دۇنيەجۇزىلىك اۆتورلىق قۇقىق جانە كىتاپ كۇنىنە وراي اقتاۋ قالاسىنداعى نازارباەۆ زياتكەرلىك مەكتەبىنىڭ ءداستۇرلى «كىتاپ الەمدى باعىندىرادى» اكتسياسى بيىل دا جالعاسىن تاپتى. ءبىلىم ورداسىنىڭ 647 وقۋشىسى مەن 100-گە تارتا مەكتەپ پەداگوگى كارانتين تالاپتارىن ساقتاي وتىرىپ, قۇپيا دوستارىنا كىتاپ سىيلادى.
جىل سايىن 23 ساۋىردە وتكىزىلەتىن اكتسيا قاشىقتان وقۋعا وتۋىنە بايلانىستى ءساۋىردىڭ 15-16-سى كۇندەرى ءوتتى. ادامداردى جاپپاي جيناماۋ ماقساتىندا كەزەڭ-كەزەڭگە ءبولىنىپ, اراقاشىقتىق پەن سانيتارلىق تالاپتار ساقتالا وتىرىپ ۇيىمداستىرىلدى. اكتسياعا قاتىسۋشىلار وزدەرىنە جەرەبە ارقىلى تۇسكەن قۇپيا دوسىنىڭ قالاۋلى جانرى بويىنشا كىتاپ ساتىپ الىپ, وعان ىزگى تىلەكتەر جاۋدىردى.
– سىنىپتاستارىنىڭ تالعامىن جاقىنىراق تانىتۋ جانە ساقتىق شارالارىن ساقتاۋ ماقساتىندا بيىل قاتىسۋشى وقۋشىلار ءوز سىنىپتاستارىنا كىتاپ سىيلادى. ال ۇستازدار ارىپتەستەرىنەن قۇپيا دوستى ىزدەدى, – دەيدى اكتسيانى ۇيىمداستىرۋشى, مەكتەپ اعا كىتاپحاناشىسى جانار باحيتوۆا.
كىتاپ وقۋدى ناسيحاتتاۋ شاراسىنا ءتورتىنشى رەت قاتىسىپ تۇرعان 11-سىنىپ وقۋشىسى جانسۇلتان بۇركىتباي اكتسيانى اسىعا كۇتكەنىن ايتادى.
– بۇل شاراعا اكتسيا باستالعالى بەرى قاتىسىپ كەلەمىن. وتە قىزىقتى شارا. ءار جىلى كىمگە ءتۇستىم ەكەن, قانداي كىتاپ سىيلار ەكەن دەپ جۇرەسىڭ. وسى جولى ماعان ابايدىڭ «45 قاراسوزىن» قويىن كىتاپشا تۇرىندە سىيلادى. ال مەن يۋليا ءليمنىڭ «سپيسوك» كىتابىن سىيلادىم. ساقتىق شارالارىن ساقتاۋعا تۋرا كەلدى, سول ءۇشىن دە مەكتەپ اۋلاسىندا جينالا المادىق. شىنى كەرەك, سول ءبىر اتموسفەرا وزىمە دە قاتتى ۇنايتىن. اكتسيادان كەيىن دە كىتاپ سىيلاۋ مەنىڭ سۇيىكتى ادەتىمە اينالدى, – دەيدى ءوزىن-ءوزى باسقارۋ ۇيىمىنىڭ پرەزيدەنتى.
«كىتاپ الەمدى باعىندىرادى» اكتسياسى – نازارباەۆ زياتكەرلىك مەكتەبىندە 2017 جىلدان بەرى ۇيىمداستىرىلىپ كەلەدى. جالپى ەسەپ بويىنشا اكتسياعا 2017 جىلدان بەرى 3 مىڭعا جۋىق ادام قاتىستى.
ماڭعىستاۋ وبلىسى