گرۋزيا جازۋشىلارى ۇيىندە قازاقتىڭ اقىنى جانە ويشىلى اباي قۇنانباي ۇلىنىڭ گرۋزين تىلىندە العاش باسىلىپ شىققان ولەڭدەر جيناعىنىڭ تۇساۋكەسەرى ءوتتى. ءىس-شاراعا گرۋزيانىڭ مادەنيەت مينيسترلىگى مەن جازۋشىلار وداعىنىڭ, ادەبي توپتارىنىڭ, سونداي-اق قازاقستان ەلشىلىگىنىڭ وكىلدەرى قاتىستى, دەپ حابارلايدى Egemen.ءkz سىم ءباسپاسوز قىزمەتىنە سىلتەمە جاساپ.
اباي ولەڭدەرىنىڭ اۋدارماشىسى, گرۋزيا جازۋشىلار وداعىنىڭ ءتورايىمى, مەملەكەتتىك سىيلىقتاردىڭ لاۋرەاتى ماكۆالا گوناشۆيلي ءوز سوزىندە قازاق حالقىنىڭ ۇلتتىق بولمىسى, رۋحى مەن دۇنيەتانىمىن قامتيتىن اباي شىعارماشىلىعىنىڭ جان-جاقتىلىعى مەن تەرەڭدىگىن, ونىمەن تانىسۋ ەكى مادەنيەتتىڭ ءوزارا بايۋى مەن حالىقتاردىڭ جاقىنداسۋىنا قىزمەت ەتەتىنىن اتاپ كورسەتتى.
قازاقستان ەلشىلىگىنىڭ كەڭەسشىسى گۇلميرا ءسۇلتانالي اباي شىعارماشىلىعى مەن يدەيالارىنىڭ تاۋەلسىزدىك كەزەڭىندە, ەلىمىزدى جاڭعىرتۋ شەڭبەرىندە اسا وزەكتى جانە ۇلكەن سۇرانىسقا يە ەكەندىگىن اتاپ كورسەتتى.
بۇل كەشتە ادەبيەتشىلەردىڭ نازارىنا قازاقستان مەن گرۋزيادا باسىلىپ شىعارىلعان ماكۆالا گوناشۆيلي مەن عالىم جايلىبايدىڭ ولەڭدەر جيناقتارى دا ۇسىنىلدى.
گرۋزين جازۋشىلارى اباي ولەڭدەرىنىڭ گرۋزين تىلىندەگى اۋدارماسىنا جوعارى باعا بەرە وتىرىپ, ەكى ەلدىڭ شىعارماشىلىق قاۋىمداستىقتارى اراسىنداعى ىنتىماقتاستىقتى جالعاستىرۋدىڭ, ونىڭ ىشىندە قازاق جانە گرۋزين اقىندارى مەن جازۋشىلارى تۋىندىلارىنىڭ ەكى ءتىلدى جيناعىن شىعارۋدىڭ ماڭىزدىلىعىن اتاپ ءوتتى.
قازاقستاندىق ديپلوماتتار گرۋزيا جازۋشىلار وداعىنا قازىرگى قازاق پوەزياسىنىڭ جانە پروزاسى انتولوگيالارىن سىيعا تارتتى.