الماتى قالاسىندا قوس قاريانىڭ قانىن موينىنا جۇكتەگەن قاسكۇنەمگە قاتىستى سوت ۇكىمى شىقتى. 81 جانە 89 جاستاعى قارت كىسىلەردى توناپ, ايۋاندىقپەن اجال قۇشتىرعان انتۇرعان ءومىر بويىنا باس بوستاندىعىنان ايىرىلدى.
جاعا ۇستاتار جاعداي وتكەن جىلدىڭ جاز ايىندا ورىن العان. ەرلى-زايىپتى زەينەتكەرلەرگە قاراقشىلىق شابۋىل جاساۋ دەرەگى بويىنشا تىركەلگەن ءىس قىلمىستىق ىستەر جونىندەگى مامانداندىرىلعان اۋدانارالىق سوتتا قارالدى.
«2020 جىلى شىلدە ايىندا و. ەسىمدى سوتتالۋشى كولىك ساتىپ الۋ ماقساتىندا ەرلى-زايىپتى ك. جانە ا. اتتى زەينەتكەردىڭ پاتەرىنە زاڭسىز كىرىپ, ولارعا شابۋىل جاساپ, پىشاقپەن قورقىتىپ, اقشا تالاپ ەتكەن. ەگدە جاستاعى قاريالار قارسىلىق كورسەتكەندە, سوتتالۋشى ولارعا بىرنەشە رەت پىشاق سالعان. قاريالار وقيعا ورنىندا كوز جۇمدى. كەيىننەن سوتتالۋشى 500 دوللار جانە 360 مىڭ تەڭگە مەن ۇيالى تەلەفوندى ۇرلاپ كەتكەن», دەپ حابارلادى قالالىق سوتتىڭ ءباسپاسوز قىزمەتى.
سوتتا پروكۋرور ايىپتالۋشىنى 20 جىلعا باس بوستاندىعىنان ايىرۋدى ۇسىندى. ال جابىرلەنۋشى تاراپ وكىلدەرى بولسا, ءومىر بويىنا باس بوستاندىعىنان ايىرۋ جازاسىن سۇرادى. قىلمىسكەر كىناسىن ءىشىنارا مويىنداعان.
«سوت ۇكىمىمەن و. ەكى ادامدى ولتىرگەنى جانە قاراقشىلىق جاساعانى ءۇشىن كىنالى دەپ تانىلىپ, ءومىر بويىنا باس بوستاندىعىنان ايىرۋ تۇرىندەگى ەڭ قاتاڭ جازاعا كەسىلدى. قاتاڭ جازا تاعايىنداۋ بارىسىندا سوتتالۋشىنىڭ بۇرىن دا قاراقشىلىق ءۇشىن سوتتالعانى جانە ول ارەكەتىنەن ساباق الماعانى ەسكەرىلگەن», دەپ حابارلادى قالالىق سوتتىڭ ءباسپاسوز قىزمەتى.
الماتى