مەملەكەت باسشىسى قاسىم-جومارت توقاەۆتىڭ جەردى شەتەلدىكتەرگە ساتپاۋ جانە جالعا بەرمەۋ جونىندەگى شەشىمىن قولدايمىز. جەر – اتا-بابالارىمىزدان ۇرپاققا ميراس بولىپ قالعان اسىل مۇرا.
شىن مانىندە, بۇل جەرگە يەلىك ەتۋ ءبىزدىڭ پارىزىمىز. ويتكەنى وسى جەرىمىزدى قورعاۋ ءۇشىن قانشا ءومىر قيىلىپ, قانشا قان توگىلدى دەسەڭىزشى.
سوندىقتان پرەزيدەنتتىڭ زاڭ جوباسىن پارلامەنتكە قايتا جىبەرۋى دۇرىس قادام بولدى. ءوزىم اۋىلشارۋاشىلىق سالاسىندا ەڭبەك ەتەمىن. جەردىڭ قادىرىن تۇسىنەتىن ازاماتتاردىڭ ءبىرىمىن. بۇگىندە شارۋاشىلىقتى ۇلكەن كاسىپكە اينالدىرىپ وتىرمىز.
سولتۇستىك قازاقستان وبلىستىق جەر كوميسسياسىنىڭ مۇشەسى رەتىندە كوپ ازاماتىمىزدىڭ اتاكاسىپتى جالعاستىرىپ, ناتيجەسىندە بۇگىندە ۇلكەن-ۇلكەن قوجالىقتار قۇرىلعانىن كورىپ ءجۇرمىز. ءوزىم دە ءبىر شارۋا قوجالىعىنا يەلىك ەتەمىن. وتباسىمدى اسىرايتىن تابىس كوزىم – جەر. جالپى, جەر كيەلى. بۇل – ءبىزدىڭ اتالارىمىز, اكەلەرىمىز وسكەن توپىراق. قازىر ونى ءبىز باسىپ جۇرسەك, كەلەشەكتە ءبىزدىڭ ۇرپاعىمىزعا كەرەك.
اتالارىمىز قالدىرعان جەردى ۇرپاعىمىزعا تابىستاۋ, اماناتتاۋ پارىزىمىز. جەر – حالىقتىڭ قازىناسى. سوندىقتان ونى ساتۋ دۇرىس ەمەس. ۇلت بولىپ ۇيىسۋ, حالىق بولىپ قالىپتاسۋ ءۇشىن جەر كەرەك. قاي حالىق ءۇشىن دە جەردىڭ قادىرى جوعارى.
ال تالايدىڭ تالقىسىنا تۇسكەن بۇل ماسەلەگە پرەزيدەنتتىڭ نۇكتە قويۋى كوپشىلىكتى قۋانتتى دەگەن ويدامىن. شارۋالار اتىنان ءبىز دە بۇل شەشىمدى قولدايمىز.
ەركەبۇلان مامبەتوۆ,
«مامبەتوۆ ي ك» قوجالىعىنىڭ ديرەكتورى,
سولتۇستىك قازاقستان وبلىستىق جەر كوميسسياسىنىڭ مۇشەسى