پرەمەر-ءمينيستردىڭ ورىنباسارى رومان سكليار جانە گەرمان كومپانيالارىنىڭ باسشىلارى ونلاين-كەزدەسۋ وتكىزدى, ونىڭ بارىسىندا «جاسىل ەكونوميكانى» دامىتۋ, شيكىزاتتى دەكاربونيزاتسيالاۋ, قايتا وڭدەۋ جانە سۋتەگى ەكونوميكاسى سالاسىنداعى ىنتىماقتاستىق ماسەلەسى تالقىلاندى, دەپ حابارلايدى Egemen.kz.
كەزدەسۋگە Siemens Energy, Linde, Deutsche Bahn, REMONDIS, Deutsche Bank, Bayer, SAP, Goldbeck Solar جانە باسقا دا 80-نەن استام جەتەكشى نەمىس كومپانيالارىنىڭ باسشىلارى مەن وكىلدەرى قاتىستى.
گەرمان ەكونوميكاسى شىعىس كوميتەتىنىڭ باسقارۋشى ديرەكتورى ميحاەل حارمس ءسوز سويلەپ, ەكى ەلدىڭ ساۋدا-ەكونوميكالىق جانە ينۆەستيتسيالىق ىنتىماقتاستىعىن دامىتۋدىڭ ماڭىزدىلىعىن اتاپ ءوتتى.
ونلاين-كەزدەسۋ بارىسىندا گەرمانيانىڭ جەتەكشى كومپانيالارىنىڭ باسشىلارى «جاسىل ەكونوميكانى» دامىتۋ پەرسپەكتيۆالارىنا, ەكىجاقتى ىنتىماقتاستىق الەۋەتىنە جانە بىرلەسكەن جوبالاردى ىسكە اسىرۋعا ەرەكشە نازار اۋداردى. كەزدەسۋ سوڭىندا «سۇراق-جاۋاپ» فورماتىندا پىكىرتالاس ءوتتى.