«تۇمار» ۇلتتىق تەلەۆيزيالىق بايگەسى قورىتىندىلاندى. ەلوردا تورىندە جۇزدەن جۇيرىك شىققان جۋرناليستەردى ماراپاتتاۋعا اقپارات جانە قوعامدىق دامۋ ءمينيسترى ايدا بالاەۆا قاتىستى.
بيىل بەسىنشى رەت وتكىزىلىپ وتىرعان دوداعا تەلەجۋرناليستەردەن 250 ءوتىنىش كەلىپ تۇسكەن. ولاردىڭ اراسىنان 10 اتالىم بويىنشا 40 جۇمىس ىرىكتەلىپ الىندى. بايقاۋعا قاتىسقان جۇمىستاردىڭ 88-ءى قازاق تىلىندە, 162-ءسى ورىس تىلىندە. جەڭىمپازدار قازىلاردىڭ جابىق داۋىس بەرۋى ارقىلى انىقتالدى.
ەڭ كوپ ءوتىنىم «ۇزدىك دەرەكتى فيلم» اتالىمى بويىنشا كەلىپ ءتۇستى. 42 جۋرناليست جۇمىسىن ۇسىنعان. «ۇزدىك تەلەجۋرناليست» اتالىمى بويىنشا 40, «ۇزدىك تەلەجۇرگىزۋشى» اتالىمى بويىنشا 38 جانە «ۇزدىك رەجيسسەرلىك جۇمىس» اتالىمى بويىنشا 31 جۇمىس بايقاۋعا قاتىستى.
«بيىل بەسىنشى رەت ءوتىپ وتىرعان بۇل جوبا – جۇزدەن جۇيرىك شىققان جاڭا ەسىمدەردى جىل سايىن جاريالاپ, جالىندى تۇلعالار مەن تىڭ باستامالاردىڭ جاسامپاز جولىنا اينالدى! ءسوز جوق, بۇگىنگى تەلەۆيزيا – تەك اقپاراتتىڭ كوزى عانا ەمەس. بۇل – ۇلتتىق يدەولوگيا مەن ءتالىم-تاربيەنىڭ قۇرالى. ال ەندى, وسىناۋ ستراتەگيالىق ماڭىزى زور سالانىڭ بارىن باپتاپ, جوعىن جوقتاپ جۇرگەن – مىنا وزدەرىڭىز!» دەدى سالتاناتتى ءىس-شارانىڭ شىمىلدىعىن اشقان ايدا بالاەۆا.
ءمينيستردىڭ ايتۋىنشا, بيىلعى بايگە ەل تاۋەلسىزدىگىنىڭ 30 جىلدىعى اياسىندا وتۋدە. «وسى 30 جىل ىشىندە ەل دامۋىمەن بىرگە ۇلتتىق باق, سونىڭ ىشىندە تەلەۆيزيا سالاسى ۇلكەن وزگەرىستەردەن ءوتتى. قارقىندى دامىپ, ناتيجەلى بيىكتەردى باعىندىردى. وتكەن 2020 جىل ەلىمىز ءۇشىن ۇلكەن سىناق جىلى بولدى. الەمدىك پاندەميا باستالعاندا – تىلشىلەر قاۋىمى, سونىڭ ىشىندە تەلەجۋرناليستەر قاۋىپ-قاتەرگە قاراماي العى شەپتەن كورىندى. كۇن-ءتۇن دەمەي جۇمىس ىستەپ, حالىققا شىنايى اقپارات جەتكىزدى», دەدى ول.
مينيستر وتكەن جىلى تەلەاۋديتوريا ءوسىمى 22 پايىزدى قۇراعانىن, وتاندىق تەلەۆيزيالىق ونىمگە سۇرانىستىڭ ارتقانىن ايتتى. الەمدىك جەتەكشى مەدياكومپانيالارمەن حالىقارالىق ىنتىماقتاستىق نىعايتىلىپ, قازاقستاندىق ونىمدەردى شەتەلدەردە ىلگەرىلەتۋ جۇمىسى جانداندىرىلعانىن اتاپ ءوتتى. سونىمەن قاتار رەسەي, تۇركيا, وزبەكستان, قىرعىزستان تەلەكومپانيالارمەن بىرلەسكەن تەلەۆيزيالىق ءونىم شىعارۋ بويىنشا ۋاعدالاستىققا قول جەتكىزىلگەنىنە نازار اۋداردى. «ارينە, بۇل – وسى ءبىر جىلدا اتقارىلعان كوپ جۇمىستىڭ ازعانتاي بولىگى عانا. ونىڭ ءبارىن قازىر ءتىزىپ ايتۋ مۇمكىن ەمەس. ەڭ باستىسى – بولاشاق باعدارىمىز انىق, جوسپارىمىز ايقىن. وكىنىشكە قاراي, قوعام ءالى دە الەمدىك پاندەميانىڭ ىقپالىندا. سوندىقتان «تۇمار» سىيلىعى بيىل 2-مارتە ونلاين فورماتتا ءوتىپ وتىر. بيىل 48 وتاندىق تەلەۆيزيا وكىلىنە «تۇمار» بايگەسىنىڭ سىيلىعى تابىستالادى. ونىڭ اراسىندا تانىمال رەجيسسەرلەر مەن جۋرناليستەر, كاسىبي وپەراتورلار مەن ستسەناريستەر بار. ءسوز جوق, ولاردىڭ اتقارعان جۇمىسى مەن جوبالارى وتاندىق تەلەۆيزيانىڭ باسەكەگە قابىلەتىن ارتتىرىپ, كاسىبي دەڭگەيگە, جاڭا بيىككە كوتەرەدى دەپ سەنەمىز», دەدى ول.
