ەمەننىڭ ءيىر بۇتاعىنداي مىقتىلىق... تاعدىردىڭ تالكەگىنە استە مويىماۋ. بالكىم بۇل ىشكى جان-دۇنيەنىڭ قايسارلىققا شۇپىلدەپ تولۋىنان شىعار. قالاي بولعان كۇندە دە كوكتەمنىڭ قىرمىزى گ ۇلىندەي ءناپ-نازىك قىزدىڭ بويىندا وسىنشاما كۇش-قۋاتتىڭ بولۋى اۋەلى تاڭعالدىرعان. كەيىن تىلدەسە كەلە ءتانتى بولدىق.
بالا كەزىندە بۋرابايدىڭ باۋرايىندا ءجيى كەزەدەسەتىن كورىنىسكە, قوجىر-قوجىر قارا تاستى قاق جارىپ قاراعايدىڭ وسەتىنىنە تاڭعالۋشى ەدى. اراكىدىك ماڭگى جاسىل قاراعايلاردىڭ اراسىندا ءلۇپ ەتكەن سامال جەلمەن تەربەلە مايىسىپ, كىلەمدەي قۇلپىرىپ, نەشە الۋان گۇل دە وسەتىن. كوز الماي قارايتىنى بار ەدى. تامىرلارى قالاي ءنار الىپ جاتىر ەكەن؟ تاس تۇگىل قۇنارلى قارا جەردىڭ وزىندە وسەر-وسپەسى بەلگىسىز وسىمدىك اتاۋلىعا ومىرشەڭ كۇش بەرىپ تۇرعان قايسارلىق-اۋ دەپ تۇيسىنەتىن.
ءاۋ باستا ءبارى جاقسى ەدى. جاس كوكىرەكتى ءتاتتى قيال, ادەمى ارمان جايلاعان. ءبارى ءبىر ساتتە تۇبىرىنەن ج ۇلىنعانداي, كوكتەمەي جاتىپ ۇزىلگەندەي بولدى. 2017 جىلى جول اپاتىنا ۇشىراعان. وزگەسى وزگە, ومىرتقانىڭ زاقىمدانۋى وتە قيىن بولدى. ەندى قايتىپ تۇرا المايتىنىنا, مىناۋ كوركەم كورىنىستى كوز سۋارىپ تاماشالاي المايتىنىنا, كورگەن سايىن كوڭىلىڭدى قۋانتاتىن تاماشا تابيعاتتىڭ اياسىندا باسقالار ءتارىزدى اياعىن قاز باسىپ جۇرە المايتىنىنا قاتتى نالىعان. بارار جەرىڭە ءوز اياعىڭدى باسىپ بارعان دا باقىت ەكەن عوي, بۇرىن كىم بىلگەن؟!
قينالىپ جاتقاندا قارا تاستى قاق جارىپ وسەتىن قاراعاي ەسىنە تۇسكەن. تابيعاتتىڭ وسى ءبىر تىلسىم ءساتى قۋات بەرگەندەي. انە قازانداي-قازانداي تاستاردىڭ ۇستىندە ۇلبىرەپ گۇل دە ءوسىپ تۇر ەمەس پە؟
ەندەشە بۇل دا تاعدىر پەشەنەسىنە جازعان جاس عۇمىرىنىڭ بار قىزىعىن تولايىم كورەدى, وعان حاقىسى بار. ون ەكىدە ءبىر گ ۇلى اشىلماي جاتىپ مۇگەدەكتەر ارباسىنا تاڭىلعان ۆەنەرا تۇمانوۆا وشارىلىپ ۇيدە وتىرىپ قالۋدى قوش كورمەدى. قاتارىنان قالماي تىربانۋى كەرەك. بىراق قالاي؟! مەرزىمدى باسىلىمداردان ءوزى ءتارىزدى تاعدىر تالكەگىنە تۇسكەن جانداردىڭ سپورتتى سەرىك ەتەتىندىگىن وقىعانى بار ەدى. ەڭ الدىمەن قان اينالىمى جاقسارادى, بالعىن دەنە بۇرىنعى كۇش-قۋاتىن قايتا تابادى. ەگەر انىق سولاي بولسا, كوكىرەگىندەگى ءۇمىت وتى قولامتانىڭ شوعىنداي قايتا لاۋلايدى. وسىلايشا وي تۇيگەن ۆەنەرا ۇستەل تەننيسىمەن اينالىسا باستادى.
