مەملەكەت باسشىسى قاسىم-جومارت توقاەۆ ازاماتتاردىڭ دەنساۋلىعىن قورعاۋداعى جانكەشتى ەڭبەگى ءۇشىن دارىگەرلەرگە ريزاشىلىعىن ءبىلدىردى. بۇل تۋرالى ول Twitter پاراقشاسىندا جازدى, دەپ حابارلايدى Egemen.kz.
«بۇگىن دۇنيەجۇزىلىك دەنساۋلىق كۇنى. قازىرگىدەي قيىن كەزەڭدە دەنساۋلىق ساقتاۋ سالاسىنىڭ ءتيىمدى جۇمىسى – ادامزات ومىرىندە قانشالىقتى ماڭىزدى ەكەنىن كورسەتتى. پاندەميانىڭ العاشقى كۇنىنەن باستاپ مەديتسينا قىزمەتكەرلەرى ادام ومىرىنە اراشا ءتۇسىپ, ك/ۆيرۋسقا قارسى كۇرەستىڭ الدىڭعى شەبىندە ءجۇر.
قولجەتىمدى جانە ساپالى مەديتسينا جۇيەسى – جالپىۇلتتىق باسىمدىق. 2020 جىلدان باستاپ مەديتسينا سالاسىن قارجىلاندىرۋ 1,5 ەسەگە كوبەيدى. 2021 جىلى 1 قاڭتاردان باستاپ سالا قىزمەتكەرلەرىنىڭ جالاقىسى كوتەرىلدى. ازاماتتاردىڭ دەنساۋلىعىن قورعاۋداعى جانكەشتى ەڭبەگى ءۇشىن دارىگەرلەرگە ريزاشىلىعىمدى بىلدىرەمىن», دەپ جازدى ق. توقاەۆ.