قىزىلوردا وبلىسى پوليتسيا دەپارتامەنتىنىڭ قىزمەتكەرلەرى ارال-بالىق ينسپەكتسياسىنىڭ قىزمەتكەرلەرىمەن بىرلەسىپ «ۋىلدىرىق-2021» ءىس-شاراسى كەزىندە زاڭسىز بالىق اۋلاۋدىڭ تاعى دا ەكى دەرەگىن انىقتادى, دەپ حابارلايدى Egemen.kz Polisia.kz سايتىنا سىلتەمە جاساپ.
اتاپ ايتقاندا, ارال اۋدانى, كوكارال تەڭىزىنىڭ جاعاسىنداعى تىيىم سالىنعان ايماقتا قايىقپەن اۋ سالۋ ارقىلى توعىز قاپ 484 كگ تورتا بالىعىن زاڭسىز اۋلاعانى ءۇشىن جەرگىلىكتى تۇرعىن ۇستالدى.
سونداي-اق سول كۇنى ءدال وسى تەكتەس جاعدايدا 358 كگ تورتا بالىقتارىن اۋلاعانى ءۇشىن ارال اۋدانىنىڭ تۇرعىندارى ۇستالدى. ايعاق زاتتار الىندى.
ەكى دەرەك بويىنشا دا قازاقستان رەسپۋبليكاسى قىلمىستىق كودەكسىنىڭ 335-بابىنىڭ 1-بولىگىمەن (زاڭسىز بالىق اۋلاۋ قاعيدالارىن بۇزعانى ءۇشىن) سوتقا دەيىنگى تەرگەپ-تەكسەرۋ جۇمىستارى باستالدى.