ءال-فارابي اتىنداعى قازاق ۇلتتىق ۋنيۆەرسيتەتىندە بەلگىلى جۋرناليست, عالىم, ساياسي عىلىمدار كانديداتى جۇمابەك كەنجاليندى ەسكە الۋعا ارنالعان «قازاقستان قوعامىنداعى اقپاراتتىق ۇدەرىستەر: باق مەنەدجمەنتى مەن ماركەتينگى جانە PR» اتتى حالىقارالىق عىلىمي-تاجىريبەلىك كونفەرەنتسيا ءوتتى. اتالعان ءىس-شارانى يۋنەسكو, حالىقارالىق جۋرناليستيكا جانە قوعامدىق مەديا كافەدراسى ءى كەنجالين وقۋلارى اياسىندا ۇيىمداستىردى.
كوزى تىرىسىندە ج.كەنجالين ءال-فارابي اتىنداعى قازۇۋ-دا PR, باق مەنەدجمەنتى مەن ماركەتينگىنە بايلانىستى بىرنەشە حالىقارالىق عىلىمي-تاجىريبەلىك كونفەرەنتسيالاردى وتكىزىپ, ءجيى-ءجيى تاجىريبەسىمەن ءبولىسىپ تۇردى. ونىڭ «ساياسي مەنەدجمەنت جانە ءباسپاسوزدىڭ جۇرتشىلىقپەن بايلانىس ماسەلەلەرى» اتتى وقۋ قۇرالى, اقپاراتتىق مەنەدجمەنت پەن ماركەتينگ سالالارىنا بايلانىستى زەرتتەۋ ماقالالارى بۇگىندە جۋرناليستيكا فاكۋلتەتى ستۋدەنتتەرىنىڭ يگىلىگىنە قىزمەت ەتۋدە. ج.كەنجالين اتىنداعى ء«باسپاسوز جانە جاڭا مەديا» وقۋ-شىعارماشىلىق زەرتحاناسى دا بولاشاق مامانداردى ۇلاعاتتى ۇستازدىڭ ادالدىعى مەن كىسىلىك بولمىسىنا ساي تاربيەلەۋ ماقساتىندا اشىلعان بولاتىن.
كونفەرەنتسيانىڭ شىمىلدىعىن قازۇۋ الەۋمەتتىك دامۋ جونىندەگى پرورەكتوردىڭ مىندەتىن اتقارۋشى ءاليا ءماسالىموۆا اشىپ, بۇقارالىق اقپارات قۇرالدارىنىڭ ەلىمىزدىڭ الەۋمەتتىك-ەكونوميكالىق, مادەني دامۋىنداعى وراسان زور رولىنە توقتالدى. سونداي-اق پرەزيدەنتتىڭ كوپتەگەن ماسەلەگە قوزعاۋ سالىپ, قالىڭ ەل تاراپىنان قولداۋ تاپقان «حالىق ۇنىنە قۇلاق اساتىن مەملەكەت» اتتى تۇجىرىمداماسى جۋرناليستەردىڭ الدىنا زور مىندەتتەر جۇكتەپ وتىرعاندىعىن, قازاق قالامگەرلەرىنىڭ قارا شاڭىراعى – قازاق ۇلتتىق ۋنيۆەرسيتەتى دە وسى مىندەتتەر ۇدەسىنەن شىعۋدى ماقسات تۇتاتىندىعىن باسا ايتىپ, «اقپاراتتىق مەندجمەنت سىندى جاڭا عىلىمي باعىتتىڭ نەگىزىن قالاپ, شاكىرت تاربيەلەگەن مۇنداي تۇلعانى كەيىنگى جاستارعا ونەگە ەتە وتىرىپ, بولاشاق مامانداردى تاربيەلەۋ – ءبىزدىڭ باستى پارىزىمىز», دەپ ءسوزىن قورىتىندىلادى.
جيىن بارىسىندا جۋرناليستيكا فاكۋلتەتىنىڭ دەكانى ساعاتبەك مەدەۋبەك مەملەكەتتىك حاتشى قىرىمبەك كوشەرباەۆتىڭ, اقپارات جانە قوعامدىق دامۋ ءمينيسترى ايدا بالاەۆانىڭ قۇتتىقتاۋ-لەبىزدەرىمەن تانىستىردى.
ودان كەيىن قابىرعالى قالامگەردىڭ قىسقا عۇمىرىندا قالدىرعان مول مۇراسى مەن اتقارعان وراسان ىستەرى تۋرالى كوركەم فيلم كورسەتىلدى.
اسەرلى كەشتى ءارى قاراي پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ جالعادى.
«تامىرى تەرەڭ وقۋ ورنى ءال-فارابي اتىنداعى قازاق ۇلتتىق ۋنيۆەرسيتەتى بولار ەلدىڭ بالاسىنا جاراساتىن مىنەز – اسىلداردى ارداقتاۋ ءداستۇرىن بەرىك ۇستانىپ وتىر» دەي كەلە, عالىمنىڭ تازالىق, تاربيەلىلىك, كىشىلىك, كىسىلىك ۇستانىمدارىنا ادال بولۋ ارقىلى ءوز بويىنداعى قاسيەتتەرىن ۇلگى ەتكەندىگىن ماقتانىشپەن جەتكىزدى. ال «تۇلعا» جۋرنالىنىڭ» باس رەداكتورى مارات توقاشباەۆ ءوز ءسوزىن «بۇل شارا ۇلتتىق مادەنيەتىمىز بەن جۋرناليستيكامىزدىڭ اقىلداساتىن الاڭىنا اينالادى. جۇكەڭنىڭ بۇكىل شىعارماشىلىق ءومىرى مەنىڭ كوز الدىمدا ءوتتى. ادامي قاسيەتتەرىنەن ۇلگى الۋعا تىرىستىق. 2018 جىلى جۇمابەك ومار ۇلىنىڭ قۇرمەتىنە جانە ونى ەسكە الۋ ماقساتىندا جارىق كورگەن «سەركە ءسوزدىڭ ساردارى» كىتابىنداعى اقتارىلىپ جازىلعان پىكىرلەر ارقىلى جۇكەڭنىڭ وزگە دە قىرلارىن تانىدىم», دەپ تۇيىندەدى.
ءارى قاراي ارىپتەس-دوستارى جۇمابەك كەنجاليننىڭ ءومىرى مەن شىعارماشىلىعى, قوعامدىق قىزمەتى تۋرالى تەبىرەنىسكە تولى ەستەلىكتەرىمەن ءبولىستى. ونىڭ ادامي بولمىسىن, ەل الدىندا جۇرگەن كوشباسشىلىق قاسيەتىن, ەرەكشە قابىلەتىن, ەڭبەكقورلىعىن, ازاماتتىق تۇلعاسىن ايقارا اشتى.
ايتا كەتەيىك, جۇمابەك كەنجالين وقۋلارىن ۇيىمداستىرۋداعى باستى ماقساتى: تانىم ساباقتاستىعىن جالعاستىرىپ, اياۋلى ازاماتتىڭ ساۋلەلى عۇمىرى ارقىلى ۇرپاق بويىنا ۇلگى-ونەگە ءسىڭىرۋ, تاريحي تۇلعا رەتىندە دارىپتەۋ. بولاشاقتا بۇل جيىن ءداستۇرلى تۇردە جالعاسىن تابادى.