العاشقىدا قيىن بولدى. بارماق باسىنداي, ءبىر ورىندا تۇرماي زىر قاعىپ, سەكەكتەيتىن ۇستەل تەننيسىنىڭ دوبى ۇستاتار ەمەس. قۇددى ءوزىنىڭ كوزىنەن بۇلبۇل ۇشقان ساپ-ساۋ بالعىن شاعى ءتارىزدى. بىرتە-بىرتە جاتتىققان. ۋاقىت وتە كەلە ماشىق قالىپتاستى. ەندى ءتاپ-ءتاۋىر ويناي الاتىن بولدى. ويىن بىتكەن كەزدە تۇلا بويىنىڭ دەل-سال بولىپ ابدەن شارشاعانىن سەزەتىن. بىراق سول شارشاۋدان دا راحات تاباتىن. كوز قانىپ, قول جاتتىققان سوڭ اۋدان, وبلىس كولەمىندەگى جارىستارعا قاتىسا باستادى. ۇنەمى جۇلدەلى ورىندارعا يە بولىپ ءجۇر.
– سپورت – جان سەرىگىم, – دەيدى ۆەنەرانىڭ ءوزى, – ءبىر جاقسىسى, وسىنداي جەرلەردە مۇڭداس جاندارمەن كەزىگەسىڭ, ولاردىڭ جان سىرىن ۇعاسىڭ. سونىڭ ءوزى ءبىرتۇرلى كوڭىلىڭدى دەمەپ, ومىرگە دەگەن قۇشتارلىعىڭدى ارتتىرا تۇسەدى. جالعىز ەمەسسىڭ, «كوپپەن كورگەن ۇلى توي». جالپى ومىردە قانداي قيىندىق كەزدەسسە دە, مويىماي جەڭىپ شىعۋعا تىرىسۋ كەرەك. ءبىر كۇندىك ساۋلەنى كورۋ, ارايلاپ اتقان تاڭنىڭ, الاۋلاپ باتقان كەشتىڭ شاپاعىنا شومىلۋدىڭ ءوزى جەر باسىپ جۇرگەن ادامنىڭ پەشەنەسىنە جازىلعان باقىت دەر ەدىم.
ەشقاشان ەشكىمگە ماسىل بولعىسى كەلمەگەن. كەيدە راس, ون ەكى مۇشەسى ساۋ ادامداردىڭ تىرشىلىكتەن تۇڭىلە باز كەشىپ جاتاتىندىعىن تۇسىنە المايدى. اياق-قولىڭ ساۋ بولسا, تاس قوپارىپ, تىرشىلىك ەتىپ, جۇمىس ىستەۋگە ابدەن بولادى ەمەس پە؟! قول اربانىڭ مىسىقتابانداپ جىلجىعان ەكپىنىمەن بولاشاققا جوسپار قۇرعان جىگەرلى قىز جاڭا كاسىپتى مەڭگەرگەن. بىراق ونىسىنا وتكەن جىلى جامان تۇماۋ قولبايلاۋ بولدى. ايتسە دە تابىسسىز ەمەس. بۋراباي باۋرايىنا قىسى-جازى كەلىمدى-كەتىمدى جولاۋشى كوپ. اسىرەسە, جاز ايلارىندا بالالارىن ەرتىپ كەلىپ, كوركى كوز سۇيسىندىرەتىن تامىلجىعان تابيعاتتى ارالاتاتىن اتا-انالار از ەمەس. بال كۇلكىلى بالالار ماڭگى جاسىل قاراعاي مەن قولدىڭ سالاسىنداي اق قايىڭدار كومكەرگەن تاڭعاجايىپ ولكەدە الاڭسىز قىدىرعىسى كەلەدى. مىنە, سولارعا ارناپ بالالار كولىكتەرىن جالعا بەرەتىن ورىن اشتى. قيىن تۇگى دە جوق, الدىمەن اتا-انالاردىڭ العىسىن الادى, بالالاردى قۋانىشقا كەنەلتەدى. ساۋاپتى ءىس. وزىنە دە ءتيىمدى.
قاراعايدىڭ قارسى بىتكەن بۇتاعىنداي قايسارلىق قانىنا دارىعان ۆەنەرا الداعى ۋاقىتتا قول جەتكەن تابىسىمەن شەكتەلىپ قالماي, بيزنەس الەمىنە باتىلىراق قادام باسپاق. ەگەر ءىسى وڭعارىلىپ جاتسا, ءوزى ءتارىزدى ادامدارعا كومەك قولىن سوزسام دەگەن ىزگى ارمانى بار. نەسى بار, ىزدەنگەن مۇراتقا قاشاندا جەتەدى ەمەس پە؟!
اقمولا وبلىسى,
بۋراباي اۋدانى