شىمكەنت قالاسى جۇمىسپەن قامتۋ جانە الەۋمەتتىك قورعاۋ باسقارماسىنا قاراستى «حالىققا الەۋمەتتىك قىزمەت كورسەتەتىن قالالىق اۋماقتىق ورتالىعى» – جارتىلاي ستاتسيونارلىق قىزمەت كورسەتەتىن مەكەمە. بۇگىندە بولىمشەدە 76 بالاعا ارناۋلى قىزمەت تۇرلەرى كورسەتىلۋدە. ونىڭ ىشىندە 62 بالانىڭ تىرەك-قيمىل جۇيەسى بۇزىلعان. وسىنداي مۇمكىندىگى شەكتەۋلى بالالار ءۇشىن ورتالىقتا تۇز شاحتاسى ىسكە قوسىلدى.
– بۇل ەمدەۋ ءادىسى يممۋنيتتەتى كۇشەيتىپ, تىنىس الۋ جۇيەسىن, وكپەنىڭ جەلدەتىلۋىن جاقسارتادى. برونح اۋرۋىن ەمدەۋگە جانە سۋىق تيگەن جاعدايدا دا جاردەمى بولادى. ال ارنايى تۇز بولمەسىنىڭ ەرەكشە جابدىقتالۋى ادامنىڭ ورتالىق جۇيكە جۇيەسىندەگى تەجەلۋ پروتسەستەرىن قالپىنا كەلتىرۋگە ىقپال ەتەدى. بولمەنىڭ شامادان تىس بەلسەندى, مازاسىز بالالاردى تىنىشتاندىراتىن دا اسەرى بار, –دەيدى ورتالىق ديرەكتورى زاميرا ابىلداەۆا.
سونداي-اق, ورتالىقتاعى بالالارعا بيىلدان باستاپ دارىگەرلەر نۇسقاۋىمەن وتتەگى كوكتەيلى (كيسلورودنىي كوكتەيل) بەرىلە باستادى. بۇل اعزانى قاجەتتى مولشەردە وتتەگىمەن قانىقتىرىپ, جۇرەك-قان تامىرلارى مەن تىنىس الۋ جۇيەلەرىنە جاقسى اسەر ەتەدى. سونداي-اق ءىش قاتۋىن الدىن-الىپ, اس قورىتۋ جولدارىنىڭ جاقسارۋىنا ىقپالى زور. دارىگەرلەردىڭ ايتۋىنشا, وتتەگى كوكتەيلى اعزانىڭ قورعانىش قاسيەتتەرىن, سترەسسكە توزىمدىلىگىن ارتتىرىپ, دەنساۋلىقتى جاقسارتادى.
ورتالىقتاعى ماماندار ەرەكشە كۇتىمدى قاجەت ەتەتىن بالالاردىڭ قيمىل-قوزعالىسىن جاقسارتۋ ءۇشىن كۇندەلىكتى وڭالتۋ, جاتتىعۋ ساباقتارىن ۇيىمداستىرادى. مۇنداي جاتتىعۋلار كەزىندە ۆەرتيكاليزاتورلار مەن كوپفۋنكتسيونالدى ورىندىقتار دا ءتيىمدى قولدانىلادى.