بار الەم اۋىر كۇندەردى باستان وتكەرىپ جاتىر. كوزگە كورىنبەيتىن سوعىس ەش ەلدى نازاردان تىس قالدىرمادى. قانشاما جاندار مەزگىلسىز ومىرمەن قوش ايتىستى.
بوس مەكتەپتەر مەن قاڭىراعان عيماراتتاردى قوسپاعاندا, بوس تۇرعان ويىن الاڭدارى, تەربەلمەگەن التىباقان, اينالماعان اتكەنشەك جانىڭدى قۇلازىتاتىن كورىنىستەر ەدى. بۇل ءومىردىڭ ءمانى – سابيلەردىڭ شات كۇلكىسى, مەكتەپكە اسىققان بالالاردىڭ قوزعالىسى ەكەن عوي! مىناۋ الەم ادامدارمەن, كوشەلەر بالالارمەن كورىكتى ەكەنىن بىزگە بىلتىرعى كارانتيندەگى كۇندەر ۇعىندىردى.
وتكەن جىلدىڭ ءدال وسى ايلارىندا اپتانىڭ 2 كۇنىندە عانا قىسقارتىلعان جۇمىسقا باراتىنمىن. وندا دا جۇمىسىم ۇيىمنەن 100 مەترلىك جەردە عانا. ءۇيىم مەن جۇمىسىمنىڭ اراسىنداعى دالاداعى مۇلگىگەن تىنىشتىق مەنى قاتتى شوشىتاتىن. ويتكەنى كوكتەم كەلگەندە بارلىق تىرشىلىك جاندانىپ, ادامدار دالادان ۇيگە كىرمەيتىن كەز عوي. ال 2020 جىلدىڭ كوكتەمى ءبارىمىزدى ۇيىمىزگە قاماعانىمەن, تابيعاتتىڭ بۋسانۋىن كورە الماعانىمىزبەن ەستە قالدى. سونداي كۇندەردىڭ بىرىندە كەش اراسى كەنەتتەن 3 جاسار قىزىمنىڭ قىزۋى كوتەرىلدى. سول كەزدەگى ءحالىمدى ايتىپ جەتكىزە المايمىن. اكەسى ەكەۋمىز جانارىمىز جاسقا تولىپ, ءۇن-ءتۇنسىز عانا تىلدەستىك. ءار 15 مينۋت سايىن قىزۋىن ولشەسەم, بەرگەن ءدارىم اسەر ەتپەي, دەنە قىزۋى اسپانداپ بارا جاتتى. ناۋرىزدان بەرى ۇيدەن شىقپاعان بالاپانىما قايدان, قالاي كەلدى دەگەن سۇراق جۇمىسقا باراتىن ءوزىمدى «تاسىمالداۋشى» رەتىندە كورسەتتى. ءوزىمدى جەك كورە باستادىم. قانشاما ساقتىق شارالاردى جاساپ وتىرساق تا, دەنە قىزۋىنىڭ شارىقتاي بەرۋى مەنى وسى ويعا اكەپ تىرەي بەردى. ۇرەي مەن قورقىنىشتى جەڭىپ جەدەل-جاردەم شاقىردىق. شىدامادىم, قىزىمدى باۋىرىما قىسىپ بار داۋسىممەن جىلادىم. ەگىلىپ اللادان مەدەت سۇرادىم. ەڭ قورقىنىشتىسى, بۇل دەرتكە قارسى تۇرار ۆاكتسينانىڭ جوقتىعى ەدى. جاقىندارىنان ايىرىلعان جانداردىڭ جان كۇيىن مەن سول ساتتە ءتۇسىندىم.
ابىروي بولعاندا قىزىمنىڭ دەنساۋلىعى كىناراتسىز بولىپ شىقتى. پتر تەست كورسەتكىشى دە تازا بولدى. سول ساتتەن باستاپ, الەم ءۇشىن ۆاكتسينانىڭ تابىلۋىن تىلەدىم. سول ساتتەن باستاپ ادامزاتتى بۇل تاجالدان قۇتقارار تەك ۆاكتسينا ەكەنىن ۇقتىم.
عىلىم مەن تەحنيكانىڭ دامىعان زامانىندا ءومىر ءسۇرىپ جاتقانىمىز قانداي باقىت دەسەڭىزشى؟! مۇنداي جۇقپالى دەرتتەردىڭ ادامزات تاريحىندا تالايى بولعانىن, سول دەرتتەردىڭ ەمى تابىلماي ادامدار جىلدار بويى زارداپ شەككەنىن, ءتىپتى ۇلت ارىستارىنىڭ دا اۋىر ناۋقاسپەن كوز جۇمعانىن بارلىعىمىز دەرلىك بىلەمىز. ال ءبىز شە؟ ءبىر جىل ۋاقىت وتپەي-اق بۇل دەرتتىڭ دە ۆاكتسيناسى جاسالدى. جاقىنىمىزعا جاناشىر بولۋعا, تۋعاندارىمىزدى ساقتاۋعا, وتكەن جىلعى قاتەلىكتى قايتالاماۋعا, قورقىنىشىمىزدى سەيىلتۋگە مۇمكىندىك تۋدى. «جاساسىن, الەم! جاساسىن, عىلىم!» دەگەندى وسىندايدا ايتقان دۇرىس. ەندەشە, الىپقاشپا اڭگىمەگە سەنىپ, جالعان مالىمەتتى وڭدى-سولدى تاراتپاي ۆيرۋستان ساقتانۋدىڭ توتە جولى – ۆاكتسينا سالدىرۋعا اسىعايىق, اعايىن.
اسەمگۇل وسپانوۆا,
قازتۇتىنۋوداعىنىڭ جوعارى كوللەدجى وقىتۋشىسى