ەكولوگيا ۆيتسە-ءمينيسترى پاۆلودار وبلىسىنىڭ ءىرى كاسىپورىندارىن اعاش وتىرعىزۋعا شاقىردى

«2020 جىلعى قىركۇيەكتە ەكولوگيا مينيسترلىگى مەن پاۆلودار وبلىسىنىڭ اكىمدىگى ءوڭىردىڭ ەكولوگيالىق پروبلەمالارىن شەشۋ بويىنشا جول كارتاسىن بەكىتتى. ونداعى ەميسسيانى تومەندەتۋ, كوگالداندىرۋ جانە قالدىقتاردى قايتا وڭدەۋ بولىگىندە ەكولوگيالىق پروبلەمالاردى شەشۋ بويىنشا ناقتى ءىس-شارالار كوزدەلگەن. مينيسترلىك جول كارتاسىنىڭ ورىندالۋىنا ەرەكشە كوڭىل بولەدى. 2020 جىلعى قۇجاتتا پاۆلودار قالاسىندا جىل سايىن 2 گەكتار وسىممەن كوگالداندىرۋعا جەر تەلىمدەرىن ءبولۋ قاراستىرىلعان», دەدى ەكولوگيا مينيسترلىگى باسشىسىنىڭ ورىنباسارى.

احمەتجان پىرىمقۇلوۆ ERG كومپانياسىن اعاشتاردىڭ ۇلكەن كولەمىن وتىرعىزۋ ارقىلى ءوڭىردىڭ جاسىل قورىن ۇلعايتۋعا شاقىردى.

«وتكەن اپتادا مينيسترلىكتە جينالىس وتكىزدىك, وندا ERG كومپانياسى مەن وبلىستىڭ باسقا دا كاسىپورىندارى اعاشتاردىڭ ۇلكەن كولەمىن وتىرعىزۋعا دايىن ەكەندىكتەرىن ءبىلدىردى, تەك جەر تەلىمدەرىنىڭ جوقتىعى تۋرالى ماسەلە تۋىندادى», دەپ اتاپ ءوتتى ەكولوگيا ۆيتسە-ءمينيسترى.

ول وبلىس باسشىلىعىنا كومپانيا باسشىلىعىمەن كەزدەسۋ وتكىزىپ, اعاش وتىرعىزاتىن جەر تەلىمدەرىن انىقتاۋدى ۇسىندى.

ۆيتسە-مينيستر كوتەرگەن تاعى ءبىر ماڭىزدى ماسەلە – اۆتوجولدار قۇرىلىسى كەزىندە كۇل مەن شلاك قالدىقتارىن پايدالانۋ.

«ەلەكتر ەنەرگياسىن ءوندىرۋ ناتيجەسىندە «ەكىباستۇز گرەس-1» جشس-دە جىل سايىن 4,5 ملن.تونناعا دەيىن كۇل-شلاك قالدىقتارى شىعارىلادى. جالپى, كۇل ۇيىندىسىنە 166 ملن. توننادان استام كۇل-شلاكتار كومىلگەن. 2020 جىلى ەكىباستۇز گرەس-1-ءنىڭ كۇل-شلاك قالدىقتارى اۆتوجولدار قۇرىلىسىنا تارتىلماعان. وبلىس اكىمدىگىنە وسى قالدىقتاردى وبلىستىق ماڭىزى بار جولداردى سالۋ ءۇشىن نەعۇرلىم بەلسەندى تارتۋ قاجەت. بۇدان باسقا, تابيعاتتى قورعاۋ شارالارىندا كۇل-شلاك قالدىقتارىن قايتا پايدالانۋ جولىمەن قىسقارتۋ بويىنشا ۇتىمدى شارالار كوزدەلمەگەن», دەپ اتاپ ءوتتى احمەتجان پىرىمقۇلوۆ.

سونداي-اق ۆيتسە-مينيستر جۇمىس ساپارى بارىسىندا ءوڭىردىڭ ءىرى ونەركاسىپتىك كاسىپورىندارىنا بارىپ, قالدىقتاردى قايتا وڭدەۋ, لاستاۋشى زاتتاردىڭ شىعارىندىلارىن ولشەۋدى اۆتوماتتاندىرۋ, قۇرعاق جاعاجايلاردىڭ پايدا بولۋىن جويۋ جانە ت.ب. بويىنشا قابىلداعان شارالارىمەن تانىستى.