ەلباسى كىتاپحاناسىندا ىڭتىماقتاستىق تۋرالى مەموراندۋمعا قول قويىلدى

ەلباسى كىتاپحاناسىنىڭ ديرەكتورى باقىتجان تەمىربولات شارانىڭ شىمىلدىعىن ءتۇرىپ, قاتىسۋشىلاردىڭ الدىندا ءسوز سويلەدى. ول 30 جىل بۇرىن قازاقستان تاۋەلسىزدىككە قول جەتكىزىپ, ءوزىنىڭ بىرەگەي جولىن تاڭداپ, كەز كەلگەن سالانىڭ الەۋەتىن دامىتۋ ءۇشىن بارلىق مۇمكىندىكتەردى پايدالانعاندىعىن اتاپ ءوتتى. سونداي-اق, ب.تەمىربولات ەلباسى كىتاپحاناسىنىڭ قازاقستان تاۋەلسىزدىگىنىڭ 30 جىلدىعىنا ارنالعان «قازاقستان ماقتانىشى» اتتى اۋقىمدى جوباسى تۋرالى ايتىپ بەردى. جوبا اعىمداعى جىلدىڭ 8 ناۋرىزىندا «بولاشاق» حالىقارالىق باعدارلاماسىنىڭ 30 ۇزدىك تۇلەكتەرىمەن وتكەن ينتەراكتيۆتى كەزدەسۋدەن باستاۋ الدى.

«قازاقستاننىڭ ماقتانىشى» جوباسى ەل ماقتانىشىنا اينالعان دارىندى وتانداستارىمىزدىڭ ءومىر جولى, ەرەن ەڭبەگى مەن تابىسقا جەتۋ تاسىلدەرى تۋرالى جاقىنىراق ءبىلۋ ءۇشىن قولعا الىندى. بۇگىنگى ءىس-شارا دەنە شىنىقتىرۋ جانە سپورت سالاسىنداعى مەملەكەتتىك ساياساتتى, قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆتىڭ سالاۋاتتى ۇلت يدەولوگياسىن قالىپتاستىرۋ ىسىندەگى باستامالارى مەن يدەيالارىن ناسيحاتتاۋ جانە ءتۇسىندىرۋ جولىندا جاڭا سەرپىن بەرەتىنىنە سەنىمدىمىن»,  دەدى ب.تەمىربولات.

داڭقتى قازاقستاندىق بوكسشى, 2005 جانە 2007 جىلدارداعى الەم چەمپيونى, 2012 جىلعى وليمپيادا چەمپيونى, بۇگىندە قر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ساپيەۆ سپورتشىلارعا ارنالعان داڭق مۇراجايىنىڭ اشىلۋى ەلىمىزدىڭ تۋىن كوكتە جەلبىرەتەتىن جاس باتىرلاردىڭ رۋحىن ارتتىراتىنىن ايتتى.

ارى قاراي بۇگىنگى جيىن اياسىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى مەن قازاقستان رەسپۋبليكاسى مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى اراسىندا ىنتىماقتاستىق تۋرالى مەموراندۋمعا قول قويىلدى. ەلباسى كىتاپحاناسىنىڭ ديرەكتورى باقىتجان تەمىربولات پەن قر مسم سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ساپيەۆ قۇجاتقا قول قويدى.

ودان كەيىن وليمپيادا چەمپيوندارى مەن قازاقستاننىڭ اتاقتى سپورتشىلارىنىڭ جەكە زاتتارىن ەلباسى كىتاپحاناسىنىڭ مۋزەيىنە سىيعا تارتۋ ءراسىمى ءوتتى. قازاقستاندىق مانەرلەپ سىرعاناۋشى ەليزابەت تۇرسىنباەۆانىڭ اكەسى بايتاق تۇرسىنباەۆ الەم چەمپيوناتىندا قىزىنىڭ تورتتىك سالحوۆ جاساپ, قازاقستاندى الەمدىك قىسقى سپورت تاريحىنا قوسقان كونكيىن تابىستادى. 

سەرىك ساپيەۆ 2009 جىلعى الەم چەمپيوناتىنا كيىپ بارعان فورماسىن سىيعا تارتتى. يۋري مەلنيچەنكو ءىس-شارا ۇيىمداستىرۋشىلارىنا سپورتتاعى مانسابىنداعى جەڭىپ العان كوپتەگەن كۋبوكتارىنىڭ ءبىرىن سىي ەتتى. ءاليا يۋسۋپوۆا حالىقارالىق تۋرنيردەن مۇسىنشەنى, اتاۋلى مەدال مەن تاياقشاسى بار لەنتانى تابىس ەتتى. يليا يلين مۇراجاي كوللەكتسياسىن 2014 جىلعى التىن مەدالمەن تولىقتىردى. دانيار ەلەۋسىنوۆ مۋزەيگە ءوزىنىڭ التىن بوكس قولعابىن تاپسىردى. گۇزەل مانيۋروۆا جەڭىستى تريكوسىن بەردى. بەيبىت ىستىباەۆ 2015 جىلى ەلباسىنىڭ ءوزى تاپسىرعان بەلبەۋدى تاپسىردى. ءمولدىر مەكەنباەۆا 2019 جىلى موڭعوليادا وتكەن ازيا چەمپيوناتىنىڭ مەدالدارىن تارتۋ ەتتى. دارحان نورتاەۆ قازاقستان دجيۋ-دجيتسۋ قاۋىمداستىعىنىڭ اتىنان الەم چەمپيوناتىنىڭ كۋبوگىن تاپسىردى. سونىمەن قاتار, ءىس-شاراعا بايك جانە باسقا دا ولجالارىن ەلباسى كىتاپحاناسىنا ۇسىنعان قازاقستان بايكەرلەر قاۋىمداستىعىنىڭ پرەزيدەنتى دميتري پەترۋحين دە قاتىستى.