ايدا بالاەۆا ءسوز سوڭىندا بارشا قازاقستاندىقتاردى 7 مامىر – وتان قورعاۋشى كۇنىمەن جانە 9 مامىر – ۇلى جەڭىس مەرەكەسىمەن قۇتتىقتادى. «ارينە, وتان قورعاۋ ۇعىمىنىڭ ماعىناسى تەرەڭ. شۇكىر, بۇگىندە تىنىش زامان, بەرەكەلى ءومىر كەشۋدەمىز. دەسە دە, بەيبىت زاماننىڭ دا ءوز سىناقتارى مەن مىندەتى بار. وسى ورتاق ماقسات جولىندا قيىندىقتاردى بىرگە ەڭسەرىپ, جەتىستىكتەرگە بىرگە جەتەيىك», دەدى مينيستر.
ال بايقاۋ قورىتىندىسى بويىنشا, Atameken Business تەلەارناسىنىڭ ءجۋرناليسى رۋسلان ىدىرىسوۆ «ۇزدىك تەلەجۋرناليست», «كتك» تەلەارناسىنىڭ قىزمەتكەرى كاميلا ءجۇسىپوۆا «ۇزدىك تەلەجۇرگىزۋشى» اتاندى.
«نتك» تەلەارناسى دايىنداعان JOL دەرەكتى ءفيلمى «ۇزدىك رەجيسسەرلىك جۇمىس» اتالىمى بويىنشا ۇزدىك دەپ تانىلدى. Qazaqstan ۇلتتىق ارناسىنان كورسەتىلەتىن «تەلەدارىگەر» باعدارلاماسى «ۇزدىك الەۋمەتتىك جوبا», Astana TV تەلەارناسىنىڭ Aitarym bar باعدارلاماسى «ۇزدىك توك-شوۋ» اتالىمدارىن جەڭىپ الدى.
«ۇزدىك دەرەكتى فيلم» اتالىمى «نىعمەت نۇرماقوۆ. ءتورتىنشى پرەمەر-مينيستر» ءفيلمى ءۇشىن «سارىارقا» تەلەارناسىنا بۇيىردى.
«ۇزدىك ويىن-ساۋىق باعدارلاماسى» رەتىندە Qazaqstan ۇلتتىق تەلەارناسىنىڭ «جۇزدەن جۇيرىك» باعدارلاماسى تانىلدى. ال «حابار» تەلەارناسى دايىنداعان «اباي جولى» «ۇزدىك تەلەۆيزيالىق سەريال» رەتىندە تاڭدالدى. «ۇزدىك اقپاراتتىق باعدارلاما» اتالىمى «ەۋرازيا» ءبىرىنشى ارناسىنىڭ» قانجىعاسىندا. ال «ۇزدىك ايماقتىق تەلەارنا» رەتىندە پاۆلودار قالالىق «يربيس TV» ارناسى تاڭدالدى.
سونىمەن قاتار اقپارات جانە قوعامدىق دامۋ ءمينيسترى ايدا بالاەۆا «حابار 24» ارناسىنا «تۇمار» ۇلتتىق تەلەۆيزيالىق بايگەسىنىڭ ارنايى سىيلىعىن تابىستادى. «بۇل سىيلىقتى مەن وتە ۇلكەن قۋانىشپەن جاريالايمىن. سەبەبى تاۋلىك بويى, كارانتين كەزىندە دە, قازىر دە بۇل ارنا ەلگە ۇزدىكسىز اقپارات تاراتىپ كەلەدى. ال توتەنشە جاعداي كەزەڭىندە «حابار 24» ەل ىشىندە 384 ساعات, شەتەلدە 19 ساعات تىكەلەي قوسىلىم جاساپتى. مۇنىڭ بارلىعى – ۇلكەن ۇجىمنىڭ تىنىمسىز ەڭبەگىنىڭ ارقاسى», دەدى ايدا بالاەۆا.
بايقاۋ جەڭىمپازدارى قازاقستاندىق تەلەۆيزيانى دامىتۋعا قوسقان ۇلەسى ءۇشىن 1 ميلليون تەڭگە كولەمىندە اقشالاي سىياقىعا جانە «تۇمار» مۇسىنشەسىنە يە بولدى.