قازاقستان ەلشىلىگىندە «حورۆاتيا-قازاقستان» دوستىق قوعامىنىڭ سالتاناتتى جينالىسى جانە قر تاۋەلسىزدىگىنىڭ 30 جىلدىعىنا ارنالعان كلاسسيكالىق مۋزىكانىڭ كامەرالىق كونتسەرتى ءوتتى. ءىس-شاراعا كورنەكتى ساياساتكەرلەر, پارلامەنت دەپۋتاتتارى, حورۆاتيا كونستيتۋتسيالىق سوتىنىڭ مۇشەلەرى, سونداي-اق قوعام وكىلدەرى, مادەنيەت جانە ونەر قايراتكەرلەرى قاتىستى, دەپ حابارلايدى Egemen.kz.
دوستىق قوعامىنىڭ توراعاسى اندريا كارافيليپوۆيچ ءىس-شارانى اشىپ, قازاقستان تاۋەلسىزدىگىنىڭ مەرەيتويى تۇڭعىش پرەزيدەنت - ەلباسى نۇرسۇلتان نازارباەۆتىڭ ەسىمىمەن تىعىز بايلانىستى ەكەنىن اتاپ ءوتتى. ول قازاقستاندى دامىتۋعا جانە حالىقارالىق ىنتىماقتاستىقتى نىعايتۋعا قوسقان زور تاريحي ۇلەسى ءۇشىن ەلشىلىككە ەلباسىنا ەستەلىك سىيلىق – اتاقتى حورۆات ءمۇسىنشىسى ماتە تۋريچ جاساعان «پارۋس» ءمۇسىنىن تابىس ەتىپ, جەلمەن تولتىرىلعان جەلكەندەر ەجەلدەن تابىسقا ۇمتىلۋدىڭ, ەرىك-جىگەردىڭ, سەنىم مەن ءۇمىتتىڭ نىشانى بولىپ تابىلاتىنىن اتاپ ءوتتى.
قازاقستان ەلشىسى تولەجان بارلىباەۆ تاۋەلسىزدىك جىلدارىنداعى ساياسي رەفورمالار ەۆوليۋتسياسىن بايانداپ, ەل باسشىلىعىنىڭ قوعامدىق جاڭعىرتۋ مەن الەۋمەتتىك باعدارلانعان مەملەكەتكە, پارلامەنتاريزم مەن كوپپارتيالىقتى نىعايتۋعا, «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋعا باعىتتالعانىن اتاپ ءوتتى. بەيبىت جيىندار تۋرالى جاڭا زاڭدى قابىلداۋ, ساياسي پارتيالار ءۇشىن ەلەكتورالدىق كەدەرگىنى تومەندەتۋ, ۇلتتىق قوعامدىق سەنىم كەڭەسىنىڭ قىزمەتى جانە جالپى ازاماتتىق قوعام ينستيتۋتتارىن نىعايتۋ سياقتى شارالار اتاپ ءوتىلدى.
حورۆاتيانىڭ ەكس-پرەزيدەنتى ستەپان مەسيچ قازاقستان باسشىلىعىنىڭ اۋقىمدى رەفورمالاردى جۇزەگە اسىرۋعا جانە مەملەكەتتىلىك ينستيتۋتتارىن دامىتۋعا, قازىرگى زامانعى ەكونوميكا مەن ەتنوسارالىق كەلىسىم قوعامىن قۇرۋعا دەگەن ستراتەگيالىق جۇيەلى كوزقاراسىن جوعارى باعالاپ, قازاقستان حالقى اسسامبلەياسىنىڭ تولەرانتتىلىق پەن ءوزارا تۇسىنىستىك قاعيداتتارىن نىعايتۋداعى ماڭىزدى ءرولىن ەرەكشە اتاپ ءوتتى.
ەلشىلىكتىڭ مۋزىكالىق سالونىندا قازاقستان تاۋەلسىزدىگىنىڭ 30 جىلدىعىنا ارنالعان كامەرالىق كونتسەرت ءوتتى. كلاسسيكالىق مۋزىكا ۆيرتۋوزى – كارنەگي حوللدا جانە نيۋ-يوركتەگى بۇۇ شتاب-پاتەرىندە ونەر كورسەتكەن تانىمال ۆيولونچەليست ەلدار ساپاراەۆ اباي ولەڭدەرىنە ارنالعان شىعارمالارمەن جانە قازاقستان مەن حورۆاتيانىڭ مەملەكەتتىك ءانۇراندارىن ورىنداۋمەن شارىقتاۋ شەگىنە جەتكەن يوگانن سەباستيان باحتىڭ كلاسسيكالىق سيۋيتالارىمەن ارنايى باعدارلاما ۇسىندى.
قاتىسۋشىلارعا ن. نازارباەۆتىڭ «تاۋەلسىزدىك ءداۋىرى» اتتى كىتاپتارى مەن بۇرىن حورۆات تىلىندە جارىق كورگەن اباي مەن ءال-ءفارابيدىڭ شىعارمالار جيناقتارى سىيعا تارتىلدى.