مەملەكەت تاۋەلسىزدىگىنىڭ 30 جىلدىق مەرەيلى بەلەسىنىڭ قارساڭىندا تۇرمىز. اسقان اسۋ, اتتاعان بەلەس, حالقىمىزدىڭ ءجۇرىپ وتكەن جولى تاريح دەيتىن ۇلى كىتاپقا قاتتالىپ جاتىر. ەلەڭ-الاڭ كەزەڭدە ەل تىزگىنىن ۇستاپ, بۇرالاڭ جولداردان حالقىمىزدى امان الىپ وتكەن, جاس مەملەكەتىمىزدى جاسامپازدىق جولعا سالىپ بەرگەن نۇرسۇلتان نازارباەۆتىڭ وسىدان ەكى جىل بۇرىن قابىلداعان شەشىمى قازاقستان تاريحىنىڭ التىن تاراۋىنا جازىلىپ, كەيىنگى ۇرپاققا ماڭگىلىك ۇلگى بولىپ قالاتىن ايرىقشا قادام دەپ بىلەمىن.
بۇل بيلىك تىزگىنى ۇستاعان بارلىق باسشىنىڭ قولىنان كەلە بەرمەيتىن شەشىم. ال ەلدىڭ بولاشاعىن ارىدان ويلاعان ەلباسى ساياسات شارىعىندا شىڭدالعان بىلىكتى ازامات قاسىم-جومارت توقاەۆقا ەل باسقارۋ تىزگىنىن تاپسىرىپ, كورەگەن شەشىم قابىلدادى. مەنىڭشە, بۇل – دەر كەزىندە جاسالعان وڭتايلى قادام ءارى كەيىنگىگە عيبراتتى ۇلگى. كەز كەلگەن دامىعان مەملەكەت ساياسي ساباقتاستىقتىڭ سالتىن ساقتاۋى ءتيىس. ۇرپاق وسەدى, بۋىن الماسادى, زامان وزگەرەدى, ءار ءداۋىردىڭ وزىنە ساي ءۇنى بولادى. سول ۇنگە قۇلاق تۇرە الاتىن, ەلمەن ەتەنە ارالاسىپ, جۇرتپەن ۇندەسە جۇمىس ىستەيتىن باسشى عانا بولاشاقتى باعامداپ, ەلدى يگىلىككە باستايدى. بىزدە بۇل ساباقتاستىق ءوز ۋاقىتىندا سالتانات قۇردى.
ارينە, ەل باسقارۋ وڭاي شارۋا ەمەس. ونىڭ جاۋاپكەرشىلىك جۇگى تىم اۋىر. ىشكى جانە سىرتقى ساياساتتى ۇيلەستىرە ءبىلۋ, سان سالانىڭ تىزگ ءىنىن تەڭ ۇستاۋ – ۇلكەن ەڭبەك پەن اسقان ءبىلىمدى قاجەت ەتەتىن دۇنيە. تاريحي تاڭداۋلارعا بارىپ, قيىندىقتارمەن قاپتالداسا ءجۇرىپ, سارابدال شەشىم قابىلداۋ – ناعىز قايراتكەردىڭ ءىسى. بۇل تۇرعىدا قازاقستاننىڭ ۇلگىسى باسقا مەملەكەتتەر ءۇشىن دە جاقسى ونەگە بولا الادى.
جاھاندانۋ داۋىرىندە ادامزات بالاسى ءتۇرلى سىن-قاتەرلەرمەن بەتپە-بەت كەلىپ جاتىر. الەمنىڭ ءبىر بولشەگى بولعاسىن بۇل قيىندىقتار ءبىزدى دە اينالىپ وتپەيتىنى – زاڭدى قۇبىلىس. وسىنداي تاعدىرشەشتى كەزەڭدە بارعا ماساتتانباي, ەتەك-جەڭىمىزدى جيناپ العا ۇمتىلۋىمىز كەرەك. مۇنى بيلىك وكىلدەرى دە جاقسى ءتۇسىنىپ وتىر. ەكونوميكانى ەسەڭگىرەتىپ الماۋ ءۇشىن اۋقىمدى جوسپارلار قۇرىلىپ جاتىر, سونىڭ ءبارى جۇيەلى جۇزەگە اسقاي!
دوسمۇحامەد كىشىبەكوۆ,
اكادەميك