قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى مەن نۇر-سۇلتان قالاسىنا جۇمىس ساپارىمەن كەلگەن رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆ ەكىجاقتى كەلىسسوزدەر وتكىزدى.
مينيسترلەر ساياسي جانە ەكونوميكالىق سالالارداعى, ترانزيت-كولىكتىك, ەنەرگەتيكا, اسكەري-تەحنيكالىق سالالارداعى قازاقستان-رەسەي ىنتىماقتاستىعىنىڭ اعىمداعى جاي-كۇيى مەن دامۋ پەرسپەكتيۆالارىن, سونداي-اق تمد, ەاەو, ۇقشۇ, شىۇ جانە اوسشك سياقتى حالىقارالىق ۇيىمدار مەن وڭىرلىك ينتەگراتسيالىق بىرلەستىكتەر شەڭبەرىندەگى ەكى ەلدىڭ ءوزارا ءىس-قيمىلىن تالقىلادى.
م.تىلەۋبەردى رەسەي باعىتى قازاقستاننىڭ سىرتقى ساياساتىنىڭ ماڭىزدى باسىمدىعى بولىپ قالا بەرەتىنىن جانە ەكى جاقتى قارىم-قاتىناستارىمىزدا شەشىلمەگەن ماسەلەلەر جوق ەكەنىن اتاپ ءوتتى. قازاقستاندا ەكى ەل اراسىنداعى وداقتاستىق قارىم-قاتىناستار جوعارى باعالانادى.
تاراپتار حالىقارالىق كۇن ءتارتىبىنىڭ وزەكتى ماسەلەلەرى, سونىڭ ىشىندە ورتالىق ازيادا, وڭتۇستىك كاۆكازدا, تاياۋ شىعىستا وڭىرلىك تۇراقتىلىق پەن قاۋىپسىزدىكتى قامتاماسىز ەتۋ بويىنشا پىكىر الماستى.
سونىمەن قاتار اسا جوعارى جانە جوعارعى دەڭگەيدەگى ءىس-شارالاردى دايىنداۋ ماسەلەلەرى, ونىڭ ىشىندە ەكى مەملەكەت باسشىلارىنىڭ قاتىسۋىمەن كوكشەتاۋ قالاسىندا وتەتىن قازاقستان مەن رەسەيدىڭ XVII ايماقارالىق ىنتىماقتاستىق فورۋمى قاراستىرىلدى.
ساپار باعدارلاماسى اياسىندا رەسەي فەدەراتسياسىنىڭ سىرتقى ىستەر ءمينيسترى قازاقستان رەسپۋبليكاسى پرەزيدەنتى قاسىم-جومارت توقاەۆتىڭ قابىلداۋىندا بولادى دەپ كۇتىلۋدە.