2020 جىلى قازاقستاندا 769,3 مىڭ توننا ارماتۋرالىق ءونىم ءوندىرىلدى. وتاندىق قۇرىلىس يندۋسترياسىن دامىتۋ ءۇشىن ىشكى نارىققا 574,1 مىڭ توننا ارماتۋرا جونەلتىلدى. ءبىر تونناسى ورتاشا العاندا 311,4 مىڭ تەڭگەدەن ساتىلدى, دەپ حابارلايدى Egemen.kz.
قۇرىلىس ارماتۋراسىن ەلىمىزدە بەس كومپانيا وندىرەدى. جوبالىق قۋاتى جىلىنا 1,42 ملن. توننانى قۇرايدى.
ولاردىڭ ىشىندە ەلىمىزدەگى ەڭ ءىرى مەتاللۋرگيالىق كاسىپورىن - "ارسەلورميتتال تەمىرتاۋ "اق, ۇساق سۇرىپتى پروكات شىعاراتىن "ەۆرازكاسپيان ستال" جشس زاۋىتى, "كاستينگ" جشس كوپ سالالى كاسىپورنى, مۇناي-گاز سالاسىنا ارنالعان جىكسىز بولات قۇبىرلار شىعاراتىن العاشقى وتاندىق كاسىپورىن - "KSP Steel "جشس جانە قارا مەتالدان جاسالعان بۇيىمدار شىعاراتىن "FerrumVtor" جشس كومپانياسى.
سونىمەن قاتار, قازاقستان كورشى مەملەكەتتەردەن 550,6 مىڭ توننا ارماتۋرالىق ءونىم يمپورتتادى. جەتكىزۋ قاشىقتىعىنا, ارماتۋرانىڭ ءتۇرى مەن سىنىبىنا بايلانىستى رەسەيدەن اكەلىنەتىن ءونىمنىڭ باعاسى 1 تونناسىنا 320 مىڭنان 380 مىڭ تەڭگەگە دەيىن (نۇر-سۇلتان 320 - 340 مىڭ تگ/تن, الماتى 340 - 350 مىڭ تگ/تن جانە شىمكەنت - 350 - 380 مىڭ تگ/تن) قۇرايدى. باعاعا قاتىستى جۇرگىزىلگەن سالىستىرمالى تالداۋ كورسەتكەندەي, رەسەيدەن يمپورتتالاتىن ارماتۋرالىق ءونىم وتاندىق ونىمگە قاراعاندا 3-18% قىمبات. باعاداعى ايىرماشىلىق ورتاشا ەسەپپەن 1 تونناسىنا 9 مىڭنان 69 مىڭ تەڭگەگە دەيىنگى ارالىقتا.
سونىمەن قاتار, قر ۇلتتىق ستاتيستيكا بيۋروسىنىڭ دەرەكتەرى بويىنشا 2020 جىلى ارماتۋرا ەكسپورتى 195,2 مىڭ توننانى قۇرادى. ءوز ەلىمىزدە وندىرىلگەن ارماتۋرالىق ءونىمدى جانە يمپورتتى قوسا العاندا, جالپى ىشكى تۇتىنۋ كولەمى 1,12 ملن. توننانى قۇرادى.
بيىل تاراز جانە شىمكەنت قالالارىندا جالپى قۋاتى جىلىنا 280 مىڭ توننا بولاتىن ("تاراز ارماتۋرالىق زاۋىتى" جشس, "SinuanSteel" جشس) ەكى جوبانى ىسكە قوسۋ جوسپارلانىپ وتىر.
قر يندۋستريا جانە ينفراقۇرىلىمدىق دامۋ مينيسترلىگى ءۇشىن قۇرىلىس ارماتۋراسىن جانە بولات ءونىمىنىڭ باسقا دا تۇرلەرىن ءوندىرۋ ءۇشىن وتاندىق مەتاللۋرگيا كاسىپورىندارىن شيكىزاتپەن تولىق قامتاماسىز ەتۋ - باسىم مىندەتتەردىڭ ءبىرى. وسىعان بايلانىستى مينيسترلىك وتاندىق مەتاللۋرگيالىق كاسىپورىنداردى شيكىزاتپەن قامتاماسىز ەتۋ بويىنشا جۇيەلى شارالار قابىلداۋدا.