بۇگىندە ەلوردادا Ashyq پيلوتتىق جوباسىنا قاتىساتىن كاسىپكەرلىك سۋبەكتىلەرىنىڭ سانى 57-گە دەيىن جەتتى. نۇر-سۇلتان قالاسى ەپيدەميالىق احۋال بويىنشا «قىزىل» ايماققا ەنگەندىكتەن ءموبيلدى قوسىمشامەن جۇمىس ىستەيتىن مەكەمەلەردىڭ سانى كۇن سايىن ارتىپ كەلەدى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
ايتا كەتەيىك, جوبا اياسىندا كاسىپكەرلىك سۋبەكتىلەرى دەنساۋلىق ساقتاۋ مينيسترلىگىنىڭ پتر-زەرتتەۋلەر تۋرالى دەرەكتەر بازاسىمەن بىرىكتىرىلگەن Ashyq ءموبيلدى قوسىمشاسىمەن جۇمىس ىستەيدى. مەكەمەگە كىرەر كەزدە جانە شىعار ساتتە QR-كودتار بەلگىلەنەدى. وسى ارقىلى كەلۋشىنىڭ ۆيرۋس تاسىمالداۋشى نەمەسە تاسىمالداۋشى ەمەستىگى تۋرالى مارتەبەسى انىقتالادى.
قازىر قوسىمشانى فيتنەس-كلۋبتار, سپا-ورتالىقتار, باسسەيندەر, بوۋلينگ كلۋبتارى, كومپيۋتەرلىك كلۋبتار مەن ساۋنالار پايدالانادى.
كاسىپكەرلەر ءۇشىن جوبانىڭ ارتىقشىلىعى — ونىڭ اياسىندا جۇمىس ىستەي وتىرىپ, قاي ايماققا ورنالاسقانىنا قاراماستان قىزمەتىن قايتا باستاۋىنا نەمەسە جالعاستىرۋىنا بولادى.
ايتا كەتۋ كەرەك, مەكەمەگە كىرەر ساتتە كەلۋشىلەرگە تۇستەر بويىنشا مارتەبە بەرىلەدى:
–– «قىزىل» مارتەبە – قوزعالىسقا شەكتەۋ, ويتكەنى ادام امبۋلاتوريالىق ەمدەلۋدە;
– «سارى» مارتەبە – ءىشىنارا شەكتەۋ, ياعني پتر ارقىلى بايلانىستا بولعان;
– «كوك» مارتەبە – پتر-انىقتامانىڭ بولۋى مىندەتتى ورىنداردان باسقا جەرلەردە قوزعالىسقا شەكتەۋلەر جوق;
– «جاسىل» مارتەبە – COVID-19-عا تەرىس ناتيجەمەن پتر-تەستىلەۋدەن وتكەن ادام ءۇشىن شەكتەۋسىز قوزعالىس.
نۇر-سۇلتاندا جۇمىس ىستەيتىن Ashyq جوباسىنا قاتىسۋشىلاردىڭ تىزىمىمەن قالا اكىمدىگىنىڭ رەسمي سايتىندا مىنا سىلتەمە بويىنشا تانىسۋعا بولادى.