الماتىدا ەكولوگيالىق احۋالعا مونيتورينگ جاسايتىن ونلاين-كارتا ەندى تۇرعىندار ءۇشىن قولجەتىمدى. اتالعان كارتا قورشاعان ورتانىڭ جاعدايى, اتموسفەرالىق اۋانىڭ ساپاسى تۋرالى كەڭ اۋقىمدى اقپارات ۇسىنادى, دەپ حابارلايدى Egemen.kz.
قالالىق جاسىل ەكونوميكا باسقارماسىنىڭ حابارلاۋىنشا, ونلاين-كارتا ەكولوگيالىق جاعداي جونىندەگى بارلىق مالىمەتتەردى بىرىكتىرگەن ديناميكالىق پلاتفورما. مونيتورينگتىك ستانسالار ءاربىر 20 مينۋت سايىن ونلاين رەجيمدە اۋانىڭ جاعدايى تۋرالى اقپاراتتىق جۇيەنى ىسكە قوسىپ وتىرادى. مۇنداعى كورسەتكىشتەر گرافيكتەر جانە ساندىق دەرەكتەر تۇرىندە بەرىلەدى. ماكسيمالدى رۇقسات ەتىلگەن كونتسەنتراتسيا ينديكاتورلارىنىڭ ديناميكاسى دا كورسەتىلەدى.
ستانسالار اتموسفەراداعى لاستاۋشى زاتتاردىڭ كولەمىن, سونداي-اق ىلعالدىلىق, تەمپەراتۋرا, قىسىم, جەلدىڭ باعىتى مەن جىلدامدىعىن ولشەيدى. كەزەڭنىڭ ورتاشا ماندەرى جانە ورتاشا كۇندىك كورسەتكىشتەرى ەسەپتەلەدى. جوبانىڭ ماقساتى – قاراپايىم ازاماتتارعا, ساراپشىلار مەن ماماندارعا ونلاين فورماتتا مالىمەتتەر بەرۋ. سونىمەن قاتار, جيناقتالعان كورسەتكىشتەر بويىنشا اۋا ساپاسىنىڭ جانە باسقا پارامەترلەردىڭ وزگەرۋىن بولجاۋعا مۇمكىندىك بەرەتىن مالىمەتتەر بازاسى قۇرىلادى.
قازىرگى تاڭدا قالادا اۋا ساپاسىنا مونيتورينگ جۇرگىزەتىن 10 ستانسا بار. LED-ەكراندارعا اقپاراتتاردى شىعارۋ جانە مالىمەتتەر بازاسىنا كورسەتكىشتەردى بەرۋ ءۇشىن ونلاين مونيتورينگتىڭ تاعى 10 داتچيگى ىسكە قوسىلىپ, جۇمىس بارىنشا ساپالى جۇرگىزىلەدى دەگەن ءۇمىت بار.