بۇگىن قازاقستان مەن اقش كليماتتىڭ وزگەرۋىمەن كۇرەس ماسەلەلەرىن تالقىلادى. اتاپ ايتقاندا, اقش ارال تەڭىزى پروبلەمالارىن شەشۋگە, قازاقستاننىڭ كومىرتەكتى بەيتاراپتىققا جەتۋ باستاماسىنا, بىرلەسكەن جوبالاردى جۇزەگە اسىرۋعا قولداۋ بىلدىرۋگە نيەتتى.
بۇل تۋرالى قازاقستان رەسپۋبليكاسى پرەزيدەنتىنىڭ حالىقارالىق ارىپتەستىك جونىندەگى ارنايى وكىلى ەرجان قازىحانوۆ پەن قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ اقش پرەزيدەنتىنىڭ كليمات جونىندەگى ارنايى وكىلى دجون كەرريمەن وتكەن ەكىجاقتى ونلاين كەزدەسۋىندە ايتىلدى.
قازاقستان وكىلدەرى كومىرتەكتى بەيتاراپتىققا جەتۋ بويىنشا قابىلدانىپ جاتقان شارالار, جاڭا ەكولوگيالىق كودەكستىڭ نورمالارى جونىندە اقپارات بەردى. سونىمەن قاتار ءداستۇرلى ەنەرگەتيكالىق رەسۋرستاردىڭ مول ەكەنىنە قاراماستان, قازاقستان پاريج كەلىسىمىنىڭ ماقساتتارىنا بەلسەندى ۇمتىلىپ جاتقانىن جەتكىزدى.
بۇدان بولەك, «جاسىل» قارجىلاندىرۋ جوبالارى اياسىندا اقش-پەن ارىپتەستىك اياسىن كەڭەيتۋگە قىزىعۋشىلىق تانىتىلدى.
دجون كەرري قازاقستاننىڭ كليماتتىڭ وزگەرۋى ماسەلەلەرى بويىنشا قىزمەتىن جوعارى باعالاپ, پرەزيدەنت ق.ج. توقاەۆ وتكەن جىلى جەلتوقساندا كليماتتىق امبيتسيالار سامميتىندە ايتقان ماقساتتار مەن مىندەتتەردى اتاپ ءوتتى.
ماعزۇم مىرزاعاليەۆ قازاقستاننىڭ تمد مەملەكەتتەرى اراسىندا ءبىرىنشى بولىپ پاريج كەلىسىمىن راتيفيكاتسيالاعانىن جانە ورتالىق ازيادا «جاسىل ەكونوميكانى» دامىتۋ بويىنشا كوشباسشى ەكەنىن ەسكەرە وتىرىپ, ەلىمىزدە كليماتتىق سۇراقتار بويىنشا ورتالىق ازيانىڭ ايماقتىق حابىن قۇرۋ تۋرالى ۇسىنىس ءبىلدىردى.
«حابتىڭ قىزمەتىن ايماق ەلدەرىنىڭ «جاسىل ەكونوميكالىق» ءوسىمدى قامتاماسىز ەتۋ جولىندا كۇش بىرىكتىرۋىنە, «جاسىل» تەحنولوگيالار ترانسفەرتىنە, ءبىلىم الماسۋعا جانە حالىقارالىق ينستيتۋتتار تاراپىنان قارجى تارتۋعا باعىتتاۋعا بولادى», دەدى ۆەدومستۆو باسشىسى.
بۇل تۇرعىدا اقش پرەزيدەنتىنىڭ ارنايى وكىلى سۋتەك ءوندىرىسىنىڭ ءداستۇرلى ەنەرگيا كوزدەرىنە بالاما رەتىندە كەلەشەگى زور باعىت ەكەنىن اتاپ ءوتتى.
بۇدان بولەك, قازاقستان تاراپى وسى كۇزدە تۇركىستان قالاسىندا C5+1-كە قاتىسۋشى ەلدەردىڭ ەكولوگيا مينيسترلەرىنىڭ كەزدەسۋىن وتكىزۋ تۋرالى باستاما كوتەردى. بۇل باستامانى اقش تاراپى قولداپ, ايماقتىق ديالوگ اياسىندا جۇمىس قارقىنىن ارتتىرۋدىڭ ماڭىزدىلىعىنا توقتالدى.
اڭگىمە بارىسىندا تاراپتار ارال تەڭىزىن قالپىنا كەلتىرۋ تاقىرىبىن جانە قازاقستان مەن ورتالىق ازياداعى باسقا دا پروبلەمالاردى قوزعادى.
امەريكالىق ارىپتەستەرگە قازاقستاننىڭ ينۆەستيتسيالىق الەۋەتى تۋرالى ايتىلىپ, گەولوگيا, جاسىل ەنەرگەتيكا جانە جاڭا تەحنولوگيالار سالاسىندا بىرگە جۇزەگە اسىرۋعا بولاتىن بىرقاتار جوبا ۇسىنىلدى.
ۇسىنىلعان باستامالار اقش تاراپىنان جاقسى قابىلداندى. كەزدەسۋ قورىتىندىسى بويىنشا تاراپتار اتالعان باعىتتا بىرلەسكەن جۇمىستى جالعاستىرۋعا كەلىستى.