ءىس-شارادا الىپ كۇش يەسى, كۇش قولداناتىن نومىرلەر اراسىنداعى الەمنىڭ ءتورت دۇركىن رەكورد يەسى, قاجىمۇقان مۇڭايتپاسوۆ پەن بالۋان شولاقتىڭ مۇراسىن جالعاستىرۋشى, قر مادەنيەت جانە سپورت مينيسترلىگىنىڭ ەلىمىزدەگى كۇش مادەنيەتىن دامىتۋ جونىندەگى وكىلى سەرگەي تسىرۋلنيكوۆ تا بوي كورسەتتى. قوناقتاردىڭ الدىندا ول كۇش ونەرىن پاش ەتىپ, ات تاعاسىن مايىستىردى. كەيىننەن تاعانى مۋزەيدىڭ قورىنا وتكىزدى.  

«مەن قازاق پالۋاندارىنىڭ كۇش ونەرىن جالعاعان سپورت ءتۇرىن تەگىننەن تاڭدامادىم. ويتكەنى, بۇل قازاقستان مادەنيەتىنىڭ اجىراماس بولىگى دەر ەدىم. وكىنىشكە قاراي, قازىرگى تاڭدا كۇش سپورتىنىڭ مۇراسى ءبىرجولا جوعالىپ بارادى. بۇگىنگى مەنىڭ نەگىزگى مىندەتىم – قازاقستاننىڭ كۇش ونەرىن جاڭعىرتۋ, ارى قاراي نىعايتۋ. جاستار ءوز ەلىنىڭ باتىرلارىن, باتىرلىقتىڭ جولىن, ۇلتتىق رۋح پەن تاريحتىڭ قالىپتاسۋىن جەتىك ءبىلۋى كەرەك. قورىتا ايتقاندا, مەن ءۇشىن بۇل ءىس-شارا وتە ماڭىزدى, ويتكەنى قالىڭ جۇرتشىلىقتى ءبىزدىڭ پالۋاندارىمىزدىڭ مۇراسىمەن تاعى دا ءبىر تانىستىرىپ, ولاردىڭ ونەرلەرىن كورسەتۋگە مۇمكىندىك الامىن», دەيدى ول.

قازاقستاندىق بوكسشى, الەمنىڭ, ازيانىڭ بىرنەشە دۇركىن چەمپيونى, تاۋەلسىزدىكتىڭ قۇرداسى دانيار ەلەۋسىنوۆ ريو-دە-جانەيرودا وتكەن 2016 جىلعى وليمپيادا ويىندارىنداعى جەڭىستى جەكپە-جەگىنىڭ ەستەلىكتەرىمەن ءبولىستى: «وليمپيادا اۋىلىندا كەۋدەگە تاعىلعان مەدالمەن باقىتتان باسىم اينالىپ, اسىر سالعانىمدى ەشقاشان ۇمىتپاسپىن. تۋىستارىمنان, دوستارىمنان, ارىپتەستەرىمنەن قۇتتىقتاۋلار قابىلداپ, توبەم كوككە جەتتى. مەن سول كۇنگە, سول ماقساتقا ۇزاق ۋاقىتىمدى قيدىم, بارىمدى سالدىم. تۇبىندە حالىقتىڭ سەنىمىن اقتاي الدىم دەپ ويلايمىن. وسى جىلى الداعى بارلىق جەڭىستەرىمدى ەلىمىزدىڭ تاۋەلسىزدىگىنە ارناعىم كەلەدى».

بۇگىنگى تاڭدا سپورت پەن سپورت جەتىستىكتەرى الەمدىك وركەنيەت پەن مادەنيەتتىڭ اجىراماس بولىگى ەكەنى انىق. تاۋەلسىزدىك جىلدارىندا قازاقستان سپورتشىلارى ءتۇرلى دەڭگەيدەگى حالىقارالىق جارىستاردا 60-تان استام وليمپيادالىق جانە 700-گە جۋىق حالىقارالىق جارىستاردىڭ مەدالىن جەڭىپ الدى. ءبىزدىڭ ەلىمىز العاشقىلاردىڭ ءبىرى بولىپ 30 سپورتتىق  الپاۋىت ەلدەردىڭ قاتارىنا ەندى. قازاقستان رەسپۋبليكاسىندا سپورتتى دامىتۋ مەملەكەتتىك ساياساتتىڭ ماڭىزدى باعىتتارىنىڭ ءبىرى بولىپ قالا بەرەدى.

جيىنعا قاتىسۋشىلار سپورت جۇلدىزدارىمەن بىرگە قۇرمەت تۇعىرىنا كوتەرىلىپ, چەمپيونداردان قولتاڭبا الدى. ايتۋلى شارانىڭ ەلباسى كىتاپحاناسىندا ءوتۋىنىڭ سيمۆوليكالى ءمانى بار, ويتكەنى ءدال وسى عيماراتتا جاستاردى سالاۋاتتى ومىرگە شاقىرىپ, ەرەكشە ەنەرگيامەن بولەيتىن ينتەراكتيۆتى الاڭ بار. وسى الاڭدا يليا يلين تەمىر كوتەرسە, سەرىك ساپيەۆ بوكستاستى. ەكەۋى دە وزدەرىنىڭ تسيفرلى قارسىلاستارىن تىزە بۇكتىردى.    

سپورت-رەۆيۋ بارىسىندا سپورتشىلار تاپسىرعان جەكە زاتتار مەن مۇراعات ماتەريالدارى ەلباسى كىتاپحاناسىنىڭ ەكسپوزيتسيالارىنان لايىقتى ورىن تاۋىپ, جۇرتشىلىقتىڭ يگىلىگىنە اينالادى.