىن تاعى ءبىر قۇرىلعى قاجەت بولادى. ول قۇرىلعى ارقىلى ashyq.kz سايتىنا كىرىپ, QR كودىن سمارتفونىڭىزداعى «Ashyq» قوسىمشاسى ارقىلى سكانەرلەۋ قاجەت. وسىدان كەيىن بارىپ تەكسەرۋشىنىڭ ستاتۋسى كورسەتىلەدى.
مۇنداي سەرۆيس «Ashyq» جوباسىنا قاتىساتىن نىساندارعا بارۋ ءۇشىن قاجەت. ستاتۋس اقپاراتتىق جۇيەلەرمەن سالىستىرۋ نەگىزىندە پتر-زەرتتەۋلەردىڭ بىرىڭعاي ينتەگراتسيالىق پورتالى جانە قر دسم COVID-19 باقىلاۋ ورتالىعى ارقىلى بەرىلەدى.
«Ashyq» جوباسى بويىنشا جۇمىس باستالعاننان بەرى نۇر-Cۇلتان قالاسىنداعى 618 كاسىپكەرلىك نىسان تىركەلگەن. بۇگىندە ەلوردا بويىنشا «Ashyq» جوباسىنا قاتىساتىن كاسىپكەرلىك نىساندارىندا ءۇي كارانتينىن بۇزعان 1954 كەلۋشى انىقتالدى (جۇقتىرعاندار, «قىزىل» ستاتۋسى بار – 875 كەلۋشى, جاقىن بايلانىستا بولعاندار, «سارى» مارتەبەسى بار – 1079 كەلۋشى). وقشاۋلاۋ رەجيمىن بۇزعان كەلۋشىلەرگە ءۇي كارانتينىن ساقتاۋ جونىندە ءتۇسىندىرۋ جۇمىستارى جۇرگىزىلەدى.
«Ashyq» جوباسىن ەنگىزۋ كوروناۆيرۋستىق ينفەكتسيانىڭ تارالۋىن ازايتۋعا مۇمكىندىك بەرەدى, سونداي-اق شەكتەۋ ءىس-شارالارىن ەنگىزۋ كەزەڭىندە كاسىپكەرلىك نىساندارىنا قولداۋ كورسەتەدى.