قازاق حالقىنىڭ ەڭ باقىتتى ءداۋىرى ەلىمىزدىڭ تاۋەلسىزدىككە قول جەتكىزگەن كۇنىنەن باستالادى. ەڭكەيگەن قارتتان ەڭبەكتەگەن بالاعا دەيىن شىن قۋانىپ, شىن تولقىعان كۇندەر ءالى ەسىمىزدە. 1991 جىلدىڭ جەلتوقسان ايى قازاق حالقىنىڭ دەربەستىككە قول جەتكىزگەن تاريحي كۇنى ەدى.
سودان بەرى جىلدار ءوتتى تىزبەكتەلىپ. ەلباسىنا ارقا سۇيەپ ۇيرەنگەن حالىق كوڭىلى الاڭسىز, جايباراقات كۇن كەشتى. بىراق تاۋەلسىزدىككە قول جەتكىزگەن ەلدىڭ تاۋەلسىزدىگىنەن ايىرىلىپ قالمايتىن قازىعىن بەرىك ورناتۋ تەك ەلباسىنىڭ جاۋاپكەرشىلىگىندە بولعانى راس. ەڭسەسىن تىكتەگەن ەلدىڭ بۇدان بىلاي وزگەنىڭ باۋىرىنان جىلۋ ىزدەپ جاۋتەڭدەمەيتىن, جالپاقتامايتىن ءبىلىمدى, ىسكەر ۇرپاعىن قالىپتاستىردى. جاڭا مەملەكەت, جاڭا باسقارۋ جۇيەسى, جاڭا ساياسي كوزقاراس, جاڭا بۋىن قالىپتاسا باستادى.
ەلباسى ۇنەمى «مەن ءبىتىردىم دەگەنشە, ەل ءبىتىردى دەسەيشى» دەگەن دانالىقتى ۇستاندى. حالقىنىڭ دانالىعىنا ارقا سۇيەدى. ۋىعىن ءوزى قاداعان, ارمان مەن ماقساتىنا قول جەتكىزگەن بۇل ەلدىڭ تاعدىرى تالاي باز كەشكەن ۇيقىسىز كۇندەرىنىڭ كۋاسى بولار. ءسۇرىنىپ بارىپ تۇزەلگەن, ءۇزىلىپ بارىپ جالعاسقان كوشتىڭ جولىن قىرانداي قاداعالاپ, ەلىنىڭ بەيبىت كۇنىن كۇزەتتى. مەملەكەتتىڭ تاعدىرى دا ادام تاعدىرىنا ۇقساس, ونى سوعىس اپاتتارىنان, تامىرىنا تۇسەتىن جەگىقۇرتتان, ساياسي ويىنداردىڭ لاڭىنان ساقتاپ قالۋ ءۇشىن كۇرەس ءجۇرىپ جاتتى. وسى جولدا وزىمەن بىرگە قازاقتىڭ تاڭداۋلى, كۇرەسكەر, وتانى ءۇشىن وتقا تۇسەتىن, ءوز تاعدىرىن ەل تاعدىرىنا ارناعان ازاماتتارعا سەنىم ارتتى. «اتالىدان بي قويساڭ – اداسپاس جول مەن جورادان, اتاسىزدان بي قويساڭ – بوساماس اۋزى پارادان» – ەلباسىنىڭ وسى ىزگى سەنىمى مەملەكەتتى وزىمەن بىرگە قالىپتاستىرعان تۇلعالاردى انىقتادى. ولار دا حالقىنىڭ سۇيىسپەنشىلىگىنە بولەندى. حالقى قاۋىپسىز, سوعىسسىز بەيبىت كۇن كەشتى.
2019 جىلدىڭ 19 ناۋرىزى كۇنى ەلباسى نۇرسۇلتان ءابىش ۇلى نازارباەۆ قازاقستان حالقىنا مالىمدەمە جاسادى. پرەزيدەنتتىك وكىلەتتىگىن توقتاتۋ جونىندەگى شەشىمىن جاريا ەتتى. كونستيتۋتسيالىق تۇرعىدا رەتتەلگەن بيلىك ساباقتاستىعىنا توقتالدى. ەندى مەملەكەت باسىنا جاڭا بۋىننىڭ كەلۋىن قامتاماسىز ەتەتىنىن, ال ءوزى قاشاندا حالقىمەن بىرگە بولاتىندىعىن ايتتى.
ارينە, بۇل – الەم ەلدەرىندە قالىپتاسقان ءۇردىس, بىراق تاۋەلسىزدىككە قولى ەندى جەتكەن, تاريحتىڭ تار كەزەڭىن باستان وتكىزگەن ءبىزدىڭ حالىقتىڭ الاڭ كوڭىل بولاتىن ءجونى دە بار ەدى.
ەلباسى ءبىلىمى مەن پاراساتىنا ارقا سۇيەگەن, وزىمەن بىرگە مەملەكەتتى قۇرۋدا ۇزەڭگىلەس بولعان, سىرتقى ەلدىڭ ديپلوماتيالىق ءبىلىمىن بويىنا ابدەن سىڭىرگەن, سىرتقى ىستەر ءمينيسترى, پرەمەر-مينيستر, سەنات توراعاسى, بىرىككەن ۇلتتار ۇيىمىنىڭ نەگىزگى ءبولىمىن باسقارعان الەمدىك دەڭگەيدەگى ءىرى ساياساتكەر قاسىم-جومارت كەمەل ۇلى توقاەۆتى تاڭدادى. ەلباسى ءبىر ادامنىڭ بويىنداعى وسىنشا ءبىلىم-پاراساتتى ايقىنداپ ايتا كەلىپ: «ول – ادال!!!» دەدى.
قوبالجىعان ەل كوڭىلىنىڭ سابىرعا كەلگەنىن كوردى, شەشىمىنىڭ قولداۋ تابارىنا سەندى. ەل تاعدىرىن, ءوزى قۇرعان مەملەكەتتىڭ تاعدىرىن, ۇلت تاعدىرىن ادالدىققا تاپسىردى.
روزا مۇقانوۆا,
اباي اتىنداعى مەملەكەتتىك سىيلىقتىڭ لاۋرەاتى